ރަނގަޅަށް ދިރިއުޅެން މަސައްކަތްކުރަނިކޮށް ކައިވެނި ރޫޅިއްޖެނަމަ އަނިޔާ ލިބުނު މީހާއަށް އެކަން ވަރަށް ބޮޑުކަމަކަށްވާނެއެވެ. ވަރަށް ބޮޑު ހިތްދަތިކަމެއް ކުރިމަތިވާނެއެވެ. އެހެންކަމާއިއެކުގައިވެސް ކެތްތެރިވެލައި ޘާބިތުވެވިއްޖެނަމަ ކުރާނެ ފައިދާ މާބޮޑުވާނެކަން ބުނެދިނުމަށްޓަކައި މިރޭގެ މިދަރުސްދޭން މިތަނަށް އައުމުގެ ކުޑައިރުކޮޅެއް ކުރިން ބައްދަލުވި އަނހެނަކު ކިޔައިދިން ވާހަކައެއް ހިއްޞާކޮށްލާނަމެވެ.
އޭނާ ބުނިގޮތުގައި ހަމަ ކުއްލިއަކަށް އެއްރޭ އޭނާގެ ފިރިމީހާ ގެއަށް އައިސް ވަދެފައި އޭނާވަރިކޮށްލީއެވެ. ގެއިން ނެރެ ދަރިފުޅާއިވެސްއެކު ޢާއިލާ ގާތަށް ފޮނުވައިލީއެވެ.
ޢިއްދަ ހަމަވުމުންވެސް ޢާއިލާއިން އޭނާ އިތުރު ކައިވެންޏެއް ކުރާކަށް ބޭނުމެއް ނުވިއެވެ. ދަރިފުޅު ކުޑަކަމުންނެވެ. އެހެންވެ 5 އަހަރުވަންދެން ޖެހުނީ އިންތިޒާރުކުރާށެވެ! އެދުވަސްތަކުގައިވެސް އޭނާ ގެންދިއައީ އޭނާއަށް ހެޔޮލަފާ ފިރިއަކު ދެއްވެވުން އެދި ދުޢާކުރަމުންނެވެ. އައު، އުފާވެރި ޙަޔާތެއް ދެއްވެވުން ދެއްވެވުން އެދި ގެންދިއައީ ދުޢާކުރަމުންނެވެ.
އޭނާ ބުނީ 5 އަހަރުގެ އިންތިޒާރަކަށްފަހު އޭނާ ކެތްތެރިކަމާއިއެކު ކުރަމުން ގެންދިއަ ހުރިހާ ދުޢާތަކެއް ހަމަކުއްލިއަކަށް އެފަހަރާ ﷲ ތަޢާލާ ޢިޖާބަ ކުރެއްވެވި ކަމަށެވެ! އޭނާއަށް ލިބުނު ފިރިމީހާއަކީ ފިރިއެއްގެ ހައިސިއްޔަތުން ދުނިޔެއިން މަދުން ނޫނީ ނުލިބޭނެ ފަދަ ފިރިއެއް ކަމަށެވެ.
ލޮބުވެތި އަޚުންނާއި އުޚުތުންނޭވެ! ކައިވެނި ރޫޅުމަކީ ހަތަރު އުދަރެސް ފެނުޖެހި އުޑުވެއްޓި ބޮލުގައި ޖެހުން ފަދަ ކަމެއްކަމަށް ފިރިހެނުންވެސް އަދި އަންހެނުންވެސް ނުދެކޭށެވެ! އެމީހާގެ އެއްވެސް ކުށެއް ނެތި، ޙައްޤުގައި ހުއްޓައި ކައިވެނި ރޫޅިއްޖެނަމަ ޔަޤީންކުރަންވީ އެކަން ﷲ މިންވަރުކުރެއްވެވީ އެކައިވެނީގައި ދެމހުރުމުން ލިބިދާނެ އަނިޔާތަކަކުން ތިމާ ސަލާމަތްކުރައްވަވަން ކަމެވެ. ބދަލުގައި މާއުފާވެރި ޙަޔާތެއް ދެއްވަވާނެ ކަމަށެވެ!
 
ކައިވެނި ރޫޅުމުން ދުނިޔޭގައި އުޅޭ ފިރިހެނުންނަކީ ނުވަތަ އަންހެނުންނަކީ ނުބައި ބައެއް ކަމަށް ނުނިންމާށެވެ! އަނބިމީހާގެ ނުވަތަ ފިރިމީހާގެ ހައިޞިއްޔަތުން އަގު ބޮޑު ޖަވާހިރެއްފަދަ އަގުހުރި އެތައް ބައިވަރު ޢަބްދުﷲ ތަކާއި މަރްޔަމްތައް އުޅޭނެކަން ޔަޤީންކުރާށެވެ! އަދި އެފަދަ ޖަވާހިރެއް ތިމާއަށް ދެއްވަވާނެކަން ޔަޤީންކުރާށެވެ!
--މުފްތީ މެންކުގެ ދަރުސަކުން