ބަންގްލަދޭޝްގެ އެކި ސަރަޙައްދުތަކުގައި ހަލުވިކަމާ އެކު ޑެންގީ ހުން ފެތުރެމުންދާއިރު، މި އަހަރު މިހާތަނަށް އެ ބަލީގައި މަރުވެފައިވާ މީހުންގެ އަދަދު 407އަށް އުފުލިފައިވާ ކަން އެ ޤައުމުގެ ޞިއްޙަތާ ބެހޭ ވުޒާރާއިން ހާމަކޮށްފިއެވެ. އެ ޤައުމުގެ އެކި ކަންކޮޅުތަކުގައި ހަލުވިކަމާ އެކު ޑެންގީ ބަލި ފެތުރެމުން ދަނީ އާދަޔާ ޚިލާފަށް ހޫނު ގަދަވުމުގެ އިތުރުން ވިއްސާރަ މޫސުން ދިގުލައިގެން ދިޔުމާ ގުޅިގެން ކަމަށް ބެލެވެއެވެ. އެންމެ ހަލުކޮށް ބަލި ފެތުރެމުން ދަނީ އަރބަން ސަރަޙައްދުތައް ނުވަތަ ގިނަ އަދަދެއްގެ ބަޔަކު ދިރިއުޅެމުންދާ ތަރައްޤީވެފައިވާ ރަށްތަކުގައެވެ.
ބަންގްލަދޭޝްގެ ޞިއްޙަތާ ބެހޭ ވުޒާރާއިން ބުނީ، މި އަހަރުގެ މިހާތަނަށް މި ބަލީގައި މަރުވެފައިވާ މީހުންގެ އަދަދު 407އަށް އުފުލިފައިވާއިރު، ބަލި ޖެހިގެން ހަސްފަތާލުތަކުގައި އެޑުމިޓު ކޮށްގެން ފަރުވާ ދޭން ޖެހިފައިވާ މީހުންގެ އަދަދު 78,595އަށް އަރާ ކަމުގައެވެ. ނޮވެންބަރު މަހުގެ މެދާ ހަމައަށް ހަސްފަތާލުތަކުގައި އެޑުމިޓު ކޮށްފައިވާ މީހުންގެ އަދަދު 4,173އަށް އަރައެވެ. އޭގެ ތެރެއިން 1,835 މީހުން އެޑުމިޓު ކޮށްގެން ފަރުވާދެމުން ދަނީ ވެރިރަށް ދާކާގެ ހަސްފަތާލުތަކުގައެވެ. އަދި، އެހެން ހިސާބުތަކުގައިވާ ހަސްފަތާލުތަކުގައި 2,338 މީހަކު އެޑުމިޓު ކޮށްގެން ފަރުވާދެމުންދާ ކަން ރަސްމީ ތަފާސްހިސާބުތަކުން ހާމަވެއެވެ.
"ވިއްސާރަ މޫސުމުގެ ވާރޭ އޮކްޓޫބަރު މަހު ވެސް މި ދަނީ ފެންނަމުން، މިއީ ވަރަށް އާދަޔާ ޚިލާފު ކަމެއް،" ޖަހަންގިރްނަގޫރް ޔުނިވަރސިޓީގެ ޒޫލޮޖީ ޕްރޮފެސަރެއް ކަމުގައިވާ ކޮބިރުލް ބަޝާރު ވިދާޅުވިއެވެ. މޫސުމީ ބަދަލުތަކުގެ ސަބަބުން ޑެންގީ ހުން ފަތުރާ އީޑީސް މަދިރި އާލާވުމަށް އެންމެ އެކަށީގެންވާ ހާލަތެއް ކުރިމަތިވެފައިވާ ކަމުގައި ވެސް އޭނާ ވިދާޅުވިއެވެ. "މޫސުމަށް އަންނަމުންދާ ބަދަލުތަކާ އެކު މަދިރި އާލާވުމަށް އެންމެ އެކަށީގެންވާ ހާލަތު މި ވަނީ ކުރިމަތިވެފައި."
ބަންގްލަދޭޝަށް ޢާންމު ގޮތެއްގައި ވިއްސާރަ މޫސުން ލައިގަންނަނީ ޖޫން މަހާއި ސެޕްޓެންބަރު މަހާއި ދެމެދުގައެވެ. ނަމަވެސް، މި އަހަރުގެ ވިއްސާރަ މޫސުން އެއަށްވުރެ ދިގުލައިގެން ގޮސްފައިވާ ކަމުގައި އެ ޤައުމުގެ ކަމާގުޅޭ އިދާރާތަކުން ބުންޏެވެ. އަދި، ވިއްސާރަ މޫސުން ދުގުލައިގެން ދިޔުމާއި، އާދަޔާ ޚިލާފަށް ފިނިހޫނުމިން އުފުލުމާ ގުޅިގެން މަދިރި އާލާވުން އެތަކެއް ގުނައަކަށް އުތުރުވެ، މަދިރީގެ ޒަރީއާއިން ފެތުރޭ ބަލިތައް ޢާންމުވެފައިވާ ކަމުގައި ވެސް އެ ޤައުމުގެ އިދާރާތަކުން ހާމަކުރިއެވެ.
ބަންގްލަދޭޝްގެ ހަސްފަތާލެއްގައި މަސައްކަތް ކުރައްވާ ޑޮކްޓަރެއް ކަމުގައިވާ ޑރ އޭބީއެމް ޢަބްދުالله ވިދާޅުވީ، ޑެންގީ ބަލި ޖެހިފައިވާ ކަން ކުރީބައިގައި ދެނެގަނެވުމަކީ، އެ ބަލީގައި މަރުވާ މީހުންގެ އަދަދު މަދު ކުރުމަށް މުހިންމު ކަމެއް ކަމުގައެވެ. އަދި، ބަލި ޖެހިފައިވާ ކަން ކުރީބައިގައި ދެނެގަނެވިއްޖެ ނަމަ، ބަލި ޖެހޭ މީހުންގެ ތެރެއިން މަރުވާ މީހުންގެ އަދަދު %1ށް ދަށް ކުރެވޭނެ ކަމުގައި ވެސް އޭނާ ވިދާޅުވިއެވެ. "ޑެންގީ ކޮންޓްރޯލް ކުރުމަށް އެޅޭނެ އެންމެ މުހިންމު އެއް ފިޔަވަޅަކީ ބަލި ޖެހިފައިވާ މީހުން ކުރީބައިގައި ދެނެގަތުން،" އޭނާ ވިދާޅުވިއެވެ.
ހުސްވި އަހަރު ވެސް ޑެންގީ ބަލީގައި ބަންގްލަދޭޝުން ގިނަ އަދަދެއްގެ ބަޔަކު މަރުވިއެވެ. މި ގޮތުން، ރަސްމީ ހިސާބުތަކުން ހާމަވާ ގޮތުގައި 2023ވަނަ އަހަރު ޑެންގީ ބަލީގައި މަރުވެފައިވާ މީހުންގެ އަދަދު 1,705އަށް އަރައެވެ. އަދި، އެ އަހަރު ބަލި ޖެހުނު ކަން ކަށަވަރު ކުރެވިފައިވާ މީހުންގެ އަދަދު 321,000އަށްވުރެ މައްޗަށް އަރައެވެ. ކޮންމެ އަހަރަކު ވެސް ޑެންގީ ބަލި ޖެހޭ މީހުންގެ އަދަދު އުފުލެމުން ދިޔުމާއެކު، ބަންގްލަދޭޝްގެ ޞިއްޙީ ފަރުވާގެ ނިޒާމަށް ބާރު ބޮޑުވަމުންދާ ކަމުގައި އެ ޤައުމުގެ އިދާރާތަކުން ހާމަކުރިއެވެ.
1960ގެ އަހަރުތަކުން ފެށިގެން ބަންގްލަދޭޝުން ޑެންގީ ހުމުގެ ކޭސްތައް ރިޕޯޓުކޮށްފައިވެއެވެ. ނަމަވެސް، އޭގެ އެންމެ ނުރައްކާތެރި ވައްތަރު ކަމުގައިވާ 'ޑެންގީ ހެމޮރެޖިކް ފީވަރ' ޢާންމުކޮށް ފެތުރެން ފަށާފައިވާ ކަން ރިޕޯޓު ކޮށްފައި ވަނީ 2000ވަނަ އަހަރުއެވެ. މީގެ ކުރިން ޑެންގީ ހުން ޢާންމުވެފައި ވަނީ ހޫނު މޫސުމާއި ވިއްސާރަ މޫސުމުގައެވެ. ނަމަވެސް، ފަހަކަށް އައިސް ފިނި މޫސުމުގައި ވެސް ބަންގްލަދޭޝުން މި ބަލީގެ ކޭސްތައް ފެންނަމުންދާ ކަމުގައި އެ ޤައުމުން ބުނެއެވެ.