ނެޝަނަލް އިންޓެގްރިޓީ ކޮމިޝަން (އެންއައިސީ) ގެ މެންބަރުކަމަށް އަލްއުސްތާޛާ މަރްޔަމް އިންޝާ ފައިޞަލް އައްޔަންކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ.
އެ ކޮމިޝަން އަށް އައްޔަނުކުރެއްވުމަށް މަރްޔަމް އިންޝާ ފައިޞަލް ގެ ނަން ރައްޔަތުންގެ މަޖިލީހަށް ފޮނުއްވީ މިދިޔަ މަހުގައެވެ. އެއީ އެ ކޮމިޝަންގެ މެންބަރެއް ކަމުގައިވާ އަހުމަދު ޖިހާދުގެ ދައުރު ހަމަވުމުންނެވެ.
އިންޝާ ޤާނޫނީ ދާއިރާއިން ޑިގްރީ ޙާސިލްކުރައްވާފައިވާއިރު މިހާރު އިންޝާ ދަނީ މާސްޓަރސް ޑިގްރީ ޙާސިލްކުރައްވަމުންނެވެ. މީގެ ކުރިން ޕޮލިސް އިންޓެގްރިޓީ ކޮމިޝަންގައިވެސް މަސައްކަތްކުރައްވާފައިވާ އިންޝާ 2015 ވަނަ އަހަރުން ފެށިގެން މިއަހަރުގެ ޖެނުއަރީ މަހާއި ހަމައަށް ނެޝަނަލް އިންޓެގްރިޓީ ކޮމިޝަންގައި އިންވެސްޓިގޭޓަރެއްގެ ގޮތުގައި މަސައްކަތްކުރައްވާފައިވެއެވެ.
އެ ކޮމިޝަނުގައި 5 މެންބަރުން ހިމެނެއެވެ. އެއީ ކޮމިޝަންގެ ރައީސް ޤާސިމް ޢަބްދުލްކަރީމާއި ނައިބު ރައީސާ އާޝިޔަތު ޝިއުނާއާއި މެންބަރު އާމިނަތު ޝާދިޔާއާއި ޝުއައިބު އަބްދުއްރަޙްމާނު ގެ އިތުރުން އެ ކޮމިޝަންގެ މެންބަރުކަމަށް އައްޔަނުކުރުމަށް ފާސްކޮށްފައިވާ މަރްޔަމް އިންޝާ ފައިޞަލް އެވެ.