އަނބިކަނބަލުން ނަސްރީނާ އިބްރާހީމުއަށް ބޭސްފަރުވާ ކުރެއްވުމަށް އިންޑިއާގެ ކޮއިންބަތޫރަށް ކުރެއްވި ދަތުރުފުޅު ނިންމަވާލެއްވުމަށްފަހު ރައީސް މައުމޫނު އަބުދުލް ގައްޔޫމު މިއަދު މާލެ ވަޑައިގަންނަވާ ގޮތަށް ހަމަޖެހިއްޖެއެވެ.
ސީއެންއެމަށް މައުލޫމާތު ލިބިފައިވާ ގޮތުގައި ރައީސް މައުމޫނު މާލެ ވަޑައިގެންނެވުމަށް ހަމަޖެހިފައިވަނީ މިއަދު އެކެއް ޖަހާއެހާކަށްހާއިރުއެވެ. ރައީސް މައުމޫނު އިންޑިއާއަށް ފުރާވަޑައިގެންނެވީ މިދިޔަ އޮގަސްޓު މަހުގެ 27 ވަނަ ދުވަހުއެވެ.
ރައީސް މައުމޫނުގެ މިދަތުރުފުޅުގައި އެމަނިކުފާނުވަނީ އިންޑިއާގެ ބޮޑުވަޒީރު މަންމޯހަން ސިންގާއި ބައްދަލު ކުރައްވާފައެވެ.
މީގެ އިތުރުން ޖީއެމްއާރުގެ ވެރިޔާ ޖީއެމްރާއޯވަނީ ރައީސް މައުމޫނުގެ އަރިހަށް ޒިޔާރަތް ކުރައްވާފައެވެ.
ޖީއެމްރާއޯ ރައީސް މައުމޫނާއި ބައްދަލު ކުރެއްވީ ކޮއިންބަތޫރަށް ވަޑައިގެންނެވެ. ރައީސް މައުމޫނުގެ އޮފީހުން މައުލޫމާތުދޭ ގޮތުގައި މިބައްދަލުވުމުގައި ރައްޔިތުންނަށް ދެމުން ގެންދާ ހިދުމަތްތަކަށް ޖީއެމްއާރަށް ޝުކުރު އަދާ ކުރައްވާފައިވެއެވެ. އަދި އެއާރޕޯޓުގެ މައްސަލާގައި ރައްޔިތުންގެ ހިތްހަމަ ނުޖެހުންތައް ވެސް ޖީއެމްރާއޯއަށް ރައީސް މައުމޫނު ހިއްސާ ކުރައްވާފައިވާ ކަމަށް ވެސް މައުމޫނުގެ އޮފީހުން މައުލޫމާތުދެއެވެ.