ސިއްހީ ސާއިރާގެ ބައެއް މުވައްޒަފުންނަށް ނިމިދިޔަ އޮގަސްޓު މަހުގެ މުސާރަ ޖަމާކުރި އިރު އުނި އިތުރު އައިސްފައި ވާތީ، ފައިސާ އަނބުރާ ހޯދުމުގެ މަސައްކަތް ކުރާ ކަމަށް ފިނޭންސް މިނިސްޓްރީން ބުނެފިއެވެ.
ފިނޭންސް މިނިސްޓްރީން ބުނީ ސިއްހީ ދާއިރާގައި މަސައްކަތް ކުރާ 1796 މުވައްޒަފެއްގެ މުސާރަ ޖަމާކުރި އިރު، އުނި އިތުރު އައިސްފައިވާ މައްސަލަ ރޭ އެ މިނިސްޓްރީގެ ސަމާލުކަމަށް އައިސްފައި ވާކަމަށެވެ. އަދި އެގޮތަށް އުނި އިތުރު އައިސްފައި ވަނީ މުސާރަ ޝީޓުގެ އަދަދުތައް އިސްފަސްވެފައި ވުމުގެ ސަބަބުން ކަމަށް ބުންޏެވެ.
އެގޮތުން، ބައެއް މުވައްޒަފުންނަށް ބޮޑެތި އަދަދަތުތައް ޖަމާވެފައި ހުރި އިރު އަނެއްބައި މުވައްޒަފުންނަށް ޖަމާވެފައި ހުރީ ލިބެންވާވަރަށްވުރެ މަދުން ކަމަށް މިނިސްޓްރީން މައުލޫމާތު ދެއެވެ. އަދި ދާއިރާގައި މަސައްކަތް ކުރާ ޑޮކްޓަރުންނާއި އެހެނިހެން މުވައްޒަފުންވެސް ލިސްޓުގައި ހިމެނޭ ކަމަށް ބުންޏެވެ.
މިނިސްޓްރީން ބުނީ އެކަން ހައްލުކުރުމަށް މުސާރަ އުނިވެފައިވާ މުވައްޒަފުންނަށް އެ ފައިސާ ދިނުމާއި، އިތުރުވެފައިވާ މުވައްޒަފުންގެ ފަރާތުން ފައިސާ އަނބުރާ ހޯދުމުގެ މަސައްކަތް ކުރަމުން ދާކަމަށް ބުންޏެވެ. އަދި އެ މަސައްކަތް ކުރުމަށް އެއްވެސް މުވައްޒަފެއްގެ އެކައުންޓު ފްރީޒް ކުރުމަށް މިނިސްޓްރީން އަންގާފައި ނުވާނެ ކަމަށް ބުންޏެވެ.