އދ ގެ އާންމު މަޖިލީހުގެ 79 ވަނަ ޖަލްސާގައި ރައީސުލްޖުމްހޫރިއްޔާ ޑރ. މުހަންމަދު މުއިއްޒު ސާބިތުކޮށްދެއްވީ ރާއްޖެ އަކީ ކުޑަ ގައުމަކަށް ވިޔަސް ބަސް ބުނަން ކެރޭ ގައުމެއްކަން ކަމަށް ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެ އެވެ.
ރައީސުލްޖުމްހޫރިއްޔާ އދ ގެ އާންމު މަޖިލީހުގައި ބައިވެރިވެވަޑައިގަތުމަށް ރައީސް ނިއުޔޯކަށް ކުރެއްވި ދަތުރުފުޅު ނިންމަވާލެއްވުމަށް ފަހު ރައީސް އެނބުރި ރާއްޖެ ވަޑައިގެންނެވީ މިއަދު އެވެ. އދ ގައި އެމަނިކުފާނު ދެއްވި ތަގުރީރުގައި ވަނީ ރާއްޖެ އަށް އެހީތެރިކަން ބޭނުންވާ ވަރަށް ގިނަ ދާއިރާތަކުގެ މައްޗަށް އަލިއަޅުއްވާލައްވާފަ އެވެ. މީގެ އިތުރަށް ފަލަސްތީނު ރައްޔިތުންގެ ހައްގުގައި ވެސް އެމަނިކުފާނު ވަކާލާތު ކުރެއްވި އެވެ.
އެކަމާ ގުޅޭގޮތުން ގާސިމް އިބްރާހިމް ކުރެއްވި ޓުވީޓުގައި ވަނީ އެމަނިކުފާނާި ޖުމްހޫރީ ޕާޓީގެ ނަމުގައި ރައީސްއަށް މަރުހަބާ ދަންނަވާފަ އެވެ. ގާސިމް ވިދާޅުވީ އދ ގެ ޢާންމު މަޖިލީހުގެ ސެޝަންތަކުގައި މީގެ ކުރީގައިވެސް ރާއްޖޭގެ ބައެއް ވެރީން ވަނީ ބައިވެރިވެވަޑައިގެން ރާއްޖެ ތަމްސީލް ކުރައްވާ ރާއްޖެއަށް ދިމާވެފައިވާ އެކި އެކި ގޮންޖެހުންތަކާއި، އަދި މުޅިދުނިޔެއަށް ދިމާވެފައިވާ އެކި އެކި ކަންތައްތަކާއި ގުޅޭ ގޮތުން އަޑު އުފުލާފައި ކަމަށެވެ. އެކަމަކު ރައީސް މުއިއްޒު އދ ގައި ދެއްވި ތަގުރީރުތަކަކީ ނުހަނު ވިސްނުންތެރިކަމާއި އެކު ވަރަށް ފުރިހަމަ އަދި އެހާމެ މުނާސަބުކޮށް ދެއްވި ތަގުރީރުތަކެއް ކަމަށް ގާސިމް ވިދާޅުވި އެވެ.
މި ސަރުކާރާ އިދިކޮޅު ބައެއް ފަރާތްތަކުން ރައީސްގެ މަސައްކަތްޕުޅާ ދެކޮޅަށް ވާހަކަދައްކަމުންދާތީ ގާސިމް ވަނީ އެކަމަށް ވެސް ފާޑު ވިދާޅުވެފަ އެވެ. އެގޮތުން ކުރީގެ ރައީސް އަބްދުﷲ ޔާމީންގެ ފާޑުކިޔުންތަކާ ގުޅިގެން ގާސިމް ވިދާޅުވީ އެއީ އދ ގައި ރާއްޖެ ތަމްސީލްކުރަން ކެރިވަޑައި ނުގެން ބޭފުޅެއް ކަމަށާއި، އެ ބޭފުޅާއަށް ރައީސް މުޢިއްޒުގެ ތަޤްރީރު އޮޅުން ފިލާވަޑައި ނުގަތްނަމަވެސް، ދުނިޔޭގެ ބޮޑެތި މީޑިއާތަކުގެ ފަލަ ސުރުޙީގައި އެމަނިކުފާނުގެ ތަގްރީރު ހިމެނިފައިވާ ކަމަށެވެ.
މީގެ އިތުރުން އދގެ ސަލާމަތީ މަޖިލީހުގެ ތަޅުމުގައި ތަޤުރީރު ކުރެއްވި ރާއްޖޭގެ ފުރަތަމަ ރައީސް އަކީވެސް އެމަނިކުފާނު ކަމަށް އެވަނީ ތާރީޚުގައި ލިޔެވިފައިވާތީ އެކަމަށް ވެސް ގާސިމް މަރުހަބާ ދެންނެވި އެވެ. އދ ގެ 79 ވަނަ ޢާންމު ބައްދަލުވުމުގެ ހަވާސާގައި ކުރިއަށް ދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން ރައީސް މުޢިއްޒު އިސް ދައުރެއް އަދާކުރެއްވި ކަން ވެސް ގާސިމް ފާހަގަކުރެއްވި އެވެ.
ރައީސް މުއިއްޒު އާންމު މަޖިލީހުގެ ބައްދަލުވުމުގައި ފަލަސްތީނުގެ ހައްގުގައި ދެއްކެވި ވާހަކަފުޅަށް ގާސިމް ވަނީ ތައުރީފް ކުރައްވާފަ އެވެ. އެގޮތުން ދުނިޔޭގެ އެހެން ގައުމުތަކުން ވެސް ތައުރީފާއި ތަރުހީބު ވެސް ލިބުނުކަން ފާޖަގަކުރައްވާ ގާސިމް ވަނީ އެކަމަށް މަރުހަބާ ވިދާޅުވެފަ އެވެ.