ނެދަރލޭންޑްސްގެ ވެރިރަށް
އެމްސްޓަޑެމުން ފެނިގެންދިޔަ ހަމަނުޖެހުންތަކަކީ، އިސްތިއުމާރީ އިސްރާއީލުން ޣައްޒާގައި
ހުއްޓާނުލާ ހިންގާ ގަތުލުއާންމުތަކުގެ ނަތީޖާ ކަމަށް ހަމާސްއިން ބުނެފިއެވެ.
ހަމާސްގެ އިސް
ލީޑަރެއް ކަމަށްވާ ސާމީ އަބޫ ޒުހްރީ ވިދާޅުވީ، އިސްރާއީލުން ޣައްޒާގައި ހިންގަމުންގެންދާ
ގަތުލުއާންމުތައް ހުއްޓުވަން ބައިނަލްއަގްވާމީ ގޮތުން އެއްވެސް ކަމެއް ނުކުރާއިރު،
އެމްސްޓަޑެމުން ފެނިގެންދިޔައީ އޭގެ ރައްދުގައި އާންމުންގެ ފަރާތުން ފެނިގެންދިޔަ
އަމަލުތަކެއް ކަމަށެވެ.
އެމްސްޓަޑެމްގައި
ބޮޑެތި ހަމަނުޖެހުންތައް ފެށުނީ، ޔޫރަޕިއަން ލީގްގައި އިސްރާއީލުގެ ފުޓްބޯޅަ ކްލަބެއް
ކަމަށްވާ މަކާބީ ތެލް އަވީވާއި، ނެދަރލޭންޑްސްގެ އަޔެކްސް ބައްދަލުކުރި މެޗް ބަލާލަން ދިޔަ އިސްރާއީލު ޓީމުގެ ސަޕޯޓަރުންނާއި، ޣައްޒާ
ހަނގުރާމައާ ދެކޮޅު އާންމުންނާ ދެމެދުގައެވެ.
މައްސަލަ ހޫނުވީ، އެމްސްޓަޑެމްގެ
މަގެއްގައި ހަރުކޮށްފައި ހުރި ފަލަސްތީނު ދިދައެއް އިސްރާއީލު ޓީމުގެ ސަޕޯޓަރަކު
ނައްޓައި އިރާލުމާ ގުޅިގެންނެވެ. މިމަންޒަރު ފެންނަ ވީޑިއޯތައް ސޯޝަލް މީޑިއާގައި
ދައުރުވަމުން ދެއެވެ.
މިކަމުގެ ރުޅީގައި، އެމްސްޓަޑެމްގެ
އާންމުން މަގުތަކަށް ނުކުމެ އިސްރާއީލު ސަޕޯޓަރުން ފަހައިދުވެ އަތުލައިގަނެ ގައިގައި ތަޅައި ބޮޑެތި
އަނިޔާތައްކޮށް އެތައްބަޔަކު ޒަޚަމްކޮށްލާފައި ވެއެވެ. އިސްރާއީލު ޓީމުގެ
ސަޕޯޓަރުންނަށް އަނިޔާކުރި މީހުންގެ ތެރޭގައި ރުޅިއައިސްފައިވާ އެމްސްޓަޑެމްގެ މުސްލިމުންވެސް
ހިމެނެއެވެ. އެމްސްޓަޑެމްގެ މުޅި އާބާދީގެ 10 އިންސައްތައަކީ އަރަބި ނަސްލުގެ މުސްލިމުން ކަމަށް ވެއެވެ.
ފަލަސްތީނު ދިދަތައް ނައްޓައި
އިރާލުމުގެކުރިން އިސްރާއީލު ޓީމުގެ 2،700 އެއްހާ ސްޕޯޓަރުން ގެންދިޔައީ، އެމްސްޓަޑެމްގެ
މަގުތަކުގައި އެއް އަޑަކުން ގޮވެލިފަތިތައް ގޮވަމުންނެވެ.
ފުޓްބޯޅަ ޓީމަށް
ސަޕޯޓުކުރުމުގެ ބަދަލުގައި އިސްރާއީލު ސަޕޯޓަރުން ގޮވަމުންދިޔައީ، އަރަބީން
މެރުމަށާއި، ޣައްޒާގައި ސްކޫލެއް ނެތީ ހުރިހާ ކުޑަކުދިން މަރާލުމުން ކަމަށް ގޮވައި
މަލާމާތްކޮށް އަދި ފަލަސްތީނު ދިދަތައް ވީދައި ކުދިކުދިކޮށްލުމަށްވެސް
ގޮވަމުންނެވެ.
މިކަމުގައި،
ފަލަސްތީނަށް ތާއީދުކުރާ މީހުންގެ ބޮލުގައި އިލްޒާމު އެޅުވުމަށް އިސްރާއީލާއި، ނެދަރލޭންޑްސްއާއި
ޔޫރަޕްގެ ބައެއް ގައުމުތަކުގެ ވެރިން ތަފާތު ބަޔާންތައް ނެރުނު ނަމަވެސް، ހަގީގަތަކީ
އެއީ ނޫންކަމަށް އެތައް މީޑިއާ ރިޕޯޓެއް ބުނަމުން އެބަދެއެވެ. އަދި އެކަމުގެ ހެކިވެސް
ދައްކަމުން އެބަގެންދެއެވެ.
ފަލަސްތީނުގެ
ދިދަތައް ހަރުކޮށްފައި ހުރި ގެތަކާއި އަދި ފަލަސްތީނަށް ތާއީދުކުރާ މީހުންނަށް،
އިސްރާއީލު ޓީމުގެ ސަޕޯޓަރުން ދިޔައީ ބުދަ ދުވަހުން ފެށިގެން ހަމަލާ ދެމުންކަމަށް،
ހެއްކާއެކު މީޑިއާއިން ހާމަކުރަމުން އެބަގެންދެއެވެ.
ހަމަނުޖެހުންތައް
ބޮޑުވުވުމާ ގުޅިގެން ނެދަރލޭންޑްސް ސަރުކާރުން ފުލުހުން މަގުތަކަށް ނެރެ،
މިހާތަނަށް 62 މީހަކު ހައްޔަރުކޮށްފައިވެސް ވެއެވެ. އަދި އިސްރާއީލުން ވަނީ ކާގޯ
ފްލައިޓްތައް ފޮނުވައި، ފުޓްބޯޅަ ޓީމުގެ ސަޕޯޓަރުން އަނބުރާ އިސްރާއީލަށް އުފުލަން
ފަށާފައެވެ.
ފަލަސްތީނު
ސަރުކާރުން ނެރުނު ބަޔާނެއްގައި، އަރަބީން މެރުމަށާއި، ފަލަސްތީނު ދިދަތައް ވީދައި
ހަލާކުކުރުމަށް އިސްރާއީލު މީހުން ގޮވި މައްސަލަ ވަރަށް ބޮޑަށް ކުށްވެރިކޮށް،
އެކަން ކުރި މީހުންގެ މައްސަލަ ތަހްގީގުކޮށް އަދަބި ދިނުމަށް ނެދަރލޭންޑްސް
ސަރުކާރަށް ގޮވާލާފައި ވެއެވެ.
އަދި ނެދަރލޭންޑްސްގައި
ދިރިއުޅޭ ފަލަސްތީނު ރައްޔިތުންނާއި، އަރަބީން، އިސްރާއީލުގެ ވަޒަންވެރިންނާއި، އިސްރާއީލު
ސިފައިންގެ ކިބައިން ރައްކާތެރިކޮށް ދިނުމަށްވެސް ފަލަސްތީނު ސަރުކާރުގެ
ބަޔާނުގައި ގޮވާލާފައި ވެއެވެ.