މަތިވެރި ދާއިރާގައި ހިނެނޭ ރަށްތަކުގައި ވެރިކަންކުރާ ޕީއެންސީގެ ސަޕޯޓް އޮތީ އޭނާއަށް ކަމަށް އެ ދާއިރާގެ މެމްބަރު ހަސަން ޒަރީރު ވިދާޅުވެއްޖެއެވެ.
ޒަރީރު މިއަދު ވަނީ އަމިއްލަގޮތުން އެ ދާއިރާއަށް ވާދަކުރެއްވުމަށް އިލެކްޝަންސް ކޮމިޝަނަށް މިއަދު ފޯމު ހުށަހަޅުއްވާފައެވެ. އެ ދާއިރާއަށް ޕީއެންސީން ވާދަކުރައްވަނީ އަބްދުﷲ ލުތުފީއެވެ.
ދާދިފަހުން އެމްޑީޕީން ޕީއެންސީއާ ގުޅިވަޑައިގަތް މެމްބަރުންގެ ތެރޭގައި ހިމެނިވަޑައިގަންނަވާ ޒަރީރު މިއަދު ވިދާޅުވީ އެ ދާއިރާގެ ރަށްތަކުގެ ޕީއެންސީގެ ސަޕޯޓަރުން ތާއީދު ކުރަނީ އޭނާއަށް ކަމަށެވެ. އަދި ފަސޭހަކަމާއެކު އެ ގޮނޑި ދިފާއު ކުރައްވާނެ ކަމަށް ވެސް އޭނާ ވިދާޅުވިއެވެ.
މީގެއިތުރުން ދާދިފަހުން އެމްޑީޕީން ޕީއެންސީއާ ގުޅިވަޑައިގެންނެވި ކުރެންދޫ ދާއިރާގެ މެމްބަރު އަބްދުލްޣަނީ އަބްދުލްހަކީމް ވެސް ވަނީ އެ ދާއިރާއަށް އަމިއްލަގޮތުން ވާދަކުރައްވަން ފޯމު ހުށަހަޅުއްވާފައެވެ.
ކުރެންދޫ ދާއިރާއަށް ސަރުކާރު ހިންގާ ޕީއެންސީން ވާދަކުރައްވަނީ އާދަމް ތައުފީގެވެ. ޣަނީ ވެސް އެ ދާއިރާއަށް ތާއީދު ކުރައްވަނީ އޭނާއަށް ޕީއެންސީގެ މެމްބަރުންގެ ސަޕޯޓް އޮތް ކަމަށް ވިދާޅުވެއެވެ.