ބެންގަލޫރު، އިންޑިއާ (އޭޕްރީލް 3) - އިންޑިއަން ޕްރިމިއާ ލީގު (އައިޕީއެލް) ކްރިކެޓް މުބާރާތުގައި ރޭ ކުޅުނު މެޗުގައި ގުޖުރާތު ޓައިޓަންސް އިން އަށް ވިކެޓުން ރޯޔަލް ޗެލެންޖާސް ބެންގަލޫރު ބަލިކޮށްފި އެވެ.
މިއީ، މި ފަހަރުގެ މުބާރާތުގައި ބެންގަލޫރު ބަލިވި ފުރަތަމަ މެޗެވެ.
މި ފަހަރުގެ މުބާރާތުގައި ބެންގަލޫރުން ކުޅުނު ފުރަތަމަ މެޗުގައި ވަނީ ކަލްކަތާ ނައިޓް ރައިޑާސް ބަލިކޮށްފަ އެވެ. އަދި، ދެ ވަަނަ މެޗުގައި ޗެންނާއި ސުޕަ ކިންގްސް ބަލިކުރި ނަމަވެސް ތިން ވަނަ އަށް ކުޅުނު މެޗުގައި އަމިއްލަ ދަނޑުގައި ގުޖުރާތުގެ އަތްދަށުވީ އެވެ.
ބެންގަލޫރުގެ ޗިންނަސްވާމީ ސްޓޭޑިއަމްގައި ރޭ ކުޅުނު މެޗުގައި، ޓޮސް ދިމާވުމުން ގުޖުރާތުން ނިންމީ ފީލްޑް ކުރުމަށެވެ.
ކުޅެން އަރައި، ބެންގަލޫރުން 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ކުރެވުނީ، 169 ލަނޑެވެ. ބެންގަލޫރު ޓީމަށް އެންމެ ރަނގަޅު ކުޅުމެއް ދައްކައިިދިނީ، 54 ލަނޑަށް ނުބައިވި ލިއަމް ލިވިންސްޓޯން އެވެ. ބެންގަލޫރުގެ އޯޕަނިން ބެޓްސްމަނުން ގޮތުގައި އެރި، ފިލް ސޯލްޓް ނުބައިވީ 14 ލަނޑަށެވެ. އަދި، ވިރާތު ކޯލީ ނުބައިވިއިރު ހެދުނީ އެންމެ ހަތް ލަނޑެވެ.
މި އިނިންގްސްގައި، ގުޖުރާތުގެ މުހައްމަދު ސިރާޖު ތިން ވިކެޓް ނެގި އެވެ. އޭނާ އަކީ މިދިޔަ އަހަރުތަކުގައި ބެންގަލޫރުގެ ކުޅުންތެރިއެކެވެ.
ޖަވާބުގައި ކުޅެން އަރައި، ގުޖުރާތު މޮޅުވީ، 17.5 އޯވަރުގެ ތެރޭގައި ދެ ކުޅުންތެރިން ނުބައިވިއިރު، 170 ލަނޑު ހަމަކޮށްގެންނެވެ. ގުޖުރާތު ޓީމަށް އެންމެ ރަނގަޅު ކުޅުމެއް ދައްކައިދިނީ، ނުބައިނުވެ، 39 ބޯޅައިން 73 ލަނޑު ހެދި ޖޯޝް ބަޓްލާ އެވެ. މިއީ، މި ފަހަރުގެ އައިޕީއެލްގައި ބަޓްލާގެ އެންމެ ރަނގަޅު މެޗެވެ. ގުޖުރާތުގެ ސައި ސުދަރުސަން ނުބައިވީ، 36 ބޯޅައިން 49 ލަނޑަށެވެ.