މިދިޔަ ބުދަ ދުވަހުގެ ރޭ ތ. އަތޮޅުގައި ދަތުރުކުރަމުންދިޔަ "ހޮޅުދޫ ބޯޓު"ގައި ހިނގި އަލިފާނުގެ ހާދިސާގެ ސަބަބުން ގާތްގަނޑަކަށް ހަތަރު މިލިއަން ރުފިޔާގެ ގެއްލުން ލިބުނު ކަމަށާއި ނަމަވެސް، ލިބުނު އެންމެ ބޮޑު ގެއްލުމަކީ އެ ބޯޓުން ދަތުރުކުރި މީހަކު ގެއްލުން ކަމަށް ހޮޅުދޫ ބޯޓުގެ ވެރިޔާ އަބްދުލް ވާހިދު އަބްދުއްލަތީފު ބުނެފިއެވެ. މި ހާދިސާއާ ގުޅިގެން "ސަން"އާ ވާހަކަ ދައްކަމުން މިރޭ އަބްދުލް ވާހިދު ބުނީ، އެ ދަތުރަކީ ތ. ހިރިލަންދޫން ފުރައިގެން މާލެ އައި ދަތުރެއް ކަމަށެވެ. މި ދަތުރު ކުޑަ އީދުތެރެއާ ދިމާވުމުން ބޯޓަށް މާ ގިނަ މުދާ އަރުވާފައި ނެތް ކަމަށް އޭނާ ބުންޏެވެ. އެހެން ނަމަވެސް ގާތްގަނޑަކަށް 170 ވަރަކަށް ގޭސްހުސްކުރި ފުޅި ބޯޓުގައި ހުއްޓެވެ. ހޮޅުދޫ ބޯޓުގައި އަލިފާން ރޯވެފައި: އެމްއެންޑީއެފުން ވަނީ އަލިފާން ނިއްވަން މަސައްކަތް ކުރަމުން ދާ ކަމަށް ބުނެފައި -- ފޮޓޯ/ އެމްއެންޑީއެފް "އެހެންޏާ ވަރަށް ގިނައިން މަސް ގެންނާނެ. އެ ކަމަކު އެ ދަތުރުގައި [ބޯޓަށް އަރުވާފައި ހުރީ] ހަތް ބަސްތާ މަހާއި ވެކިއުމް މަހުގެ ފަސް ފޮށި. މިރުސް ދެން ފުދޭވަރަކަށް ހުރި. އެކަމު އީދުތެރެއާ ދިމާވުމުން އެހެން ފަހަރު ފަހަރަށްވުރެ މިރުސް [އަރުވާފައި ހުރި މިންވަރު] ވެސް މަދު" އަބްދުލް ވާހިދު ބުންޏެވެ. "އަޅުގަނަޑުމެންނަށް އެންމެ ބޮޑު ގެއްލުމެއްގެ ގޮތުގައި ސިފަކުރެވެނީ ބޯޓުން ދަތުރުކުރި މީހަކު ގެއްލުން. އެއީ ދެން އެންމެ ބޮޑު ގެއްލުމަކީ" އޭނާ ބުންޏެވެ. ގެއްލިގެން ހޯދާ މުޝްފިގް: އޭނާ ހޯދުމަށް ކޯސްޓްގާޑާއި އެ ސަރަހައްދުގެ ގިނަ އުޅަނދުތަކެއް ދަނީ ހަރަކާތްތެރިވަމުން -- ފޮޓޯ/ މުފްލިހް މުހައްމަދު، ފޭސްބުކް އެ ބޯޓުން ދަތުރުކުރި 18 މީހުންގެ ތެރެއިން އެކަކު ފިޔަވައި ދެން ތިބި އެންމެން ވަނީ ސަލާމަތްކޮށްފައެވެ. ސަލާމަތްވުމަށް ބޯޓުން ކަނޑަށް ފުންމައިލި ލ. މާވަށަށް އުފަން 25 އަހަރުގެ އަލީ މުޝްފިގު ޝަރީފު ހޯދުމުގެ މަސައްކަތް ކުރަމުންދިޔަ ނަމަވެސް އަދި މިހާތަނަށް އެ މަސައްކަތް ކާމިޔާބުވާގޮތެއް ނުވެއެވެ. https://sun.mv/204399 އަބްދުލް ވާހިދު ބުނީ ބޯޓުގައި ރޯވާން މެދުވެރިވީ ކަރަންޓު ޝޯޓޭޖެއްގެ ސަބަބުން ކަމަށެވެ. އެ ވަގުތު ބޯޓުގައި ހިންގާފައި ހުރީ ވެސް އާންމުކޮށް ބޭނުންކުރާ ބޮޑު ޖެނަރޭޓަރު ނޫން ކަމަށާއި، އަލިފާން ރޯވީ އޭގައި ކަމަށް އޭނާ ވަނީ ކިޔައިދީފައެވެ. އެ ޖެނަރޭޓަރު ބަހައްޓާފައި ހުންނަނީ ބޯޓުގެ ފަހަތުގައި ގުދަނެއް ގޮތަށް ހަދާފައި ހުންނަ ތަންކޮޅެއްގައެވެ. އެ ތަނަކީ ދޮރެއް ވެސް ނުހުންނަހެން، ވައި ވަންނަ ގޮތަށް، ހަދާފައި ހުންނަ ތަނެކެވެ. ބޯޓުގައި ހުންނަ ދެ ފާހާނާ ހުންނަނީ އެ ގުދަނާ ޖެހިގެންކަމަށް އޭނަ މައުލޫމާތު ދިނެވެ. ވެރިމީހާ ކިޔައިދިން ގޮތުގައި ބޯޓުގައި ރޯވީ ހިރިލަންދޫން ފުރައިގެން ކަނޑޫދޫ ފަސްދިން ހިސާބުންނެވެ. އެއީ ދަތުރު ފެށިތާ އެންމެ 45 ވަރަށް މިނެޓު ފަހުން، އެ ރޭގެ 20:57 ހާއިރެވެ. ބޯޓުގައި ރޯވިއިރު، ފަސިންޖަރުންނަށް ތިބީ ނުވަ ބިދޭސީންނެވެ. މި ހާދިސަ ހިނގިއިރު އަބްދުލް ވާހިދު ހުރީ މާލޭގައި ކަމަށް އޭނާ ބުންޏެވެ. އޭނާ ބުނީ އެލާޓެއް އައިސްގެން ފޯނު ބަލައިލިއިރު، ބޯޓުގެ ބެޓެރި ޑައުންވި ކަމަށް ދެއްކި ކަމަށެވެ. އެ ބޯޓުގައި ހުންނަ ދެ ބެޓެރި ސެޓު ވެސް އައުކުރީ ވަރަށް ފަހުން ކަމަށާއި، އެހެންވެ ބެޓެރި ޑައުންވުމުން ކަމެއް ގޯސްވީކަން އެނގުނު ކަމަށާއި ވަގުތުން ބޯޓަށް ގުޅި ކަމަށް އޭނާ ކިޔައިދިނެވެ. ބޯޓުގައި އަލިފާން ރޯވުމާއެކު އެ ސަރަހައްދުން ދަތުރުކުރަމުންދިޔަ ލޯންޗަކާއި ޑިންގީއަކަށް އެ މަންޒަރު ފެނިގެން އައިސް އެހީތެރިކަން ފޯރުކޮށްދިން ކަމަށް އަބްދުލް ވާހިދު ބުންޏެވެ. އަދި ކުޑަވަގުތުކޮޅެއްގެ ތެރޭ ފުލުހުންނާއި ސިފައިން ވެސް އައި ކަމަށް ބުންޏެވެ. މި ހާދިސާގެ ވަގުތުގައި ފުލުހުންނާ ސިފައިންގެ ފަރާތުން ދިން އަވަސް ޚިދުމަތް ފާހަގަކޮށް އޭނާ ވަނީ ޝުކުރު އަދާކޮށްފައެވެ. "ހޮޅުދޫ ބޯޓު" އަނދާ ހުލިވިއިރު، ބޯޓު އެހެލައިގެން ވަރަށް ފަހުން ވަނީ ބޮޑެތި މަރާމާތުތަކެއް ވެސް ކޮށްފައެވެ. މި ހާދިސާ ހިނގީ މަރާމާތަށްފަހު ކުރި ދެވަނަ ދަތުރުގައެވެ. އަލިފާނުގެ ހާދިސާގައި 92 ފޫޓުގެ ހޮޅުދޫ ބޯޓު އެއްކޮށް އަނދައި ހުލިވިއެވެ. "ސަން"އާ ވާހަކަ ދައްކަމުން އަބްދުލް ވާހިދު ވަނީ ބޯޓު އިންޝޫރެންސް ކޮށްފައިވާކަމާއި އިންށޫރެންސް ކުރުމުގެ މުހިންމުކަން ފާހަގަކޮށްފައެވެ. އޭނާ ބުނީ އިންޝޫރެންސް ކުންފުނިން އިސްވެ އޭނާއަށް ގުޅައި، ކުރަންޖެހޭ ކަންކަން ކުރަމުން ގެންދާ ކަމަށެވެ. އެ ކަމުގައި އިންޝޫރެންސް ކުންފުނިން ދެމުން ގެންދާ އަހަންމިއްޔަތުކަން އޭނާ ވަރަށް ބޮޑަށް ފާހަގަކުރިއެވެ. ހޮޅުދޫ ބޯޓު ދަތުރުކުރަން ފެށީ 2009ވަނަ އަހަރެވެ. އެންމެ ފުރަތަމަ އުތުރުގެ ރަށްތަކަށް ދަތުރު ކުރުމަށް ފަހު، މި ފަހުން އެ ބޯޓު ދަތުރުކުރަމުން ދިޔައީ ލ. އަތޮޅާއި ތ. އަތޮޅުގެ ރަށްތަކަށެވެ.