އިންޑިއާއާއެކު އޮންނަ ގުޅުމަށް ބުރޫއަރާނެ ކަމެއް ރާއްޖެއިން ނުކުރާނެ ކަމަށް ފޮރިން މިނިސްޓަރު ޑރ. އަބްދުﷲ ހަލީލު ވިދާޅުވެއްޖެ އެވެ.
އިންޑިއާ އަށް މިހާރު ކުރައްވަމުން ގެންދަވާ ރަސްމީ ދަތުރުގެ ތެރެއިން އެގައުމުގެ "ވިއޮން" ނޫހަށް ދެއްވި އިންޓަވިއުއެއްގައި ހަލީލު ވިދާޅުވީ ރާއްޖެއިން އެހެން ގައުމުތަކާ އެކު ވެސް ތަފާތު އެކި ދާއިރާތަކުން ގުޅުން ބަދަހިކުރަމުންދާ ކަމަށާއި ނަމަވެސް އިންޑިއާ އާއި ރާއްޖެއާ ދެމެދު އޮންނަނީ ވަރަށް ތާރީހީ ގާތް ގުޅުމެއް ކަމަށެވެ.
އެގޮތުން އިންޑިއާ އެކު އޮންނަ ގުޅުމަށް ރާއްޖެއިން އަބަދުވެސް ފުރަތަމަ އިސްކަންދޭނެ ކަމަށާއި އެހެން ގައުމުތަކާއި ރާއްޖެއާ ދެމެދު އޮންނަ ގުޅުމެއްގެ ސަބަބުން އިންޑިއާއާ އެކު އޮންނަ ގުޅުމަށް ބުރޫ ނާރާނެ ކަމަށް ހަލީލު ވިދާޅުވި އެވެ.
އިންޑިއާ އަކީ ރާއްޖޭގެ އެންމެ ގާތް އެކުވެރިޔާ އަދި އަވައްޓެރިޔާ. ރާއްޖެއަށް ބޭނުންޖެހޭ ކޮންމެ ހާލަތެއްގައި ވެސް އިންޑިއާ އަކީ އަބަދުވެސް އެންމެ ފުރަތަމަ އިޖާބަދޭ ގައުމު،" ހަލީލު ވިދާޅުވި އެވެ.
ހަލީލު ވަނީ މިފަދަ ކަންކަމުން ރާއްޖެ އާއި އިންޑިއާއާ ދެމެދު އޮތް ގުޅުމުގެ ވަރުގަދަކަން ދައްކުވައިދޭ ކަމަށާއި އިންޑިއާ އަށް އަންނަ ތަރައްގީގެ ހެޔޮ އަސަރު ރާއްޖެ އާއި އަވަށްޓެރި ގައުމުތަކަށް ވެސް ކުރާނެ ކަމަށް ވިދާޅުވެފަ އެވެ.
މިއީ މަގާމާއި ހަވާލުވެވަޑައިގެންނެވި ފަހުން ހަލީލު އިންޑިއާ އަށް ކުރެއްވި ފުރަތަމަ ރަސްމީ ދަތުރުފުޅެވެ.
މި ސަރުކާރު އައި ފަހުން ރާއްޖެ އާއި އިންޑިއާގެ ގުޅުން ކޮންމެވެސް ވަރަކަށް ވަނީ ހީނަރުވި އެވެ. އެއީ އިންޑިއާ އާއި އެގައުމުގެ ބޮޑުވަޒީރު ނަރެންދްރަ މޯދީ އަށް ނިސްބަތްވާ ގޮތަށް މި ސަރުކާރުގެ ތިން ޑެޕިއުޓީ މިނިސްޓަރަކު ބަދު ބަސް ވިދާޅުވެ، ފުރައްސާރަ ކުރެއްވި މައްސަލައިގަ އެވެ. އެއާ އެކީގައި ދިވެހި ސަރުކާރުން ވެސް އަވަސް ފިޔަވަޅުތަކެއް އަޅައި ތިން ޑެޕިއުޓީ މިނިސްޓަރުން ސަސްޕެންޑް ކުރި އެވެ.
ނަމަވެސް ފަހަކަށް އައިސް ރާއްޖެ އާއި އިންޑިއާގެ ގުޅުން ވަނީ ވަރަށް ބޮޑަށް ރަނގަޅުވާން ފަށައިފަ އެވެ. އެގޮތުން ކުރީ ސަރުކާރުން އިންޑިއާ މެދުވެރިކޮށް ނެގި 200 މިލިއަން ޑޮލަރުގެ ލޯނެއްގެ ތެރެއިން 100 މިލިއަން ދެއްކުން އެއް އަހަރަށް ދާދިފަހުން އިންޑިއާ އިން ވަނީ ފަސްކޮށްދީފަ އެވެ.
މީގެއިތުރުން މިދިޔަ އޮކްޓޫބަރު މަހު ތެރޭ ރައީސް މުއިއްޒު ވަނީ އިންޑިއާ އަށް ރަސްމީ ދަތުރުފުޅެއް ވެސް ކުރައްވާފަ އެވެ.