އައްޑޫ ސިޓީގެ ހިތަދޫ، ހުޅުމީދޫ އަދި މީދޫ ގުޅުވާލުމަށް ރާވާފައިވާ ބްރިޖް މަޝްރޫޢުގެ ކޮންސަލްޓެންސީ ޚިދުމަތްތައް ހޯދުމުގެ އެއްބަސްވުމުގައި މިއަދު ސަރުކާރުން ސޮއިކޮށްފިއެވެ.
މި އެއްބަސްވުމަކީ، މި ބޮޑު މަޝްރޫޢުގެ ކުރިއަށް އޮތް ފިޔަވަހިތަކަށް ބޭނުންވާ މައިގަނޑު ސަރވޭތަކާއި ޑިޒައިން މަސައްކަތްތައް ފެށުމަށް އަޅާ މުހިންމު ފިޔަވަޅެކެވެ.
އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ މިއަދުއެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ، ޑރ. ޢަބްދުﷲ މުއްޠަލިބް އެވެ. އަދި ކޮންސަލްޓެންސީ ޚިދުމަތް ދިނުމަށް ހަވާލުކުރެވުނު ޓީ.ވައި. ލިންގ އިންޓަރނޭޝަނަލް (ޗައިނާ) ގެ ފަރާތުން ސޮއިކުރެއްވީ އެ ކުންފުނީގެ ރައީސް މިސްޓަރ ޗެން ޝިއާއޯހޫ އެވެ.
މި ކޮންސަލްޓެންސީ ޚިދުމަތުގެ ދަށުން ހިމެނޭ މައިގަނޑު މަސައްކަތްތަކުގެ ތެރޭގައި އެ ސަރަހައްދުގައި ބްރިޖެއް އެޅުމަށް ބޭނުންވާ ޒަމާނީ ސަރވޭތައް ހެދުމާއި، ޕްރޮޖެކްޓްގެ ޑިޒައިން ތަރައްޤީކުރުމާއި، ޓެކްނިކަލް ސްޕެސިފިކޭޝަންތައް އެކުލަވައިލުން ހިމެނެއެވެ. މީގެ އިތުރުން، ބިނާކުރުމުގެ މަސައްކަތްތަކަށް ބީލަމަށް ހުޅުވާލުމަށް ބޭނުންވާ ޓެންޑަރ ޑޮކިއުމެންޓްތައް ތައްޔާރުކުރުމުގެ މަސައްކަތް ވެސް މި ކޮންޓްރެކްޓްގެ ދަށުން ކުރިއަށްދާނެއެވެ.
މިކަމާގުޅިގެން ވާހަކަފުޅުދައްކަވަމުން ވަޒީރު ޑރ. ޢަބްދުﷲ މުއްޠަލިބް ވިދާޅުވީ، ކޮންސަލްޓަންޓާ ހަވާލުކޮށްފައިވާ މައިގަނޑު މަސައްކަތަކީ، އައްޑޫ ސިޓީއަށް އެންމެ އެކަށޭނަ ގޮތަކީ ކޮބައިތޯ ބެލުމާއި، ދަތުރުފަތުރުގެ އެންމެ އެކަށީގެންވާ ކޮންސެޕްޓެއް ކަނޑައެޅުން ކަމަށެވެ. އަދި "އެކަމަށް ހިނގާނެ ޚަރަދުތަކުގެ އިތުރަށް ބިޑް ޑޮކިއުމަންޓް ތައްޔާރުކުރުމަށް ބޭސަންވާ މަޢުލޫމާތު ތައްޔާރުކުރުމުގެ މަސައްކަތް" ހިމެނޭކަމަށް ވިދާޅުވިއެވެ. ވަޒީރު އިތުރަށް ވިދާޅުވީ، މި މަސައްކަތުގެ ތެރެއިން ދަތުރުފަތުރުގެ ތަފާތު ނިޒާމުތަކަކަށް ސަރވޭކުރަމުންދާނެކަމަށެވެ.
އައްޑޫ ސިޓީގެ ތިން ރަށް ކަމަށްވާ ހިތަދޫ، ހުޅުމީދޫ، އަދި މީދޫ ގުޅުވާލުމަކީ އެ ސިޓީގެ އިޤްތިޞާދީ އަދި އިޖްތިމާޢީ ތަރައްޤީއަށް ވަރަށް ބޮޑަށް ބަދަލުތައް ގެނުވާނެ މަޝްރޫޢެކެވެ. މި އެއްބަސްވުމާއެކު މި ބިޔަ މަޝްރޫޢުގެ މަސައްކަތްތައް އިތުރަށް ހަލުވިވެގެންދާނެ ކަމަށް ބެލެވެއެވެ، އަދި ކުރިއަށް އޮތް މަސްތަކުގެ ތެރޭގައި ޕްރޮޖެކްޓްގެ ފުރިހަމަ ޑިޒައިނާއި ތަފްޞީލުތައް ފާޅުވެގެންދާނެއެވެ.