ޕީޕީއެމްގެ ޕްރައިމަރީގައި ވާދަކުރެއްވުމަށްޓަކައި އެޕާޓީގެ ކުރީގެ އިންތިޤާލީ ނައިބު ރައީސް އުމަރު ނަސީރު ހުށަހަޅަންޖެހޭ ލިޔެކިޔުންތައް ޕީޕީއެމްގެ އޮފީހަށް މިއަދު ހުށަހަޅައިފިއެވެ.
ވީނިއުސްއަށް މިއަދު މައުލޫމާތު ދެއްވަމުން ޕީޕީއެމްގެ ކައުންސިލްގައި ހިމެނިވަޑައިގަންނަވާ އުމަރުގެ އަރިސް ބޭފުޅެއް ކަމުގައިވާ މާޒު އަޙްމަދު ސަލީމް ވިދާޅުވީ ޕީޕީއެމްގެ ރިޔާސީ ޕްރައިމަރީގައި ވާދަކުރެއްވުމަށް މިއަދު 3:15 އެހާއިރު އުމަރު ލިޔެކިޔުންތައް ޕާޓީގެ އޮފީހަށް ހުށަހަޅާފައިވާ ކަމަށެވެ.
އުމަރު ލިޔެކިޔުންތައް ހުށަހަޅާފައި މިވަނީ އުމަރުގެ ޓީމުން ޕީޕީއެމްގެ ރިޔާސީ ޕްރައިމަރީގައި ވާދަކުރެއްވުމަށް ފަހުވަގުތު ނިކުންނަވާނީ ޕީޕިއެމްގެ ރައީސް އަލްއުސްތާޛު މައުމޫން އަބްދުލް ޤައްޔޫމުގެ ޅިޔަނު އިލްޔާސް އިބްރާހިމް ކަމަށް ބައެއް ފަރާތްތަކުން ބުނަމުން ދަނިކޮށެވެ.
މާޒް ސަލީމް ވިދާޅުވީ އުމަރުގެ ކެމްޕޭން ހަރަކާތްތައް މިހާރު ޕްލޭން ކުރެވިފައިވާ ކަމަށާ، އިންތިހާބުގެ ކުރިން ވީހާވެސް ގިނަ ރަށްތަކަކަށް އުމަރު ޒިޔާރަތް ކުރައްވާނެ ކަމަށެވެ.
ޕީޕީއެމްގެ ރިޔާސީ ޕްރައިމަރީގައި އުމަރު ވާދަކުރެއްވުމަށް ލިޔެކިޔުންތައް ހުށަހަޅާފައިވާ ކަމަށް އެޕާޓީގެ އިންތިހާބީ ކޮމިޓީންވެސް ވަނީ ވީނިއުސްއަށް ޔަޤީންކޮށްދެއްވާފައެވެ.
އުމަރު ލިޔެކިޔުންތައް ހުށަހެޅުއްވި ނަމަވެސް ޕްރައިމަރީގައި އޭނާއާއި ވާދަކުރައްވާނެ ކަމަށް ބެލެވޭ ޕީޕީއެމްގެ ޕާލިމެންޓްރީ ގުރޫޕުގެ ލީޑަރު އަބްދުﷲ ޔާމީން އަދި މިހާތަނަށް ޕްރައިމަރީގައި ވާދަކުރެއްވުމަށް ލިޔެކިޔުންތައް ހުށަހަޅާފައެއް ނުވެއެވެ.
ޕީޕީއެމްގެ ރިޔާސީ ޕްރައިމަރީގައި ވާދަކުރަން ބޭނުންވާ ފަރާތްތަކަށް އެފުރުސަތު ހުޅުވާލާފައިވަނީ މިމަހުގެ 28 ވަނަ ދުވަހުގެ ނިޔަލަށެވެ.
މިއަހަރު ބާއްވާ ރިޔާސީ އިންތިހާބު އޮންނާނީ ސެޕްޓެމްބަރު މަހުގެ 7 ވަނަ ދުވަހު އެވެ.
ވިލާ ކޮލެޖުން ރާއްޖޭގައި އެކި ބާވަތުގެ ދިރާސާތައް ކުރުމަށް އިންސްޓިޓިއުޓެއް އުފައްދައިފިއެވެ.
ވީޓީވީގެ ފަސްމަންޒަރު ޕްރޮގްރާމްގައި ރޭ ވާހަކަ ދައްކަވަމުން ވިލާ ކޮލެޖުގެ ރެކްޓަރ ޑރ. އަޙްމަދު އަންވަރު ވިދާޅުވީ މި އިންސްޓިޓިއުޓް އުފައްދާފައިވަނީ މިދިޔަ ނޮވެމްބަރު މަހު ކަމަށެވެ.
ޑރ އަންވަރު ވިދާޅުވީ މިހާތަނަށް މި އިންސްޓިޓިއުޓުން ގިނަ މަސައްކަތްތަކެއް ފަށާފައިވާ ކަމަށާއި އަދި ދުނިޔެ ޤަބޫލުކުރާ ފެންވަރުގެ ދިރާސާތައް ކުރުމަށާއި އެފަދަ ދިރާސާތައް ކުރުމަށް ދިވެހިން ތަމްރީނު ކުރުމަށް، ބޭރުގެ ތަޖުރިބާކާރުންގެ އެހީވެސް ހޯދަމުންދާ ކަމަށެވެ. ނަމަވެސް މި އިންސްޓިޓިއުޓް މުޅިން ބޭރުގެ ފަރާތްތަކަށް ބަރޯސާ ނުވާނެ ކަމަށްވެސް ޑރ.އަންވަރު ވިދާޅުވިއެވެ.
އިންސްޓިޓިއުޓް ފޯރ ރިސަރޗް އެންޑް އިނޮވޭޝަންގެ ނަން ދެވިފައިވާ މިއިންސްޓިޓިއުޓްގެ ޑިރެކްޓަރ، ޑރ.ފަވާޒް ޝަރީފް ވިދާޅުވީ މި އިންސްޓިޓިއުޓްގައި ކުރެވޭ ދިރާސާތައް ބައިނަލްއަޤްވާމީ ރިސާޗް ޖާރނަލްތަކުގައި ޝާއިރު ކުރެވޭނެ ކަމަށެވެ.
އަލަށް އުފެދިގެން މަސައްކަތް ފެށިފައިވާ މިއިންސްޓިޓިއުޓުންވެސް، ބައިނަލްއަޤްވާމީ ރިސާޗް ޖާނަލްއެއް ނެރުމުގެ މަސައްކަތް ކުރަމުން ދާކަމަށާއި އެކަމަށްޓަކާ މިހާރު އެޑިޓޯރިއަލް ބޯޑެއްވެސް އެކުލަވާލެވިފައިވާ ކަމަށް ޑރ. ފަވާޒް ވިދާޅުވިއެވެ.
އޭނާ ވިދާޅުވީ މި އެޑިޓޯރިއަލް ބޯޑުގައި އެންމެ އިސްކޮށް ހުންނަވާނީ ބައިނަލްއަޤްވާމީ ފަންސަވީސް ރިސާޗް ޖާނަލްގެވެސް އެޑިޓަރުކަން ކުރައްވާ ކެނެޑާގެ އަތަބަސްކާ ޔުނިވަރސިޓީގެ އެސޯސިއޭޓް ޑީން ޑރ. ކިންޝުކް ކަމަށެވެ.
މީގެ އިތުރަށް ދުނިޔޭގެ އެކި ހިސާބުތަކުން ގިނަ އަދަދެއްގެ ތަޖުރިބާކާރުން ހިމެނޭ ރިވިއު ކޮމިޓީއެއްވެސް މިހާރު އުފައްދާފައިވާ ކަމަށްވެސް ޑރ.ފަވާޒް ވިދާޅުވިއެވެ.
ރާއްޖޭގެ ފުރަތަމަ ޕްރައިވެޓް ކޮލެޖުގެ ގޮތުގައި 2007 ވަނަ އަހަރު އުފެދިގެން ދިޔަ ވިލާ ކޮލެޖުގައި މިހާރު 1000 ވުރެ ގިނަ ދަރިވަރުން ގްރެޖުއޭޓް ކޯސްތައް ފުރިހަމަ ކުރަމުންދާއިރު 300 ވުރެ ގިނަ ދަރިވަރުން ދަނީ ޕޯސްޓް ގްރެޖުއޭޓް ކޯސްތައް ފުރިހަމަ ކުރަމުންނެވެ.