މިނިވަން ދުވަހުގެ ހަރަކާތްތައް ބަލަން ގިނަ ބަޔަކު މަގުތަކަށް ނުކުމެ އުޅޭނެތީ، މިއަދު ހަވީރު 5 އިން ރޭގަނޑު 8 އަށް އެއްޗެހި ދުއްވުން މަނާކޮށްފިި އެވެ. ޓްރާންސްޕޯޓް އޮތޯރިޓީގެ ޗެއާމަން އަބްދުއްރަޝީދު ނާފިޒް މިއަދު ވިދާޅުވީ މި ވަގުތުތައް އުޅަނދުފަހަރަށް މަނާކުރީ ގިނަ އަދަދެއްގެ ކުޑަކުދިންނާއި އާއިލާތައް ހިނގާލަން ނިކުމެ އުޅެން ދަތިތަކެއް ވާނެ ކަމަށް ގަބޫލުކުރެވޭތީ ކަމަށެވެ. "ރޭ ފާހަގަކުރެވުނު މުޅި މާލެ ދުއްވާ އެއްޗެހިތަކުން ފުރި ބާރުވެ ކުޑަކުދިންނަށާއި އާއިލާތަކަށާއި މުސްކުޅިންނަށް މާލެ ޒީނަތްތެރިކޮށްފައި ހުރި މަންޒަރު ބަލަން ދަތިތަކެއް ކުރިމަތިވިކަން. އެ ކަންތައްތަކަށް ރިޔާއަތްކޮށް ޓްރާންސްޕޯޓް އޮތޯރިޓީން ނިންމި ނިންމުމެއް އެއީ،'' ނާފިޒް ވިދާޅުވި އެވެ. އެކަމަކު، އޭނާ ވިދާޅުވީ މާދަމާ ފާހަގަކުރާ މިނިވަން ކަމުގެ ރަންްޔޫބީލްގެ ރަސްމިއްޔާތަށް ތައްޔާރުވުމުގެ މަސައްކަތް އަދިވެސް ކުރަމުން އަންނާތީ، އެ ތަންތަން ޒީނަތްތެރިކުރުމުގެ މަސައްކަތް ކުރާ ފަރާތްތަކަށް އިންޖީނުލީ އުޅަނދު ބޭނުންކުރެވޭނެ ކަމަށެވެ. އިންޖީނުލީ އުޅަނދު ދުއްވުން މަނާ ވަގުތުތަކުގައި، ދުއްވޭނީ ހައުސިން މިނިސްޓްރީގެ ހާއްސަ ހުއްދައެއް ލިބިގެންނެވެ. ހުއްދަ އެ މިނިސްޓްރީގެ އާއްމު ހިދުމަތްތަކާބެހޭ ބައިން ލިބޭނެ ކަމަށް ވެސް ނާފިޒް ވިދާޅުވި އެވެ. އަދި ހުއްދަ ނުނަގައި ދުއްވައިފި ނަމަ 750ރ. ޖޫރިމަނާކުރާނެ ކަމަށް ވިދާޅުވި އެވެ. މި ވަގުތުތަކުގައި ހުރިހާ ޓެކްސީ ސެންޓަރުތަކަށް ވެސް އެންމެ ގިނައިން ހުއްދަ ދީގެން ވެސް ދުއްވޭނީ 10 ޓެކްސީ އެވެ. މިނިވަން ދުވަސް ފާހަގަކުރުމުގެ ރަސްމިއްޔާތަށް މާލޭގެ ގިނަ މަގުތަކެއް ބަންދުކުރާ ގޮތަށް ވެސް ވަނީ ނިންމައިފަ އެވެ.