މާބަނޑު މީހެއްގެ ގަޔަށް އައިޖީއެމްއެޗުން އެޗްއައިވީ ޕޮޒިޓިވް ލޭ އެޅި މައްސަލައިގެ ތަހުގީގުގައި މެޑިކަލް ނެގްލިޖެންސް ދާއިރާއިން މަތީ މައުލީމް ހާސިލްކުރައްވާފައިވާ ވަކީލަކު ޕްރޮސިކިއުޓަ ޖެނެރަލް (ޕީޖީ) އޮފީހުގެ ފަރާތުން ބައިވެރިވާ ކަމަށް އެ އޮފީހުން މިއަދު ބުނެފި އެވެ.
އަވަހަށް ތަހުގީގުކޮށް، ދައުވާކުރާ ނިޒާމްގެ ދަށުން ފުލުހުން ކުރާ ތަހުގީގުތަކުގައި ޕީޖީ އޮފީހުގެ ވަކީލުންގެ އެހީތެރިކަން މީގެ ކުރިން ވެސް ފުލުހުން ހޯދަ އެވެ. ތަހުގީގުގައި ޕީޖީގެ ވަކީލަކު ބައިވެރިވާ ކަމަށް ޑެޕިއުޓީ ޕީޖީ ހުސެން ޝަމީމް ވިދާޅުވި ނަމަވެސް އިތުރު ތަފްސީލެއް ނުދެއްވަ އެވެ.
އެޗްއައިވީ ލޭ އެޅި މައްސަލައިގެ ތުހުމަތުގައި އައިޖީއެމްއެޗްގެ ޓެކްނީޝަނެއް ހައްޔަރުކޮށްފައިވާއިރު އޭނާގެ ބަންދަށް މިދިޔަ ހުކުރު ދުވަހު ކޯޓުން ވަނީ ހަތް ދުވަސް އިތުރުކޮށްދީފަ އެވެ.
މި މައްސަލާގައި އައިޖީއެމްއެޗާއި ހެލްތު މިނިސްޓްރީން ވަނީ މައާފަށް އެދި، ހޮސްޕިޓަލުގައި ހުރި އިސްލާހުކުރަންޖެހޭ ކަންކަން އިސްލާހު ކުރާނެ ކަމަށް ބުނެފަ އެވެ.