އިމިގްރޭޝަން އޮފިސަރުންކަމަށްބުނެ ބިދޭސީން ދިރިއުޅޭ ތަނަކަށްވަދެ ފޭރުނު މައްސަލައިގައި މީހަކު ހައްޔަރުކޮށްފިއެވެ.
ފުލުހުންގެ ޚިދުމަތުން ވިދާޅުވީ މިމައްސަލައާ ގުޅިގެން ކޯޓު އަމުރެއްގެ ދަށުން، ހައްޔަރުކޮށްފައިވަނީ ގ.ބޭރުގެ، ޢުމުރުން 44 އަހަރުގެ، މުޙައްމަދު ނަވީންކަމަށެވެ.
މޯލްޑިވްސް އިމިގްރޭޝަނުގެ އޮފިސަރުންކަމަށް ބުނެ ބިދޭސީން ދިރިއުޅޭ ތަނަކަށް ވަދެ ފޭރުނު މައްސަލައެއް ފުލުހުންނަށް ރިޕޯޓުކޮށްފައިވަނީ މިދިޔަ ހޯމަ ދުވަހުކަމަށް ފުލުހުން ވިދާޅުވެއެވެ. މިމައްސަލައިގައި 3 މީހަކު ބިދޭސީން އުޅޭ ތަނަކަށްވަދެ 9000 ރުފިޔާ ފޭރިގަނެފައިވާކަމަށް ފުލުހުން ވިދާޅުވެއެވެ.
މިމައްސަލަ ފުލުހުން ގެންދަނީ އިތުރަށް ތަޙުގީގުކުރަމުންނެވެ.
ރާއްޖޭގައި ގަވާއިދާ ޚިލާފަށް ދިރިއުޅެމުންދާ މީހުން ހޯދުމަށް މޯލްޑިވްސް އިމިގްރޭޝަނުން އަންނަނީ ބޮޑު އޮޕަރޭޝަނެއް ހިންގަމުންނެވެ. މިއޮޕަރޭޝަންގައި އިމިގްރޭޝަންގެ އޮފިސަރުން ދާނީ ޔުނިފޯމު އަޅައިގެންކަމަށާއި އިމިގްރޭޝަން އޮފިސަރުންގެ އައިޑީ ފެންނަން ހުންނާނެކަމަށް އިމިގްރޭޝަނުން ވިދާޅުވެއެވެ.