މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައްޔާރުކޮށްފައިވާ އައު ޑްރާފްޓް ބިލެއްގައި، ފަތުރުވެރިކަމުގެ ވިޔަފާރިތަކުގެ އިތުރުން އެހެނިހެން ވިޔަފާރިތަކުންވެސް އަހަރަކު 20 މިލިއަން ޑޮލަރަށްވުރެ ބޮޑު އާމްދަނީއެއް ލިބޭނަމަ، އެ ފައިސާ ރާއްޖޭގެ ބޭންކުތަކަށް ޖަމާކުރުން ލާޒިމްކޮށްފައިވެއެވެ.އެމްއެމްއޭގެ މި ޑްރާފްޓް ބިލުގައި، ފަތުރުވެރިކަމުގެ ދާއިރާގެ ވިޔަފާރިތަކުން ލިބޭ ބޭރުފައިސާ ރާއްޖޭގެ ބޭންކުތަކަށް ޖަމާކުރުން ލާޒިމްކުރުމުގެ އިތުރުން، އެހެނިހެން ވިޔަފާރިތަކުންވެސް އަހަރަކު 20 މިލިއަން ޑޮލަރަށްވުރެ ގިނަ އާމްދަނީ ލިބޭނަމަ، އެ ފައިސާ ރާއްޖޭގެ ބޭންކުތަކަށް ޖަމާކުރަން ޖެހޭނެކަމަށް ބަޔާންކޮށްފައިވެއެވެ. މީގެ އިތުރުން، މި ފަދަ ވިޔަފާރިތަކުން ލިބޭ އާމްދަނީގެ 25 އިންސައްތައަށްވުރެ ބޮޑުނުވާ ގޮތަށް ބޭރުފައިސާ މާރުކުރުންވެސް ލާޒިމްކޮށްފައިވެއެވެ.ބިލުގައި ގެނެސްފައިވާ އިތުރު ބަދަލުތަކުގެ ތެރޭގައި، 50 އެނދަށްވުރެ ގިނަ އެނދު ހުންނަ ގެސްޓްހައުސް، ސިޓީ ހޮޓާ އަދި ޓޫރިސްޓު އުޅަނދުތަކުން މާރުކުރަންޖެހޭ މިންވަރު 25 ޑޮލަރަށް ބަދަލުކޮށްފައިވާކަން ފާހަގަކުރެވެއެވެ. އަދި ކޮމްޕްލިމެންޓަރީކޮށް މަޑުކުރާ ފަރާތްތަކާއި، 2 އަހަރު ނުވާ ކުޑަކުދިންނާއި، 24 ގަޑިއިރު ހޭދަނުކުރާ ފަތުރުވެރިންނަށް ޑޮލަރު މާރުކުރަން ނުޖެހޭނެކަމަށްވެސް ބަޔާންކޮށްފައިވެއެވެ.އެމްއެމްއޭއިން ކަނޑައަޅާފައިވާ ކެޓަގަރީތަކުގެ ތެރެއިން، އޭ ކެޓަގަރީގައި ހިމެނޭ ރިސޯޓު، ބޮޑެތި ހޮޓާ އަދި ޓުއަރިސްޓު އުޅަނދުތަކުން ކޮންމެ ފަތުރުވެރިޔަކަށް 500 ޑޮލަރު މާރުކުރަންޖެހޭއިރު، ބީ ކެޓަގަރީގައި ހިމެނޭ ގެސްޓްހައުސްތަކާއި މީހުން ދިރިއުޅޭ ރަށްރަށުގެ ހޮޓާތަކުން ކޮންމެ ފަތުރުވެރިޔަކަށް 25 ޑޮލަރު މާރުކުރަންޖެހޭނެކަމަށް ބަޔާންކޮށްފައިވެއެވެ.މީގެ އިތުރުން، ބޭންކުތަކުން އެމްއެމްއޭއަށް ކޮންމެ ހަފްތާއަކު 60 އިންސައްތަ ބޭރުފައިސާ ވިއްކަންޖެހޭނެކަމަށްވެސް މި ޑްރާފްޓް ބިލުގައި ބަޔާންކޮށްފައިވެއެވެ.މި ބިލުގެ މަޤްޞަދަކީ ރާއްޖޭގެ ބޭރުފައިސާގެ ރިޒާވް އިތުރުކޮށް، ޑޮލަރުގެ ޑިމާންޑް ދަށްކުރުމާއެކު، ރާއްޖޭގެ އިޤްތިޞާދު ހަރުދަނާކުރުންކަމަށް ބެލެވެއެވެ.