ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށްގެންދާ ގައުމީ ވޮލީބޯލް ޗެމްޕިއަންޝިޕް 2024 ގެ ފައިނަލްގެ ޖާގައެއް ކުލަބު އެޗްޑީސީން ހޯދިއިރު، ސެމީ ފައިނަލްގައި ސްޕޯޓްސް ކުލަބު ސިޓީ އާއި ދިވެހި ސިފައިންގެ ކުލަބު ބައްދަލުކުރަން ޖެހިއްޖެއެވެ.
މި ފަހަރުގެ ގައުމީ މުބާރާތުގައި ވާދަކުރަނީ މި ފަހުން ނިމުނު ގައުމީ ވޮލީބޯލް ލީގު 2024 ގެ ގަދަ ހަތަރު ޓީމެވެ. އެއީ އެޗްޑީސީ އާއި، ސްޕޯޓްސް ކުލަބު ސިޓީ އާއި، ސިފައިންގެ ކުލަބުގެ އިތުރުން ބްލޫސް ފޯރ ވޮލީބޯލްއެވެ.
މި ފަހަރުގެ ގައުމީ މުބާރާތް ރޭވިފައިވާ ގޮތުން ހަތަރު ޓީމުގެ މެދުގައި ލީގު ބުރެއް ކުޅުމަށްފަހު، އެއްވަނަ ހޯދާ ޓީމަކަށް ފައިނަލުގެ ސީދާ ޖާގައެއް ލިބިގެންދާނެއެވެ. އަދި ފައިނަލުގެ ފަހު ޖާގަ ލިބޭނީ ދެވަނަ އާއި ތިންވަނައިގައި މެދުގައި ކުޅެވޭ ސެމީ ފައިނަލް މެޗުން މޮޅުވާ ޓީމަކަށެވެ.
މުބާރާތުގެ ލީގު ބުރުގެ ކުޅުން މިރޭ ނިމިގެންދިޔައިރު، އެއްވަނަ ހޯދާފައި އެޗްޑީސީންނެވެ. އެ ޓީމަށް ވަނީ ތިން މެޗުން ހަތް ޕޮއިންޓް ލިބިފައެވެ. ދެވަނަ ހޯދި ސްޕޯޓްސް ކުލަބު ސިޓީއަށް ތިން މެޗުން ހަ ޕޮއިންޓް ލިބިފައިވާއިރު، ތިންވަނައިގައި އޮތް ސިފައިންގެ ކުލަބަށް ވަނީ ތިން މެޗުން ފަސް ޕޮއިންޓް ލިބިފައެވެ. އަދި ފުލުގައި އޮތް ބްލޫސް ފޯރ ވޮލީބޯލްއަށް ޕޮއިންޓެއް ލިބިފައެއް ނުވެއެވެ.
މުބާރާތުގައި މިރޭ ކުޅުނު މެޗުން ސިފައިންގެ ކުލަބު ވަނީ އެޗްޑީސީ އަތުން ފަހަތުން އަރައި ތިން ސެޓު ދެ ސެޓުން މޮޅުވެފައެވެ. މި މެޗުގެ ފުރަތަމަ ދެ ސެޓު 25-13 އަދި 25-21 އިން އެޗްޑީސީން ގެންދިޔަ ނަމަވެސް، އަނެއް ތިން ސެޓު ކާމިޔާބުކޮށްފައިވަނީ ސިފައިންގެ ކުލަބުންނެވެ. އެއީ 25-20، 30-28 އަދި 15-12 އިންނެވެ. މި މެޗުގެ މޮޅު ކުޅުންތެރިޔާގެ މަގާމު ހޯދީ ސިފައިންގެ ކުލަބުގެ މުޙައްމަދު ހަމަދެވެ.
މީގެ އިތުރުން މި މުބާރާތުގައި އިއްޔެ ހަވީރު ކުޅުނު މެޗުގައި ސްޕޯޓްސް ކުލަބު ސިޓީން ވަނީ ފަހަތުން އަރައި ތިން ސެޓު އެއް ސެޓުން ބްލޫސް ފޯރ ވޮލީބޯލް ބަލިކޮށްފައެވެ. މި މެޗުގެ ފުރަތަމަ ސެޓު 25-21 އިން ބްލޫސް ފޯރ ވޮލީބޯލްއިން ގެންދިޔަ ނަމަވެސް، އަނެއް ތިން ސެޓު ކާމިޔާބުކޮށްފައިވަނީ ސްޕޯޓްސް ކުލަބު ސިޓީންނެވެ. އެއީ 25-22، 25-16 އަދި 26-24 އިންނެވެ.
މި މުބާރާތުގެ ސެމީ ފައިނަލް މެޗު ބުރާސްފަތި ދުވަހުގެރޭ ކުޅޭއިރު، ފައިނަލް މެޗު ކުޅުމަށް ތާވަލުކޮށްފައިވަނީ އަންނަ ހުކުރު ދުވަހުގެރެއެވެ.