ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޑެޕިއުޓީ މެނޭޖިން ޑިރެކްޓަރަކަށް ފަޔާޒް މަންސޫރު އައްޔަންކޮށްފިއެވެ.
މައުލޫމާތު ލިބިފައިވާ ގޮތުގައި ފަޔާޒް ވަނީ މިއަދު އެ ކުންފުނީގެ މުވައްޒަފުންނާ ބައްދަލުކުރައްވާފައެވެ. ފަޔާޒް އަކީ މި ސަރުކާރުގައި އެޗްޑީސީގެ ޑެޕިއުޓީ މެނޭޖިން ޑިރެކްޓަރަކަށް އައްޔަން ކުރެއްވި ފުރަތަމަ ބޭފުޅާއެވެ.
ފަޔާޒު އެޗްޑީސީގެ ޑީއެމްޑީއަކަށް އައްޔަންކޮށްފައިވަނީ މިދިޔަ ޑިސެމްބަރު 26 ގައި ނަމަވެސް އޭނާ މަސައްކަތް ނުކުތީ މިއަދެވެ.
ފަޔާޒް އަކީ ކުރެހުމާއި ޑިޒައިން ކުރުމުގެ މަސައްކަތް ކުރާ ގެޑޯ ކޮންސަލްޓިންގެ ޑިރެކްޓަރެއްގެ މަގާމު ވެސް އަދާކުރައްވާފައިވާ ބޭފުޅެކެވެ.
ކުއަންޓިޓިވް ސާވޭއިން ޑިގްރީ ހާސިލުކުރައްވާފައިވާ ފަޔާޒު އަކީ ނިއުޒިލެންޑުގެ ވިކްޓޯރިއާ ޔުނިވާސިޓީން މާސްޓާސްވެސް ފުރިހަމަ ކުރައްވާފައިވާ ބޭފުޅެކެވެ. ފަޔާޒް މާސްޓާސް ހައްދަވާފައިވަނީ ބިލްޑިން ސައިންސުގެ ދާއިރާއިންނެވެ.