އިސްލާމީ ކަންތައްތަކާބެހޭ ވުޒާރާއިން ރާއްޖޭގެ ހުރިހާ ރަށެއްގެ ކައުންސިލުތަކަށް ސާކިއުލާއެއް ފޮނުވައި، ރާއްޖޭގައި އިސްލާމްދީން ފިޔަވައި އެހެން ދީންތަކުގެ ޝިއާރު ފާޅުކޮށް ހަރަކާތްތައް ހިންގުމަކީ މަނާކަމެއްކަން އަންގައިފިއެވެ.މި ސާކިއުލާ ފޮނުވާފައިވަނީ ރާއްޖޭގެ ބައެއް ރަށްރަށުގައި ކްރިސްމަސް ފާހަގަކުރާކަމަށް ބުނެ ފޮޓޯތަކެއް ސޯޝަލް މީޑިއާގައި ދައުރުވުމާ ގުޅިގެންނެވެ. މިނިސްޓްރީން ފޮނުވި ސާކިއުލާގައި ބަޔާންކޮށްފައިވާ ގޮތުގައި، ބިދޭސީންނާއި ފަތުރުވެރިން ރާއްޖެ ގެންނަ ފަރާތްތަކުން އެ މީހުންނަށް ރާއްޖޭގެ ޤާނޫނުތަކާއި ގަވާއިދުތަކާ އެއްގޮތަށް ޢަމަލުކުރުމަށް އިރުޝާދު ދޭންވާނެއެވެ.އިސްލާމިކް މިނިސްޓްރީން އަންގާފައިވާ ގޮތުގައި، ރާއްޖޭގައި އުޅޭ އެހެން ދީންތަކުގެ މީހުންނާއި ރާއްޖެއަށް ޒިޔާރަތްކުރާ އެހެން ދީންތަކުގެ މީހުން، އެ މީހުންގެ ދީނީ ޝިއާރުތައް ފާޅުކުރުމާއި، އާންމު ތަންތަނުގައި ޖަމާޢަތް ހަދައިގެން އެފަދަ ދީނީ ހަރަކާތެއް ހިންގުމަކީ މަނާކަމެކެވެ. އަދި އެފަދަ ހަރަކާތްތަކުގައި ދިވެހިން ބައިވެރިކުރުވުމަކީވެސް މަނާކަމެކެވެ.މީގެ އިތުރުން، ރާއްޖޭގެ އެއްވެސް އާންމު ތަނެއްގައި އިސްލާމްދީން ފިޔަވައި އެހެން އެއްވެސް ދީނެއްގެ އަޅުކަމާ ގުޅޭ އެއްވެސް ކަމެއް ހިންގުން މަނާކަމަށް އިސްލާމިކް މިނިސްޓްރީން ވަނީ އަންގާފައެވެ. އަދި ގެސްޓް ހައުސް ހިންގާ ރަށްރަށުގައިވެސް މި ގަވާއިދާ އެއްގޮތަށް ޢަމަލުކުރުމަށާއި، ފަތުރުވެރިން އާންމު އިޖުތިމާޢީ މިންގަނޑަށް ފެތޭ ހެދުމެއްގައި އުޅުމަށް އިރުޝާދު ދިނުމަށް މިނިސްޓްރީން ވަނީ އިލްތިމާސްކޮށްފައެވެ.މި ސާކިއުލާއިން އެނގޭ ގޮތުގައި، ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތްކުރުމަކީ ސަރުކާރުގެ އިސް އަމާޒެކެވެ. އަދި ރާއްޖޭގައި އިސްލާމްދީނުގެ ޝިއާރުތައް ފިޔަވައި އެހެން ދީންތަކުގެ ޝިއާރުތައް ފާޅުކުރުމަކީ ޤާނޫނީ ގޮތުން މަނާކަމެއްކަން މި ސާކިއުލާއިން ހާމަވެއެވެ.