ރާއްޖޭގެ ހުރިހާ އަތޮޅު ހޮސްޕިޓަލްތަކުން ސައިކޭޓްރީ އަދި ސްޕީޗް ތެރަޕީގެ ޚިދުމަތް ފޯރުކޮށްދިނުމުގެ މަސައްކަތް ފަށާފައިވާ ކަމަށް ސިއްހީ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
މިއީ ރައީސް މުޙައްމަދު ޑރ.މުއިއްޒުގެ ރިޔާސީ ވަޢުދެއް ފުއްދުމުގެ ގޮތުން އަޅާފައިވާ ފިޔަވަޅެކެވެ.
ދައުލަތުގެ މީޑިއާއަށް މައުލޫމާތުދެއްވަމުން ވަޒީރު ވިދާޅުވީ މިހާތަނަށް މި ޚިދުމަތްތައް ލިބެމުން އައީ މާލެއިންނާއި ބައެއް ރީޖަނަލް ހޮސްޕިޓަލްތަކުން އެކަނި ކަމަށާއި، މިހާރު މި ޚިދުމަތްތައް ރާއްޖޭގެ ހުރިހާ ކަންކޮޅުތަކަށް ފޯރުކޮށްދިނުމަށް މަސައްކަތް ފަށާފައިވާ ކަމަށެވެ.އަތޮޅުތަކުގައި މި ޚިދުމަތްތައް ދިނުމަށް ބޭނުންވާ މާހިރުން ހޯދުމުގެ މަސައްކަތް ކުރިއަށްދާ ކަމަށް ވަޒީރު ވިދާޅުވިއެވެ. މީގެ އިތުރުން، ނަފްސާނީ ޞިއްޙަތުގެ ހެލްޕްލައިން ނަންބަރު 1677 މިހާރު 24 ގަޑިއިރު ޚިދުމަތް ދެމުންދާ ކަމަށްވެސް ވަޒީރު ފާހަގަކުރެއްވިއެވެ.މި އައު ފިޔަވަޅާއެކު، ރާއްޖޭގެ ހުރިހާ ސަރަޙައްދެއްގައި ދިރިއުޅޭ ރައްޔިތުންނަށް ސައިކޭޓްރީ އަދި ސްޕީޗް ތެރަޕީގެ ޚިދުމަތް ފަސޭހަކަމާއެކު ލިބިގެންދާނެ ކަމަށް އުއްމީދު ކުރެވެއެވެ. މިއީ ޚާއްޞަކޮށް އަތޮޅުތަކުގައި ދިރިއުޅޭ ފަރާތްތަކަށް ބޮޑު ލުޔެއް ލިބިގެންދާނެ ކަމެކެވެ.