ކުރީގެ ދެ ރައީސުން ކަމުގައިވާ މުހައްމަދު ނަޝީދާއި އިބްރާހިމް މުހައްމަދު ސާލިހާއެކު މަސައްކަތް ކުރަނީ ހަމައެކަނި ނޫސްވެރިންގެ ދިފައުގައި އެކަނި ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ސަންގަށް ދެއްވި މައުލޫމާތުގައި ޔާމީން ވިދާޅުވީ އެ ޕާޓީއާއި އެކު ގުޅިގެން މަސައްކަތް ކުރަނީ ނޫސްވެރިކަމުގެ މިނިވަންކަމަށް ސަރުކާރުން ހުރަސްއަޅާތީ ކަމަށެވެ. އެމްޑީޕީގެ ލީޑަރުންނާއި އެކު މަސައްކަތް ކުރަނީ ނޫސްވެރިންގެ ދިފާއުގައި ކަމަށްވެސް ޔާމީން ވަނީ ވިދާޅުވެފައެވެ.
ރައީސް ނަޝީދާއި އަދި ރައީސް ޞާލިޙާއި އެކު މަސައްކަތް ކުރަން ތައްޔާރަށް ހުންނެވި ކަން ރައީސް ޔާމީން ހާމަކުރެއްވީ އިއްޔެއެވެ. ޔާމީން ވިދާޅުވި ގޮތުގައި ނޫސްވެރިކަމުގެ މިނިވަންކަމަށް ދިނީ ހަމަލާއެއް ކަމަށާއި މިއީ ބަލައިގަނެވޭނެ ކަމެއް ނޫންކަމަށް އެމަނިކުފާނު ވިދާޅުވިއެވެ.
ކުރީގެ ތިން ރައީސުން އެކުގައި ޤައުމު ސަލާމަތްކުރަން ނިކުންނެވުމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒް އިސްމާޢީލްވެސް ވަނީ ގޮވާލައްވާފައެވެ. ފައްޔާޒު ވިދާޅުވީ، ތަފާތު ވިސްނުންތައް އެއްފަރާތްކޮށް ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް ރައްޔިތުންގެ ނުރުހުމުގެ އަޑު އިއްވަން ޖެހޭ ކަމަށެވެ.
މިއީ އިދިކޮޅު ލީޑަރުން، އަދި ވަކިން ހާއްސަކޮށް ކުރީގެ ތިން ރައީސުން ކަމަށްވާ ރައީސް މުޙައްމަދު ނަޝީދު، ރައީސް އިބްރާހީމް މުޙައްމަދު ޞާލިޙް، އަދި ރައީސް ޢަބްދުﷲ ޔާމީން ޢަބްދުލްޤައްޔޫމް އެކުގައި ނިކުންނަވާ ޤައުމު ސަލާމަތް ކުރަންވީ ވަގުތު ކަމަށް އޭނާ ފާހަގަކުރެއްވިއެވެ. ރައްޔިތުން ތިބީ އެ ތިން ރައީސުންނާ އެކު ކަމަށާއި، މި ސަރުކާރާ ދެކޮޅަށް މަސައްކަތްކުރަން ތައްޔާރަށް ކަމަށް ފައްޔާޒް ވިދާޅުވިއެވެ.
މީގެ އިތުރުން، ’އަދަދު‘ ނޫހުގެ ދެ ނޫސްވެރިން ކަމަށްވާ މުޙައްމަދު ޝަހްޒާނާއި ލީވާން ޢަލީ ނާސިރު ބަންދުކުރި ކުރުމަށް އިޝާރާތްކުރައްވައި، އެ ދެ ނޫސްވެރިން މިނިވަންކުރުމަށް އިންސާފުވެރި ފަނޑިޔާރުންނާއި މިނިވަން މުއައްސަސާތައް އެކުގައި މަސައްކަތްކުރުމަށް ފައްޔާޒް ވަނީ އިލްތިމާސްކުރައްވައިފައެވެ.