ގޯލްޑަން ފުޓްސަލް ޗެލެންޖު 2025 ގެ އދ. އަތޮޅު ފައިނަލަށް މަންދޫ ދަތުރުކުރުމަކީ ވެސް އޭގެ ޒާތުގައި ކުރިން ފަހަރާ އަޅާކިޔާއިރު ކުރިއެރުމެއް، އެކަމަކު، ފުރަތަމަ ފައިނަލުގައި ވެސް އަތޮޅުގެ އެންމެ ކާމިޔާބު އެއް ޓީމު މަހިބަދޫ ބަލިކޮށް، ތަށި ހޯދުން މަންދޫ އަށް ހާއްސަ ކަމަށް އެ ޓީމުގެ ތަރި، އިބްރާހިމް އިމްރާން (އިންމި) ބުނެފި އެވެ.
މިދިޔަ އަހަރު، މަންދޫން ގޯލްޑަން ފުޓްސަލް ޗެލެންޖުގެ އދ. އަތޮޅު ސެމީގައި ކުޅެގެން ކެޓީ އެވެ. މި ފަހަރުގެ މުބާރާތުގައި އެ ޓީމުން ސެމީ ފައިނަލުގައި ވަނީ ދަގެނތި އަތުން 3-2 އިން މޮޅުވެފަ އެވެ. ފަައިނަލަށް ދެވުމަކީ، ވެސް މަންދޫ އަށް އޭގެ ޒާތުގައި ކާމިޔާބެކެވެ.
އެކަމަކު، އެހާ ހިސާބުން ނިންމައިނުލައި، ގްރޫޕް ސްޓޭޖުގައި މަހިބަދޫ އަތުން 3-0 އިން ބަލިވި މެޗުގެ ބަދަލުހިފުމުގެ ރޫހުގައި ނުކުމެ، ފައިނަލުގައި ފަހަތުން އަރައި، މަހިބަދޫ 2-1 އިން ބަލިކޮށް މަންދޫން ތާރީހީ ތަށި ހޯދީ އެވެ.
"މިއީ ވަރަށް ބުރަ މަސައްކަތެއް. މިދިޔަ އަހަރުއް ސުރެން މި އުންމީދުގައި ތިބީ، މިދިޔަ އަހަރު ސެމިގައި ބަލިވީ، މި ފަހަރު ފުރަތަމަ ފަހަރަށް ފައިނަލަށް އާދެވުނީމަ، އަނެއްކާ ގްރޫޕް ސްޓޭޖުގައި މަހިބަދޫ ކައިރިން ބަލިވެފައި އިނުމާ އެއްކޮށް އެއީ ރިވެންޖެއްގެ ގޮތުގައި މިއަދު (ރޭ) ނުކުމެގެން އައީ، އެނގޭ އުނދަގޫވާނެކަން. އެއީ، އަތޮޅުގެ ޗެމްޕިއަން، އަދިވެސް ޗެމްޕިއަން، ހުރިހާ ގޮތަކުން ބެލިޔަސް، ދެން އަޅުގަނޑުމެން މި ތިބީ އިރާދަކުރެއްވިއްޔާ ޗެމްޕިއަަނަކަށް ވާން،" އިންމި ބުންޏެވެ.
ރޭގެ މެޗުގެ ދެ ވަނަ ހާފުގައި، އިންމި ފެށީ ބަދަލެއްގެ ގޮތުގަ އެވެ. އެކަމަކު، ބަދަލަކަށް ނުކުމެ، އިންމި ވަނީ މަންދޫ މޮޅުކޮށްދިން ތާރީހީ ގޯލު ޖަހައިފަ އެވެ. އިންމި ބުނީ، ފައިނަލުގައި ގޯލު ޖެހުމާ މެދު ނުވިސްނާ ކަމަށާއި އަބަދުވެސް އަންނަނީ ޓީމު މޮޅުކޮށްދޭން ކަމަށެވެ.
"އެހެން ވަކި ބުނާކަށް ނޭނގެ، ކޮންމެ މެޗެއް ވެސް އަރަނީ ގޯލު ޖަހަން. ޓީމު މޮޅުކޮށްދޭން އެ އަޒުމުގައި،" ވަރަށް ބޮޑަށް ހިތްހަމަޖެހިފައި ހުރެ، އދ. އަތޮޅުގެ މޮޅު ކުޅުންތެރިޔާގެ މަގާމު ހޯދި އިންމި ބުންޏެވެ.
"(ކުރެވޭ އިހުސާސެއް) ނޭނގެ ބުނެދޭކަށް ވެސް، މިއީ ހަމަ ހިސްޓްރީއެއް. އެންމެ ފަހުން، މަހިބަދޫ އަތުން ކުޅިވަރެއްގައި މޮޅުވެފައި އިނީ، 2002 ނޫނީ 2004 ހިސާބުގައި ކަންނޭނގެ އޭގެފަހުން، ފަހަކުން އަދި މަހިބަދޫ އަތުން މޮޅެއްނުވޭ، މިއީ, މަންދޫ އަށް ލިބުނު ބޮޑު ހިތްވަރެއް، ވަރަށް ބޮޑު ކުރިއެރުމެއް، މަންދޫގެ ހިސްޓްރީ އަށް އަންނާނެ މި،"
އދ. އަތޮޅުގެ ފައިނަލުގައި ކުޅުނު، މަހިބަދޫ އާއި މަންދޫ އަށް ވެސް ވަނީ ޒޯން ހަތަރަކުން ޖާގަ ލިބިފަ އެވެ. މި ޒޯނުގައި ދެން ހިމެނެނީ، އއ. ޗެމްޕިއަން، މަތިވެރި އާއި ރަަނަރަޕް، ތޮއްޑޫ އަދި ވ. ޗެމްޕިއަން، ކެޔޮދޫ އެވެ.