އެޕަލް އިން ކުރިއަށް އޮތް އަހަރުތަކުގައި ބާޒާރަށް ނެރުމަށް ތައްޔާރުވަމުންދާ އައިފޯން 18 ސީރީޒްގެ ފޯނުތަކުގައި ހިމެނޭ "ޑައިނަމިކް އައިލެންޑް" މިހާރަށްވުރެ ކުޑަކޮށް، އާ ފަރުމާއަކަށް ބަދަލުކުރަން ނިންމާފައިވާ ކަމަށް ރިޕޯޓުތައް ބުނެފިއެވެ. ބްލޫމްބާގްގެ މަޝްހޫރު ޓެކް ރިޕޯޓަރު މާކް ގާމަން ހާމަކޮށްފައިވާ ގޮތުގައި، އެޕަލް އިން އައިފޯން 18 ޕްރޯ އަދި އައިފޯން 18 ޕްރޯ މެކްސްގައި ހިމެނޭ ޑައިނަމިކް އައިލެންޑްގެ ސައިޒު މިހާރުގެ މޮޑެލްތަކަށްވުރެ ބޮޑުތަނުން ކުޑަކުރާނެއެވެ. ބައެއް ރިޕޯޓުތައް ބުނާ ގޮތުގައި މިހާރުގެ އައިފޯންތަކުގައި 20.7 މިލިމީޓަރު ހުންނަ މި ބައި، އައިފޯން 18 އަށް ބަދަލުވާއިރު 13.49 މިލިމީޓަރަށް ކުޑަވާނެއެވެ. މިއީ ގާތްގަނޑަކަށް 35 އިންސައްތައިގެ ކުޑަވުމެކެވެ. އެޕަލް އިން ޑައިނަމިކް އައިލެންޑް އެންމެ ފުރަތަމަ ތައާރަފްކުރީ 2022 ވަނަ އަހަރު އައިފޯން 14 ޕްރޯ މޮޑެލްތަކާއެކުގައި -- ފޮޓޯ: އެޕަލް މި ބޮޑު ބަދަލު ގެނައުމަށްޓަކައި އެޕަލް އިން ތައްޔާރުވަމުންދަނީ "އަންޑަ-ޑިސްޕްލޭ އިންފްރާރެޑް ސެންސަރު" ބޭނުންކުރުމަށެވެ. މީގެ ސަބަބުން ފޭސް އައިޑީ އަށް ބޭނުންވާ ސެންސަރުތައް ސްކްރީނުގެ އަޑީގައި ފޮރުވާލެވޭނެއެވެ. ނަތީޖާއެއްގެ ގޮތުން ސްކްރީނުގެ މަތިން ފެންނަން ހުންނާނީ ހަމައެކަނި ސެލްފީ ކެމެރާ ހިމެނޭ ކުޑަ ބައެކެވެ. އެޕަލްއިން ޑައިނަމިކް އައިލެންޑް އެންމެ ފުރަތަމަ ތައާރަފްކުރީ 2022 ވަނަ އަހަރު އައިފޯން 14 ޕްރޯ މޮޑެލްތަކާއެކުގައެވެ. އޭގެ ފަހުން އައި ކޮންމެ މޮޑެލްއަކަށް ކުދިކުދި ބަދަލުތައް ގެނައި ނަމަވެސް، އައިފޯން 18 ވެގެންދާނީ މި ފަރުމާއަށް އެންމެ ބޮޑު ބަދަލެއް އަންނާނެ މޮޑެލްއަށެވެ. މި އާ ފަރުމާގެ ސަބަބުން ފޯނުގެ ސްކްރީނުން އިތުރު ޖާގަ ލިބި، ވީޑިއޯ ބެލުމަށާއި ގޭމް ކުޅުމަށް އިތުރު ފަސޭހަތަކެއް ލިބިގެންދާނެއެވެ. ރިޕޯޓުތައް ބުނާ ގޮތުގައި މި އާ ޑިޒައިން 2026 އަދި 2027 ވަނަ އަހަރުގެ މޮޑެލްތަކުގައިވެސް ބޭނުންކުރާނެއެވެ. އެޕަލް އިން އައިފޯންގެ ސްކްރީނުގެ މަތީގައި ކެމެރާ އާއި ސެންސަރުތައް ހިމެނޭ ގޮތަށް "ނޮޗް" އެއް އެންމެ ފުރަތަމަ ތައާރަފްކުރީ 2017 ވަނަ އަހަރު ނެރުނު އައިފޯން އެކްސް އާއެކުގައެވެ. އޭގެ ފަސް އަހަރު ފަހުން، 2022 ވަނަ އަހަރު ނެރުނު އައިފޯން 14 ޕްރޯ މޮޑެލްތަކުގައި މި ނޮޗްގެ ބަދަލުގައި "ޑައިނަމިކް އައިލެންޑް" ތައާރަފްކުރިއެވެ. ޑައިނަމިކް އައިލެންޑަކީ ހަމައެކަނި ސެންސަރުތައް ފޮރުވައިދޭ ތަނެއްގެ އިތުރުން، އެކި އެޕްލިކޭޝަންތަކުގެ ނޮޓިފިކޭޝަންތަކާއި، މިއުޒިކް ކޮންޓްރޯލްތަކާއި، އަދި ޓައިމަރު ފަދަ "ލައިވް އެކްޓިވިޓީސް" މުއާމަލާތްކުރެވޭ ގޮތަށް ފަރުމާކޮށްފައިވާ އިންޓަރެކްޓިވް ބައެކެވެ. ޓެކްނޮލޮޖީ މާހިރުން ގަބޫލުކުރާ ގޮތުގައި އެޕަލްގެ އެންމެ ފަހުގެ އަމާޒަކީ ފޯނުގެ ސްކްރީނުގައި އެއްވެސް ކަހަލަ ލޯވަޅެއް ނުވަތަ ކަނޑައިނަގާފައިވާ ބައެއް ނެތި، "އޯލް-ސްކްރީން" ތަޖުރިބާއެއް ކަސްޓަމަރުންނަށް ފޯރުކޮށްދިނުމެވެ. އައިފޯން 18 ގައި ގެންނަން އުޅޭ ބަދަލަކީ މި އަމާޒަށް ދިއުމަށްޓަކައި އެޅޭ މުހިންމު ފިޔަވަޅެކެވެ. މީގެ ކުރިން ބައެއް އެންޑްރޮއިޑް ފޯނުތަކުގައި ސްކްރީނުގެ އަޑީގައި ކެމެރާ ފޮރުވުމުގެ ޓެކްނޮލޮޖީ ބޭނުންކޮށްފައިވީ ނަމަވެސް، އެޕަލް އިން މަސައްކަތް ކުރަމުންދަނީ ފޮޓޯގެ ފެންވަރަށް ބަދަލު ނާންނާނެހެން އަދި ފޭސް އައިޑީ ސެންސަރުތައް ފުރިހަމައަށް މަސައްކަތްކުރާނެ ގޮތަށް މި ޓެކްނޮލޮޖީ ފައްކާކުރުމަށެވެ.