ސަރުކާރުން ކައުންސިލްތަކުގެ ގާނޫނީ ވާޖިބު އަދާކުރުމަށް ހުރަސް އަޅާކަމަށް ބުނެ ރޭ ޑީއާރުޕީން މާލޭގައި ބޭއްވި މުޒާހަރާ އާއި މައުމޫނަށް ތާއީދު ކުރާ މީހުންނާއި އެމްޑީޕީ އެކްޓިވިސްޓުން މައުމޫން ދިރިއުޅުއްވާ ގެކޮޅު މ. އަލިވާގޭދޮށުގައި ހިނގި ހަމަނުޖެހުމުގައި ބައެއް ފުލުހުންނަށާއި އާންމުންނަށް އަނިޔާވެފައިވާތީ އެކަން ތަހުގީގުކޮށް ފިޔަވަޅުއަޅާނެ ކަމަށް ޕޮލިސްއިންޓެގްރިޓީ ކޮމިޝަނުން މިއަދު ބުނެފި އެވެ.
ޕޮލިސްއިންޓެގްރިޓީން މިއަދު އާންމު ކުރި ބަޔާނެއްގައި ބުނަނީ ރޭ މާލޭގައި ފުލުހުންނާއި ބައެއް ސިޔާސީ ފަރާތްތަކާއި ދެމެދު ހިނގައިދިޔަ ކުރިމަތިލުން ތަކުގައި ބައެއް ފުލުހުންނަށާއި އާންމުންނަށް އަނިޔާވެފައި ވާކަމަށެވެ. އަދި ބުނީ ފުލުހުންގެ ވާޖިބަކަށް ވާންވާނީ މުޖުތަމައުގައި އަމަން އަމާންކަން ގާއިމްކޮށް އެންމެހާ ރައްޔިތުންގެ ހައްގުތަށް ހިމާޔަތް ކޮށްދިނުން ކަމަށާއި ފުލުހުން އެއްވެސް ފަރާތަކުން ކުރާ ގައިރު ގާނޫނީ އަމަލަކަށް ތަބާވެގެން ނުވާނެ ކަމަށެވެ.
"ކުރިމަތިލުންތަކުގައި ސުލްހަވެރިކަން ގެއްލި ބައެއް ފުލުހުންނަށާއި، އާންމުންގެ ބަޔަކަށް އަނިޔާލިބިފައިވާކަން މި ކޮމިޝަނުން ހިތާމައާ އެކު ފާހަގަކުރަމެވެ. އަދި މި ކަންކަން ހިނގާފައިވާ ގޮތް މި ކޮމިޝަނުން ބެލުމަށްފަހު އެކަށީގެންވާ ފިޔަވަޅު އަޅާނެ ވާހަކަ ދަންނަވަމެވެ،" އިންޓެގްރިޓީގެ ބަޔާނުގައިވެ އެވެ.
ޕޮލިސް އިންޓަގްރިޓީން ވަނީ މުޖުތަމައުގެ އަމަން އަމާންކަން ގާއިމް ކޮށް ރައްކާތެރިކުރުމަށް އެންމެހާ ރައްޔިތުންވެސް ފުލުހުންނަށް އެއްބާރުލުން ދިނުމަށް ގޮވާލާފަ އެވެ. އަދި ދިމިގުރާތީ ރިވެތި އުސޫލުގެ މަތިން ފުލުހުންނާއި އެހެނިހެން ފަރާތްކުންވެސް މަސައްކަތް ކުރުމަށް ވެސް އިންޓެގްރިޓީ ކޮމިޝަނުން ވަނީ އިލްތިމާސް ކޮށްފަ އެވެ.
"... ދިމިގުރާތީ ރިވެތި އުސޫލުގެ މަތިން ސުލްހަވެރިކަމާއެކު މަޝްވަރާކޮށްގެން ގައުމީ ރޫހެއްގައި މަސައްކަތް ކުރެއްވުމަށް ފުލުހުންނާއި އެހެނިހެން ފަރާތްތަކަށް މިކޮމިޝަނުން އިލްތިމާސްކުރަމެވެ،" އެ ބަޔާނުގައިވެ އެވެ.
ކ.އަތޮޅު ކައުންސިލްގެ އިދާރާ ކ.ތުލުސްދުއަށް ބަދަލުކުރުމާއި ށ. އަތޮޅު ކައުންސިލްގެ އިދާރާ ށ ފުނަދުއަށް ބަދަލުކުރުމަށް އެ ދެ އަތޮޅުގެ އަތޮޅު ކައުންސިލުން ނިންމުމުން އެ ދެ ރަށުގައި ފުލުހުންނާއި އާންމު ރައްޔިތުންނާއި ދެމެދު ހިނގި ހަމަނުޖެހުންތަކުގައި ބައެއް ފުލުހުންނަށާއި އަދި އާންމުންނަށް އަނިޔާވެފައިވާތީ އެކަން ތަހުގީގުކޮށް ފިޔަވަޅު އަޅާނެ ކަމަށްވެސް ކޮމިޝަނުން ވަނީބުނެފަ އެވެ.