ބިލުތައް ނުދައްކައިގެން މިއަދު މެންދުރު ކަރަންޓު ކަނޑާލި އއ.އަތޮޅު ހޮސްޕިޓަލަށް ބިލުތައް ދައްކަން އެއްބަސްވުމުން ކަރަންޓު ދީފިއެވެ.
ސީއެންއެމަށް މައުލޫމާތު ދެއްވަމުން އއ.އަތޮޅު ހޮސްޕިޓަލު ހިނގުމައި މިވަގުތު ހަވާލުވެ ހުންނެވި ޒަމީރާ މުހައްމަދު ވިދާޅުވީ ހޮސްޕިޓަލުން ކަރަންޓު ކަނޑާލީ މިއަދު މެންދުރު 12 ޖަހާއެހާކަށްހާއިރު ކަމަށެވެ. އަދި ކަރަންޓު ދީފައިވަނީ ހަވީރު ހަތަރުގަޑި ބައި އެހާކަށްހާއިރުއެވެ. ޒަމީރާ ވިދާޅުވީ ހޮސްޕިޓަލުން ކަރަންޓު ކަނޑާލީ ވޭތުވެ ދިޔަ ތިން މަހުގެ ބިލު ނުދައްކައިގެން ކަމަށެވެ. ބިލުތަކަށް ޖުމްލަ 350000 ވުރެ ގިނަ ފައިސާ އަރާފައިވާ ކަމަށް ޒަމީރާ ވިދާޅުވިއެވެ.
24 ގަޑި އިރު ހިދުމަތް ދެމުން އަންނަ އަތޮޅު ހޮސްޕިޓަލަށް ކަރަންޓު ދެމުން ގެންދަނީ ރަސްދޫ ރައްޔިތުންގެ އިންޖީނުގެއިންނެވެ. ރައްޔިތުންގެ އިންޖީނުގެ ހިނގަމުން ގެންދަނީ އެރަށު ކައުންސިލުންނެވެ.
ސީއެންއެމަށް މައުލޫމާތު ދެއްވަމުން ރަސްދޫ ކައުންސިލު އިދާރާގެ ރައީސް ހަސަން މޫސާ ވިދާޅުވީ ހޮސްޕިޓަލުން ކަރަންޓު ކަނޑަލީ ވަރަށް ބޮޑަށް ވިސްނުމަށްފަހު އެނޫން ގޮތެއް ނެތިގެން ކަމަށެވެ.
"މިއަހަރު ފެށުނު ފަހުން ހޮސްޕިޓަލުގެ ބިލުތައް ދަނީ މިހާލެއްގައި. އަބަދުވެސް ތިން ހަތަރު ބިލު ނުދައްކާ އޮވޭ، އޭގެ ސަބަބުން ލިބޭ ގެއްލުން ވެސް ބޮޑު. މިހާރު ވެސް ނުދައްކާ ހުރި ފައިސާގެ އަދަދު ތިން ލައްކައަށް ވުރެ މައްޗަށްދޭ. އެއީ ގާތްގަނޑަކަށް އެއްމަހުގެ ތެލަށްވާ ފައިސާ،" ހަސަން މޫސާ ވިދާޅުވިއެވެ. އޭނާ ވިދާޅުވީ ހޮސްޕިޓަލަށް އަލުން ކަރަންޓު ދިނީ ހޮސްޕިޓަލުގެ އިސްވެރިންނައި ވާހަކަ ދެއްކުމަށްފަހު އިތުރު މުހުލަތެއް ވެސް ދިނުމަށްފަހު ކަމަށެވެ. އެގޮތުން ކުރިއަށް އޮތް ތިން ދުވަސް ތެރޭގައި އެފައިސާ ނުދައްކައިފިނަމަ އިތުރު ނޯޓިސްއެއް ނުދީ ކަރަންޓު ކަނޑާލާނެ ކަމަށް ހަސަން މޫސާ ވިދާޅުވިއެވެ.
ރަސްދޫގައި ހުންނަ އަތޮޅު ހޮސްޕިޓަލުން ދުވާލަކު ގާތްގަނޑަކަށް 20 އާއި 30 ދެމެދުގެ އަދަދަކަށް މީހުންނަށް ހިދުމަތްދެއެވެ.