ރާއްޖޭގައި މެރިކަލްޗަރ ކުރުމަށް ނުވަތަ ކަނޑުގޮވާންކުރުމަށް ރާއްޖެއާއި ރާއްޖެއިން ބޭރުގެ ޕްރޮފޯސަލްތައް ލިބިފައިވާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. މެރިކަލްޗަރ ދާއިރާއިން މިސަރަހައްދުގައި ބޮޑު ދައުރެއް އަދާކުރާ ތަނަކަށް ރާއްޖެ ހެދުމަކީ ސަރުކާރުގެ ޢަމާޒެކެވެ.
ރާއްޖޭގައި މެރިކަލްޗަރ ސިނާޢަތް ތަރައްޤީކުރަން ސަރުކާރުން ވަނީ 4 ސަރަޙައްދެއް ކަނޑައަޅުއްވާފައެވެ. އެއީ ބޮޑު ތިލަދުންމައްޗާއި، ރ.އަތޮޅާއި މ.އަތޮޅުގެ އިތުރުން ތ. އަތޮޅެވެ. މީގެއިތުރުން މަނިޔަފުއްޓާއި ގާތްގަނޑަކަށް 2 ކިލޯމީޓަރު ދުރުގައި އޮތް ފަޅެއްވެސް މިކަމަށްވަނީ ކަނޑައަޅާފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވީ، ރާއްޖޭގައި މެރިކަލްޗަރ ސިނާއަތައް އިންވެސްޓްކުރާނެ ދިވެހި އަދި ބޭރުގެ ބައެއް އިންވެސްޓަރުންވެސް މިހާރު ޝައުގުވެރިކަން ފާޅުކޮށްފައިވާކަމަށެވެ. މި ސިނާއަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގެ މަސްވެރިކަމުގެ ސިނާއަތް ސިންދަފާތުކުރާއިރު ވަރަށް ބޮޑަށް ކުރިއަރުވަން ބޭނުންވާ ދާއިރާއެއްކަމަށް ވަޒީރު ވިދާޅުވިއެވެ.
"އަޅުގަނޑުމެންނަށް މިހާރުވެސް އެބަހުރި މި ވާހަކަތައް ދެކެވޭތީއާއި އެކީގައި މެރިކަލްޗަރ ރާއްޖޭގައި ކޮމާޝަލް ސްކޭލްގައި ކުރާނެ ދިވެހިރާއްޖޭގެ އިންވެސްޓަރުންވެސް އެބަހުރި. އަދި ބޭރުގެ އިންވެސްޓަރުންވެސް އެބަތިބި. މިހާރުވެސް އަޅުގަނޑުމެންނާއި ހިސާބަށް އެކަމުގެ ބައިވަރު ޕްރޮފޯސަލްސް އެބައާދޭ. އެހެންވީމަ އަޅުގަނޑުމެންނަށް އެބައިނގޭ މިއީ ވަރަށް ޕޮޓެންޝިއަލް އޮތް ސިނާއަތެއްކަން އަދި ދިވެހިރާއްޖެއަށް ބޭރު ފައިސާ އިންތިހާއަށް ވައްދާނެ ސިނާއަތެއްކަން. އަޅުގަނޑުމެންވެސް ވަރަށް ބޮޑަށް ފޯކަސް ކުރާނެ ސިނާއަތެއްކަން." މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވިއެވެ.
މިމަސައްކަތްކުރާ އެހެން ޤައުމުތަކާ ބަލާއިރު މިކަން ކުރުމަށް ބޮޑެތި ލުއިތަކެއް ދިނުމަށް ސަރުކާރުންވަނީ ނިންމަވާފައެވެ. އެގޮތުން މިމަސައްކަތް ކުރުމަށް ރަސްމީކޮށް ކަނޑައަޅާފައިވާ 4 ސަރަޙައްދުން ނަގާ ބިމަށް ލޭންޑް އެކުއިޒިޝަނަށް ފައިސާ ނުނަގާގޮތަށާއި، ފުރަތަމަ 3 އަހަރުގެ ބިމު ކުލި ނުނެގުމަށްވަނީ ނިންމަވާފައެވެ. ހަމައެއާއެކު މިމަސައްކަތަށް ބޭނުންވާ ވަޞީލަތް ރާއްޖެ އެތެރެކުރުމަށް ޑިއުޓީ މާފުކުރުމަށްވެސް ސަރުކާރުންވަނީ ނިންމަވާފައެވެ.