މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ކުރިއަށް ގެންދާ "މަގޭ ސާފު ރާއްޖެ" ޕްރޮގްރާމް މ. މުލީގައި ފަށައިފިއެވެ.
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވީ، މިމަހުގެ 4 އިން 6 އަކަށް ކުރިއަށްދާ މި ޕްރޮގްރާމުގައި މ. މުލީ އަދި މުލަކުގެ ކޮމިއުނިޓީ ލީޑަރުންނަށް، ކުނި އެއްކުރުމާއި، ޕްރޮސެސްކުރުމާއި، ޑޭޓާ އެއްކުރުމާ ގުޅޭ ގޮތުން ތަމްރީނު ދޭނެކަމަށެވެ. އަދި އޮޕަރޭޝަނަލް ޕްރޮސީޖަރތަކާއި، ގޮނޑުދޮށް ސާފުކުރުމުގެ ހަރަކާތްތަކުގައި ބައިވެރިވާ ފަރާތްތަކަށްވެސް ތަމްރީނު ދޭނެކަމަށް އެ ވުޒާރާއިން ވިދާޅުވެއެވެ.
މި ޕްރޮގްރާމް ފެސިލިޓޭޓްކުރަނީ ވޭސްޓް މެނޭޖްމަންޓް ޑިޕާޓްމަންޓް، މޯލްޑިވްސް ކްލީން އެންވަޔަރަންމަންޓް ޕްރޮޖެކްޓް (އެމްސީއީޕީ)، އަދި ގްރޭޓަރ މާލެ އެންވަޔަރަންމަންޓަލް ވޭސްޓް މެނޭޖްމަންޓް ޕްރޮޖެކްޓްގެ ޓެކްނިކަލް މުވައްޒަފުނެވެ.
ތިމާވެއްޓާ ބެހޭ ވުޒާރާއިން ވިދާޅުވީ، ވޯލްޑް ބޭންކުގެ އެހީގައި ހިންގާ އެމްސީއީޕީ ޕްރޮޖެކްޓްގެ ދަށުން، މުލި އަދި މުލަކު ހިމެނޭހެން އިތުރު 17 ރަށާއެކު އައު ކުނި މެނޭޖްކުރާ މަރުކަޒުތަކާއި އިކުއިޕްމަންޓް ލިބޭ ރަށްތަކެއްކަމަށެވެ. އަދި މިއީ ޒޯން 4 އަދި 5 ގައި ދެމެހެއްޓެނިވި ކުނި އަދި ވަސީލަތްތައް މެނޭޖްކުރުމުގެ މަސައްކަތް ހަރުދަނާކުރުމަށް އެޅޭ މުހިންމު ފިޔަވަޅެއްކަމަށްވެސް އެ ވުޒާރާއިން ވިދާޅުވެއެވެ.
މި ޕްރޮގްރާމަކީ ރާއްޖޭގެ ތިމާވެށި ރައްކާތެރިކޮށް، ކުނި މެނޭޖްކުރުމުގެ ނިޒާމު ހަރުދަނާކުރުމަށް އެޅޭ މުހިންމު ފިޔަވަޅެއްކަމަށް އެ ވުޒާރާއިން ފާހަގަކުރެއެވެ. އަދި މިފަދަ ޕްރޮގްރާމްތަކުން ރަށްރަށުގެ ކޮމިއުނިޓީތަކަށް ބޭނުންވާ ހުނަރާއި މަޢުލޫމާތު ލިބި، ދެމެހެއްޓެނިވި ގޮތެއްގައި ކުނި މެނޭޖްކުރުމަށް މަގުފަހިވެގެންދާނެކަމަށް ތިމާވެއްޓާ ބެހޭ ވުޒާރާއިން ވިދާޅުވެއެވެ.
"މަގޭ ސާފުރާއްޖެ" ޕްރޮގްރާމަކީ ކުރިއަށް އޮތް 5 އަހަރު، ރާއްޖޭގައި ކުނި މެނޭޖުކުރުމާއި ވެށީގެ ސާފުކަން ދެމެހެއްޓުމަށް ކުރިއަށްގެންދާނެ މަސައްކަތްތަކާ ގުޅޭގޮތުން އެކުލަވާލި މަގުޗާޓެކެވެ. އެގޮތުން މި ކުނި މެނޭޖްކުރުމުގެ ޤައުމީ ސިޔާސަތާއެކު 2028 ވަނަ އަހަރު ނިމޭއިރު، ކުނީގެ މައްސަލައިގައި ރާއްޖެއަށް ބޮޑެތި ޙައްލުތަކެއް ހޯދޭނެކަމަށް އެ ވުޒާރާއިން ވިދާޅުވެއެވެ.
މި ސިޔާސަތުގައި މައިގަނޑު 12 ލަނޑުދަނޑިއެއް ޙާސިލްކުރުމަށް ހިމަނާފައިވެއެވެ. މީގެތެރޭގައި ރާއްޖޭގެ ރަށްތަކުގައި ކުނި މެނޭޖުކުރުމުގެ މަސައްކަތް ރާވާ ހިންގާނެ ގޮތާ، ތިމާވެއްޓާ ރަށްޓެހި ގޮތްތައް އަށަގެންނެވުމާއި މި މަސައްކަތުގައި އަމިއްލަ ވިޔަފާރިތައް ނުވަތަ ޕްރައިވެޓް ސެކްޓަރގެ އެހީތެރިކަން ހޯދުން ހިމެނެއެވެ.