އޮޅުހިޔާ (ކެޓް ޝެލްޓަރ) އަކީ މާލޭގައި ބުޅާ ގިނަވެ ކުރިމަތިވެފައިވާ އާންމު އުދަނގުލަށް ހައްލެއް ހޯދުމަށް މާލެ ސިޓީ ކައުންސިލުގެ އިސްނެގުމުގެ މަތިން ގާއިމު ކުރި ތަނެކެވެ. އޮޅުހިޔާ އަކީ މާލެ ސިޓީ ކައުންސިލުގެ ބަޖެޓުން ހަރަދުކޮށްގެން އެ ކައުންސިލުގެ މުވައްޒަފުން މަސައްކަތުން ނިންމާފައިވާ ތަނެކެވެ. ހުޅުމާލޭން ބިމެއް ހޯދާދިނުން ނޫން އެއްވެސް ކަމެއް އޮޅުހިޔާ ގާއިމުކުރުމަކަށް ސަރުކާރުން ކޮށެއް ނުދެއެވެ.
އޮޅުހިޔާ ގާއިމު ކުރެވުނީ އެކަން ކުރުމަށް މާލޭ ސިޓީ ކައުންސިލަށް އެނިމަލް ވެލްފެއަރ މިނިސްޓްރީން ފައިސާ ދީގެން ކަމަށް ބުނެ މިނިސްޓަރ ރަމީލާ ވެސް މީޑިޔާގައި ހަދާފައިވަނީ ބޮޑުވެގެންވާ ދޮގެކެވެ. އޮޅުހިޔާ ގާއިމުކުރަން އެ މިނިސްޓްރީ ބޮޑުލާރިއެއްވެސް ދިއްކޮށްލާފައެއްް ނުވެއެވެ. 
ކެޓް ޝެލްޓަރއަށް މަގުމަތީން ބުޅާތައް ބަދަލުކުރެވޭ ވަރަށް މައިގަޑު މަސައްކަތްތައް އެތަނުގައިވަނީ ވަނީ ނިމިފައެވެ. ކެޓްޝޭލްޓަރ ނުނިމޭ ނަމަ ރަސްމީގޮތުން ރައީސުލްޖުމްހޫރިއްޔާ އެތަން ހުޅުވާ ދިނުމުގެ ބޭނުމަކީ ކޮބާހެއްޔެވެ. އެކަމުގައިވެސް ރައީސް މުއިއްޒު ރައްޔިތުންނަށް އޮޅުވާލީހެއްޔެވެ. ވެރިކަމުގެ 52 ހަފްތާގައި ކުރެވުނު ކަމެއް ނެތުމުން މާލޭ ސިޓީކައުންސިލުގެ ހަރަދުގައި އެ އިދާރާގެ މުއައްޒަފުން ރެޔާދުވާލު ބުރަކޮށް ކުރިމަސައްކަތެއްގެ ކްރެޑިޓް އާދައިގެ މަތީން މުއިއްޒު ނެގީހެއްޔެވެ. 
އޮޅުހިޔާ ގާއިމުކުރުމަށް ސަރުކާރުން އެއްވެސް ހޭދައެއް ނުކުރިނަމަވެސް ބުޅާ ގެންގުޅެވޭ ވަރަށް މާލެ ސިޓީ ކައުންސިލުން އެތަން ނިންމީ މޭޔަރ އާދަމް އާޒިމުގެ ސީދާ ބެލުމުގެ ދަށުންނެވެ. މާލޭގައި ދިރިއުޅޭ މީހުން ބުޅަލުގެ އުނދަގުލުން ސަލާމަތްކޮށްދީ ރައްކާތެރި އަމާން ތަނަކަށް މާލެ ހެދުމަށް ކުރެވޭ މަސައްކަތުގެ ދަށުންނެވެ. މާލޭ ސިޓީ ކައުންސިލުން ކެޓް ޝެލްޓަރ ގާއިމުކުރީ އެތަން ހެދުމަށްފަހު އެތަން އެހެން ބައެއްގެ އަތްމައްޗަށް ދޫކޮށްލާކަށް ނޫނެވެ. ބުޅާތަކަށް އަމާން ރައްކާތެރި ވެއްޓެއް ގާއިމުކޮށްދީގެން އެތަން ބެލެހެއްޓުމަށެވެ.
މާލޭ މޭޔަރު އާޒިމް ވަރަށް ސާބިތުކަމާއެކު ވިދާޅުވަނީ " އެ ހަރަދު ވެސް އަޅުގަނޑުމެންނަށް ލިބެން އެބަޖެހޭ އެހެން ގޮތަކަށް ދަންޏާ، މިތަނުގެ (ސިޓީ ކައުންސިލް ގެ) ބަޖެޓުން، އެއްވެސް ބަޖެޓެެެއް މިތަނަކަށް ލިބިފަކާ ނެތް މިކަން ކުރުމަކަށް، ހަމަ ފުލީ މިތަނުގެ ބަޖެޓުން މިތާ މުވައްޒަފުން ހުރިހާ ކަމެއް ކުރީ، ފެސިލިޓީ ރެޑީކޮށް އެހުރީ، މިހާރު ބުޅާ ގެންދެވޭނެ، އެތާ ބުޅާ ބޭތިއްބޭނެ،" ކަމަށެވެ. ބުޅާ ފެސިލިޓީގެ މަސައްކަތް މިހާރު ނިންމާފައި އެހުރީ އެނިމަލް އެންޑް ވެލްފެއާ މިނިސްޓްރީ އާއެކު މާލެ ސިޓީ ކައުންސިލުން އެއްބަސްވި ގޮތަށްކަމަށް އާޒިމު ވިދާޅުވެއެވެ. އެހެން ނަމަވެސް އިރުކޮޅުކޮޅުން އައު ބަދަލު ގެންނަން ބުނާ ކަމަށްވެސް އާޒިމް ވިދާޅުވެ އެވެ. އަޅެފަހެ މިއީ ކޮންފަދަ ކުޅޭކުޅޭ ސަރުކާރެއް ހެއްޔެވެ. 
ހުޅުމާލޭގައި ހަދާފައިވާ "އޮޅުހިޔާ" ހުރީ ބުޅާ ގެންގުޅެވޭ ހާލަތެއްގައި ނޫން ކަމަށް ބުނެ މާލޭ ސިޓީ ކައުންސިލުން ކެޓް ޝެލްޓަރ ސަރުކާރުން ޖަހައިގަތީ ކެޓް ޝެލްޓަރގެ ތެރެއިންވެސް ބަޔަކަށް ލާރިގަނޑެއް ހޯދާ ދިނުމަށް ނޫން ދެވަނަ ކަމެއްގައެއް ނޫނެވެ. ރައީސް މުއިއްޒުގެ އައުވާނުންގެ ތެރެއިން ބަޔަކަށް ބައިއަޅައިގެން ކެޓް ޝެލްޓަރ ހިންގުން ނޫން ދެވަނަ އެއްވެސް ބޭނުމެއް ސިޓީ ކައުންސިލުން ކެޓް ޝެލްޓަރ އަތުލުމުގައި ނެތކަން ޔަގީނެވެ. 
ސަރުކާރުގެ އެއްވެސް އެހީތެރިކަމެއް ނެތި ޝެލްޓަރ ނިންމާ ބޭނުން ކުރެވޭ ވަރުވުމުން ޕްރޮގްރެސިވް ކޯލިޝަނުގެ ރިޔާސީ ޓިކެޓް ޖަހައިގެންހެން ކެޓް ޝެލްޓަރ ވެސް މުއިއްޒު ޖަހައިގަތީއެވެ. ކާޅު ހާލިހެދީމާ ކޮވެލި ބިސްއަޅާހެން ރައީސް މުއިއްޒަކީ މީހުން ކޮށްފައި ހުންނަކަންކަމަށް ވެރިވެގަނެގެން "މަ ބޮޑޭ" ހެދުމުގައި އެނދުކެނޑިފައި ހުންނަ މީހެކެވެ. ރައީސް ޔާމީނު ވިދާޅުވާހެން މިނިކާބާޒުގެ ކަމަކީ ޖަހައިގަތުމެވެ. ރައީސް ޔާމީނުގެ ރިޔާސީ ޓިކެޓް ޖަހައިގެން މިނިކާ ބާޒު މިފަހަރު އެޖަހައިގަތީ ސިޓީ ކައުންސިލްގެ ކެޓްޝެލްޓަރއެވެ.