އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުނި ނޯތު ކޯސްޓް ކޮންސްޓްރަކްޝަނަށް އެޑްވާންސްކޮށް ދިން 44 މިލިއަން ރުފިޔާގެ މައްސަލައިގެ ތަހްގީގު އަވަސްކުރަން ޕްރޮސެކިއުޓަރު ޖެނެރަލް އައްބާސް ޝަރީފް އަންގަވައިފިއެވެ.
އާސަންދައިގެ އާ އޮފީސް އިމާރާތްކުރުމަށް ހަމީދުގެ ނޯތު ކޯސްޓް ކުންފުންޏާ ހަވާލުކުރީ 147 މިލިއަން ރުފިޔާއަށެވެ. އަދި އެ މަސައްކަތުގެ އެޑްވާންސްގެ ގޮތުގައި އާސަންދައިން އެ ކުންފުންޏަށް 44 މިލިއަން ރުފިޔާ ދީފައިވީ ނަމަވެސް، އެ މަސައްކަތް ކުރިއަކަށް ނުދިޔައެވެ. އެހެންވެ އެ މައްސަލައިގައި ޖިނާއީ ތަހްގީގެއް ހިންގުމަށް ފުލުހުންނަށް ހުށަހަޅަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިދިޔަ އޮކްޓޯބަރު މަހުގެ ފަހުކޮޅު ނިންމިއެވެ.
ޕްރޮސެކިއުޓަރު ޖެނެރަލްގެ އޮފީހުން މިއަދު ބުނީ، މި މައްސަލައަކީ ދައުލަތާއި އާންމުންގެ މަސްލަހަތު އޮތް މައްސަލައެއް ކަމަށް ފެންނާތީ އެ މައްސަލައަށް އިތުރު ސަމާލުކަމެއް ދީ، މައްސަލަ ބެލުމަށް ހާއްސަ ތަހުގީގު ޓީމެއް އެކުލަވާލައި މައްސަލަ އަވަސްކުރަން ފުލުހުންނަށް ޕްރޮސެކިއުޓަރު ޖެނެރަލް އަންގަވާފައި ވާނެ ކަމަށެވެ.
އަދި ހަމީދުގެ ނޯތު ކޯސްޓް ކޮންސްޓްރަކްޝަނާ މި ބާވަތުގެ އިތުރު މަޝްރޫއެއް ހަވާލުކޮށްފައިވާ ނަމަ އެކަންކަން ތަހްގީގުކުރުމަށް ވެސް ފުލުހުންނަށް އެންގެވި ކަމަށް، ޕްރޮސެކިއުޓަރު ޖެނެރަލްގެ އޮފީހުން ބުންޏެވެ.
ނޯތު ކޯސްޓް ކޮންސްޓްރަކްޝަން ކުންފުންޏަށް ޑިސެމްބަރު 29، 2016 ގައި 61 މިލިއަން ރުފިޔާއަށް އާސަންދައިގެ ހަ ބުރީގެ ހޮސްޕިޓަލް އިމާރާތެއް އެޅުމަށް ހަވާލުކުރިއެވެ. އެ މަޝްރޫއުން ނޯތު ކޯސްޓަށް ތިން ޕަސެންޓް ޕްރޮފިޓް މާޖިންގެ ގޮތުގައި 18.3 މިލިއަން ރުފިޔާ ލިބޭނެ ކަމަށް އޭރު އަންދާޒާކުރި ނަމަވެސް އެ މަޝްރޫއުގެ މަސައްކަތް ނުފަށަނީސް ޖޫން 2017 ގައި އާސަންދަ އިން ވަނީ ބަޖެޓުގެ ދަތިކަމާ ހުރެ އެ މަޝްރޫއު މަޑުޖައްސާލަން އަންގައިފައެވެ.
އެ މަޝްރޫއު ހުއްޓާލަން ޖެހުމާ ގުޅިގެން ލިބުނު ގެއްލުމުގެ ބަދަލު ހޯދުމަށް ނޯތު ކޯސްޓް ކޮންސްޓްރަކްޝަނުން، ކުރީ ސަރުކާރުގައި ރައީސް އޮފީހަށް ހުށަހެޅިއެވެ.
ބަދަލުގެ ގޮތުގައި އާސަންދަ އިން އެ ކުންފުނީގެ އޮފީސް އިމާރާތުގެ މަޝްރޫއެއް 147 މިލިއަން ރުފިޔާއަށް ނޯތު ކޯސްޓް ކުންފުންޏަށް ދީފައެވެ. އަދި އޮފީސް އިމާރާތުގެ މަޝްރޫއުގެ އެޑްވާންސް ޕޭމަންޓްގެ ގޮތުގައި މިދިޔަ އަހަރު، ދެ ފަހަރެއްގެ މަތިން 44 މިލިއަން ރުފިޔާ ވަނީ ދީފައެވެ. ނަމަވެސް އެ އޮފީސް އިމާރާތުގެ އެއްވެސް މަސައްކަތެއް ކުރިއަށް ގެންގޮސްފައެއް ނުވެއެވެ.