އަންހެނުން އެކަނި ދަތުރުތައް ކުރުމާއި ބެހޭގޮތުން ބައެއް ކިޔުންތެރިން ސުވާލުކުރައްވައެވެ. އެހެންވެ މިގެނެސްދެނީ އެފަދަ ސުވާލުތައް ކުރައްވާ ކަނބަލުންނަށް ދީނުގައި އެކަން އޮތް ގޮތް އޮޅުންފިލާނެ ލިޔުމެކެވެ. އިން ޝާ ﷲ 
ﷲ ތަޢާލާގެ އަމުރުފުޅުތަކަށް ކިޔަމަންތެރިވަމާތޯއެވެ!؟  ޙަދީޘްފުޅުގައިވާފަދައިން މަޙްރަމަކާއި ނުލައި އަންހެނުން ދަތުރުފަތުރުނުކުރަމާތޯއެވެ! ކުރާ ހުރިހާ ޢަމަލުތަކެއްގައިވެސް ﷲ ތަޢާލާގެ އެންގެވުންތަކަށް ޢަމަލުކުރަމާތޯއެވެ! 
ޢިލްމުވެރިއަކު ވިދާޅުވެފައިވެއެވެ. "ދުނިޔޭގެ ހުރިހާ އަންހެނުން ފަތުރުވެރިންގެ ގޮތުގައި އެކަނި ދަތުރުކުރި ނަމަވެސް އެއީ ﷲ ތަޢާލާއަށް އީމާންވެގެން ހުރި އަންހެނަކަށް ހުއްދަ ކަމެއް ނޫނެވެ. އެހެނީ ރަސޫލް (ﷺ)ގެ ޙަދީޘްފުޅުގައި ވަނީ ﷲ ތަޢާލާ އާއި ޢާޚިރަތް ދުވަހަށް އީމާންވެގެން ހުރި އަންހެނަކު މަޙްރަމަކާއި ނުލައި އެއްވެސް ދަތުރެއް ނުކުރާނެ ކަމަށެވެ." 
މިބާވަތުގެ ކުށްތައް މިކުރެވެނީ އީމާންކަން ފަސާދަވުމުންނެވެ. އެކަން އެނގެނީ މަޙްރަމަކާއި ނުލައި ދަތުރުތައްކުރާ އަންހެނުން ޢުމްރާވެ، ނަމާދުތައް ކޮށް އަދި ދަމު ނަމާދުވެސް ކޮށް އުޅޭތީ އެވެ. އެކަންކަމުން އެމީހާގެ އީމާންކަން ފުރިހަމަ ނުވާކަން އެދަނީ އެނގިގެންނެވެ. ޢުމުރާ ފަދަ މަތިވެރި އަޅުކަމެއްގައި ނަމަވެސް، ބޭސްފަރުވާއަށް ދިއަ ނަމަވެސް އަދި ކިޔަވަން ދިއަ ނަމަވެސް މަޙްރަމަކާއި ނުލައި ނުކުރެވޭނެ ދިގުމިނުގެ ދަތުރުތައް އަންހެނަކު އެކަނި ކުރުން ހުއްދައެއް ނުވާނެއެވެ. އަދި މަޙްރަމަކު ގޮވައިގެން ކުރަންޖެހޭ ދަތުރެއް އަންހެނަކު އެކަނި ކުރެވިއްޖަނަމަ އެއީ ތައުބާވާން ޖެހޭނެ ފާފައެއް ވެސްމެއެވެ. 
ދުނިޔޭގެ ފަތުރުވެރިކަމުގައި މިހާރު އެންމެ ބާރަށް ކުރިއަރަނީ އަންހެނުން އެކަނި ކުރާ ދަތުރުތައް ކަމަށްވެ ކިތަންމެ ގިނަ އަންހެނުން އެކަނި ދަތުރުކުރިނަމަވެސް އިސްލާމް ދީނުގައި އެކަމަށް އޮތް ޙުކުމަށް އެއްވެސް ބަދަލެއް ނުއަންނާނެއެވެ. ދުނިޔެ ނިމެންދެންވެސް އެ ޙުކުމް ޙުކުމުގ ގޮތުގައި ދެމިއޮންނާނެއެވެ. ވީމާ ﷲ ތަޢާލާ އަށާއި އާޚިރަތް ދުވަހަށް އީމާންވެގެން ހުރި މީހަކު ނަމަ، ދުނިޔޭގެ ހުރިހާ އަންހެނުން އެކަނި ދަތުރުތައް ކުރި ނަމަވެސް އެމީހަކު ނުކުރާނެއެވެ. 
ބައެއް ޢިލްމުވެރިން ވަރަށް ޚާއްޞަ ޙާލަތްތަކާއި ގުޅުވައިގެން، އެނޫން އެއްވެސް ގޮތެއް ނެތިއްޖެ ނަމަ އަންހެނުން އެކަނި ދަތުރުކުރުން ހުއްދަ ކުރައްވައެވެ. އެއީ ބޭސްފަރުވާއަކަށް ދަތުރުކުރަންޖެހި، އެކުގައި ގޮވައިގެންދާނެ އެއްވެސް މަޙްރަމަކު ނެތުން ފަދަ ޙާލަތްތަކުގައެވެ. އެގޮތަށްވެސް ހުއްދަކުރައްވަނީ ޚާއްޞަ ޝަރުޠުތަކަކާއިވެސް އެކުގައެވެ.
ސައުދިއަރަބިޔާގައި އިސްލާމް ދީނުގެ ކަންކަމަށް ގެންނަމުންދާ "ޒަމާނީ" ބަދަލުތަކާއިއެކު އަންހެނުން މަހްރަމަކާއި ނުލައި ދަތުރުކުރުމަށް ކުރިން އަމަލު ކުރަމުން އައި ބައެއް އުޞޫލުތަކަށް ބަދަލު ގެނައުމުން ޒަމާނީ ބަދަލުތަކަށް ފައުޅުގައި ދެކޮޅު ހެއްދެވި އެތައް ހާސް ޢިލްމުވެރިންނާއިމެދު މިހާރު ވަނީ ތަފާތު ފިޔަވަޅުތައް އަޅައިފައެވެ. ކިތަންމެ ގިނަ ފިޔަވަޅުތަކެއް އަޅައި ކިތަންމެ ގިނަ ޢިލްމުވެރިންނަށް އަދަބު ދިން ނަމަވެސް އިސްލާމް ދީނުގެ އެއްވެސް ޙުކުމަކަށް އެއްވެސް ބަދަލެއް ގެނައުމުގެ ބާރު އެއްވެސް ފަރާތަކަށް ލިބިގެނެއް ނުވެއެވެ.
އަދިވެސް ވިސްނައިލުން މުހިންމު ކަމެއް ފާހަގަކޮށްލާނަމެވެ. ސަޢުދިޢަރަބިޔާއިން ލުޔެއް ދިނުމުން އެކަން ފާހަގަކުރާ ފަދައިން ހަމަ އެ ސަޢުދިޢަރަބިޔާގައި އިސްލާމް ދީނުގެ ޙުކުމްތައް ތަންފީޒުކުރަމުން ގެންދާއިރު އެކަންކަން ބަލައިގަންނަން ފަސްޖެހެނީ ކީއްވެގެން ހެއްޔެވެ؟ ސަޢުދިޢަރަބިޔާގައި އަދިވެސް ގެންދަނީ ދީނުގައިވާ ޙައްދުތައް ޤާއިމުކުރަމުންނެވެ.
އަދިކީއްހެއްޔެވެ؟ ފަތުރުވެރިކަން ފަދަ ދުނިޔަވީ އުފާ ޙާޞިލުކުރަން ކުރާ ދަތުރެއް މަޙްރަމަކާއި ނުލައި އަންހެނަކު ކުރަން، ދުނިޔެ ބަލައިގެންފައިވާ އެއްވެސް ދީނީ ޢިލްމުވެރިއަކު ހުއްދަ ދެއްވިކަން އެނގިފައެއް ނުވެއެވެ. ވީމާ މިފަދަ ކޮންމެކަމަކީވެސް ވިސްނައިލަން ޖެހޭނެ ކަންކަމެވެ.
 
- އިސްލާމީ ތިލަފަތުގެ ދަރުސަކުން