ބޮލީވުޑްގެ އެކްޓަރު އަކްޝޭ ކުމާރާ އެކު އެކީގައި ފުރަތަމަ ފަހަރަށް މަސައްކަތްކުރަން ނިންމި ފިލްމުން ބަތަލާ ރާނީ މުކަރުޖީ ވަކިވެއްޖެއެވެ. ފިލްމު "އޯ މައި ގޯޑެސް"ގެ ނަމުގައި އުފައްދާ މި ފިލްމުން ރާނީ ވަކިވެފައި ވަނީ ޑައިރެކްޓަރު އަމިތު ރާއީއާ ދެމެދު އުފެދުނު ޚިޔާލުތަފާތުވުންތަކާ ގުޅިގެން ކަމަށް ބައެއް މީޑިއާ ރިޕޯޓުތަކުން ބުނެއެވެ. ފިލްމު "އޯ މައި ގޯޑެސް" ކުޅުމަށް ރާނީ ކުރިން އެއްބަސްވި ނަމަވެސް ފިލްމުގެ މަސައްކަތުގައި ޑައިރެކްޓަރު އަމިތު ރާއީއާ, ރާނީއާ ދެމެދު ފަންނީ ޚިޔާލުތަފާތުވުންތަކެއް އުފެދުނީ، ފިލްމުގެ ސްކްރިޕްޓާއި ޕޯސްޓް-ޕްރޮޑަކްޝަންގެ ކަންކަން ރާނީ ބޭނުންވި ގޮތަށް ކުރިއަށް ނުގެންދެވުމުން ކަމަށް މީޑިއާތަކުން އަންނަނީ ބުނަމުންނެވެ. 2023ވަނަ އަހަރުގެ ފިލްމު "އޯ މައި ގޯޑް"ގެ މަންޒަރެއްގައި އަކްޝޭ ކުމާރު އަދި އެކްޓަރު ޕަންކަޖު ތުރިޕާޓީ--ފޮޓޯ/ޕިންކްވިލާ ފިލްމުގެ ޑައިރެކްޓަރާއި ރާނީއާ ދެމެދު އުފެދުނު ޚިޔާލުތަފާތުވުންތަކާ ގުޅިގެން އެ މައްސަލަ ހައްލު ކުރުމަށް އަކްޝޭ ވެސް މަސައްކަތް ކުރި ކަމަށް ބޮލީވުޑްހަންގާމާގެ ރިޕޯޓެއްގައި ބުނެފައިވެއެވެ. ނަމަވެސް ރާނީ އަދި ޑައިރެކްޓަރު އަމިތު ރާއީ ވެސް އެ މައްސަލައިގައި ދޫ ދޭން ބޭނުންނުވާތީ އެންމެފަހުން އަކްޝޭ ވެސް އެ މައްސަލަ ހައްލުކުރުމަށް ބޭނުންނުވީ ކަމަށް ރިޕޯޓުތަކުން ވަނީ ބުނެފައެވެ. ފިލްމު "އޯ މައި ގޯޑެސް" ކުޅެން ރާނީ އެއްބަސްވީ އެ ފިލްމުގެ ސްކްރިޕްޓް ވަރަށް ބޮޑަށް ކަމުދިއުމުންނެވެ. އެހެންނަމަވެސް ޑައިރެކްޓަރު އަމިތު އާއި ރާނީ ވަނީ ސުލްހަވެރިކަމާ އެކު ޖެހުނު މައްސަލައަށް ނިމުމެއް ގެނެސްފައި ކަމަށް މީޑީއާތަކުން ވަނީ ބުނެފައެވެ. ރާނީ މި ފިލްމު ދޫކޮށްލިއިރު ފިލްމުގެ ޕްރީ-ޕްރޮޑަކްޝަން މަސައްކަތް ނިމި އަންނަ މަހު ފިލްމުގެ ޝޫޓިންގް ފަށަން އާނަންދުގެ ޓީމުން ދިޔައީ ތައްޔާރުވަމުންނެވެ. އެހެންނަމަވެސް އެ ޓީމުން މިހާރު އަންނަނީ ސީނިއަ އެހެން ބަތަލާއެއް ހޯދުމުގެ މަސައްކަތް ފަށާފައި ކަމަށް ރިޕޯޓުތަކުން ބުނެއެވެ. ފިލްމު "އޯ މައި ގޯޑެސް" އަކީ 2012 ވަނަ އަހަރުން ފެށިގެން އަކްޝޭގެ ހާއްސަ ކެމިއޯ ރޯލްތަކެއް ބެލުންތެރިންނަށް ފެނިފައިވާ "އޯ މައި ގޯޑް"ގެ ތިން ވަނަ ފިލްމެވެ. މި ފްރެންޗައިސްގެ ދަށުން ގެނެސްދިން އެންމެފަހު ފިލްމު ސިނަމާތަކަށް ގެނެސްދިނީ 2023 ވަނަ އަހަރުއެވެ.