އަންނަ 4 އޭޕްރީލްގައި އޮންނަ ލޯކަލް ކައުންސިލްތަކުގެ އިންތިހާބުން ސަރުކާރު ބަލިކުރުމުގެ އިތުރަށް އެ އިންތިހާބާ އެކު އޮންނަ ފެންނަަ ނުފެންނަ ވޯޓުން ވެސް ސަރުކާރު ބޮޑުތަނުން ބަލިކުރަން ޖެހޭ ކަމަށް، ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ރޭ ވިދާޅުވެއްޖެ އެވެ.
ވީކިހިނެއް؟ - ރައްޔިތުންގެ މަޖިލިސް ޗުއްޓީގައި އޮތް ނަމަވެސް ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބާއްވަން ޖެހޭ ގޮތަށް ގާނޫނުއަސާސީ ބަދަލުކުރުމުގެ މަސައްކަތް މަޖިލީހުގައި ދަނީ ކުރަމުންނެވެ. އެ ގޮތުން:
އެ ކަމަށް މިހާރު ހިނގާ މަޖިލީހުގެ ދައުރު ކުރުކުރަން ޖެހޭތީ، ރައްޔިތުންގެ ފެންނަ ނުފެންނަ ވޯޓެއް ނެގުމަށް ގާނޫނުއަސާސީ ލާޒިމުކުރޭ
ސަރުކާރުން ނިންމާފައިވަނީ ކައުންސިލް އިންތިހާބާ އެކު ފެންނަ ނުފެންނަ ވޯޓު ނެގުމަށް ކަމަށް މެޖޯރިޓީ ލީޑަރު އިބްރާހީމް ފަލާހް ވިދާޅުވެފައިވޭ
ބުނީ ކީކޭ؟ - އެމްޑީޕީ ހަރުގޭގައި ރޭ ބޭއްވި ކެމްޕެއިން ޖަލްސާގައި ވާހަަކަ ދައްކަވަމުން މީކާއީލް ވިދާޅުވީ ގާނޫނުއަސާސީއަށް މި ސަރުކާރުން އިސްލާހުތައް ގެންނަމުން ދަނީ ސަރުކާރު ޖަވާބުދާރީކުރުވުމަށް އެކުލަވާލި މުޅި ނިޒާމު ގެއްލިގެންދާ ގޮތަށެވެ.
ސިޔާސީ ޕާޓީން ވަކިކުރުމުން ރައްޔިތުންގެ މަޖިލީހުގެ ގޮނޑި ގެއްލުވައިލެވޭ ގޮތަށް އެންމެ ދުވަހަކުން ގާނޫނުއަސާސީ ބަދަލުކުރި ކުރުމަށް އިޝާރާތްކުރައްވަމުން މީކާއީލް ވިދާޅުވީ "ސަރުކާރު ޖަވާބުދާރީކުރުވަން އޮތް އެންމެ ބޮޑު މުއައްސަސާގައި ތަޅުއެޅުވީ" ކަމަށެވެ.
ރައްޔިތުންގެ މަޖިލީހާއި ޖުޑީޝަލް ސާވިސް ކޮމިޝަން (ޖޭއެސްސީ)ގެ ކޮންޓްރޯލް އޮތުމުން، ސުޕްރީމް ކޯޓުގެ ކޮންޓްރޯލް ނަގަން މާ ގިނަ އިރުތަކެއް ވެސް ނުނެގި ކަމަށް އޭނާ ވިދާޅުވި އެވެ.
ރިޔާސީ އިންތިހާބާއި މަޖިލިސް އިންތިހާބު އެއްކުރުމަށް ވެސް ސަރުކާރުން މަސައްކަތްކުރަމުން ދަނީ ޖަވާބުދާރީކުރުވުމުގެ ނިޒާމު ނައްތާލަން ވެގެން ކަމަށް މީކާއީލް ވިދާޅުވި އެވެ. ރައްޔިތުން ނުދަންނަ ސަރުކާރަކަށް މެޖޯރިޓީ ދެވިދާނެ ގޮތަކަށް ނިޒާމު ބައްޓަންކުރަން ވެގެން ކަމަށެވެ.
މީގެ އިތުރުން، އެ ރެފެރެންޑަމަށް ރައްޔިތުން އަހުލުވެރިކުރުވުމަށް ލިބެނީ ވަރަށް ކުރު މުއްދަތެއް ކަމަށް ވެސް މީކާއީލް ވިދާޅުވި އެވެ.
"އެމްޑީޕީގެ ކެންޑިޑޭޓުން ކެމްޕެއިން ކުރިއަށް ގެންދަވާއިރު މި ރެފެރެންޑަމްގެ ކެމްޕެއިން ވެސް އެކުއެކީގައި ކުރިއަށް ގެންގޮސް، ރައީސް [މުހައްމަދު] މުއިއްޒު ބޮޑުކޮށް، ބޮޑުކޮށް މި އިންތިހާބުތަކުން ބަލިކޮށްލެއްވުމަކީ އަޅުގަނޑުގެ ވަރަށް ބޮޑު އެދުމެއް،" އޭނާ ވިދާޅުވި އެވެ.
ރައީސް މުއިއްޒަކީ ހުދުމުހުތާރު ވެރިއެއްކަން އެ މަނިކުފާނު އަމިއްލަފުޅަށް ދައްކަވަމުންދާ ކަމަށް މީކާއީލް ވިދާޅުވި އެވެ. އެ ގޮތުން:
ބޭރު ފައިސާ މާރުކުރުމަށް އެމްއެމްއޭން ހަދާފައިވާ ގަވާއިދެއް ވެސް ބަދަލުނުކުރައްވާނެ ކަމަށް ރައީސް މުއިއްޒު ޕޯޑިއަމެއްގައި ވިދާޅުވި
ރަށްރަށަށް ކުރެއްވި ދަތުރުތަކުގައި ބީއެމްއެލްގެ ކްރެޑިޓް ކާޑު ލިމިޓަކީ ވެސް ރައީސް އޮފީހުން ނިންމާ ކަމެއްގެ ގޮތުގައި އިލްތިމާސްކުރެއްވި
ސިވިލް ސާވިސް ކޮމިޝަނުގެ ވަކިވަކި ގަވާއިދުތައް އިސްލާހުކުރައްވަން، މާލެ އަވަށު ބައްދަލުވުންތަކުގައި ރައީސް އެންގެވުމެއްގެ ސިފައިގައި ވިދާޅުވި
ރައީސް މުއިއްޒުގެ ސަރުކާރު ބޮޑުތަނުން ލޯކަލް ކައުންސިލް އިންތިހާބުންނާއި ރެފެރެންޑަމުން ވެސް ބަލިކުރަން ޖެހެނީ އެހެންވެގެން ކަމަށް މީކާއީލް ވިދާޅުވި އެވެ.