ސްކޫލް ނިންމާ ދަރިވަރުންނަށް އިމާމުވެ ހުކުރުކޮށް ހުތުބާ ކިއުމުގެ ހުއްދަ ދިނުމަށް އިސްލާމީ ކަންތައްތަކާބެހޭ ވުޒާރާއިން ނިންމައިފިއެވެ.
މިކަން ހާމަކޮށް އިސްލާމީ ކަންތައްތަކާބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވީ ޒުވާން އިމާމުންނާއި ޚަޠީބުންނަށް ފުރުޞަތު ފަހިކޮށްދިނުމުގެ ގޮތުން ގްރޭޑް 10 ، 11 އަދި 12 ނިންމާފައިވާ ރީތިކޮށް ޤުރުއާން ކިޔަވާ، ނަމާދުގެ ފިޤުހަށް އަހުލުވެރި ދަރިވަރުންނަށް އިމާމުވެ ހުކުރުކޮށް ޚުޠުބާ ކިއުމުގެ ހުއްދަ ދޭން ނިންމާފައިވާކަމަށެެވެ.
މީގެ ކުރިން ވަޒީރު ޝަހީމް ވަނީ ރާއްޖޭގެ މިސްކިތްތަކުގެ އިމާމުންގެ ތެރެއިން މާސްޓާސް ހާސިލްކޮށްފައިވާ ފަރާތްތަކަށް ބޭރުގެ ޔުނިވާސިޓީއަކުން ޕީއެޗްޑީ ހާސިލްކުރުމުގެ މަޝްރޫއެއް ވަރަށް އަވަހަށް ފައްޓަވާނެ ކަމަށް ވިދާޅުވެފައެވެ.
އަދި މިސްރާއި ސައުދީ އަރަބިއްޔާއާއި މެލޭޝިޔާއާއި ބުރޫނާއި އަދި އިންޑޮނީޝިއާ އިން ތަމްރީނުގެ ފުރުސަތު އިމާމުންނަށް ހޯދައިދެއްވާނެ ކަމަށްވެސް ޑރ. ޝަހީމް ވިދާޅުވިއެވެ.
މިނިސްޓަރު ފާހަގަ ކުރެއްވިގޮތުންނަމަ، އެ މަޝްރޫގެ މަސައްކަތްތައް ހަލުވި ދުވެއްޔެއްގައި މިހާރު ކުރިޔަށް އެބަދެއެވެ. އިސްލާމީ ގައުމުތަކުން އިމާމުކަމުގެ ތައުލީމު އުނގެނުމަށް މަގުފަހި ކުރުމުގެ ގޮތުން އެތައް ގައުމަކާއި ވާހަކަދެކެވި، އިމާމުކަމުގެ ރޮނގުން ކުރިޔަށް ދިޔުމުގެ ފުރުސަތުތަކެއް ހުޅުވިފައިވާކަމަށްވެސް އެމަނިކުފާނު ވަނީ ވިދާޅުވެފައެވެ.
ޑރ. ޝަހީމް އިސްލާމީ ކަންތައްތަކާބެހޭ ވުޒާރާއާ ހަވާލުވެވަޑައިގެންނެވުމަށް ފަހު ގިނަ މަސައްކަތްތަކެއް ފެއްޓެވުމަށް އަމާުހިފާފައިވާއިރު އޭގެތެރޭގައި ފަތުވާ ކައުންސިލް އިތުރަށް ތަރައްގީކުރުމާއި އިސްލާމިކް ސްޓޫޑިއޯ ޓީވީ ސްޓޭޝަނަކަށް ބަދަލުކުރުމާއި، ގުރުއާނާއި ބެހޭ މަރުކަޒު އިތުރަށް ތަރައްގީ ކުރުމާއި ޒަކާތުގެ ފަންޑު އިތުރަށް ތަރައްގީކޮށް ޒަކާތު ހައުސް އުފެއްދެވުން ހިމެނެއެވެ.
އަދި ރާއްޖޭގެ އެކި ސަރަހައްދުތަކުގައި ހަދާފައިވާ އަދި ހަދަމުންދާ އިސްލާމީ މަރުކަޒުތައް މިހާރަށް ވުރެ ބޮޑަށް ރައްޔިތުންނަށް ބޭނުންކުރެވޭ ތަންތަނުގައި ގޮތުގައި ހެދުމާއި މިސްކިތު ފަންޑު ތަރައްގީ ކުރުމުގެ އިތުރުން ހައްޖު ފަންޑު ތަރައްގީކުރުމަށްވެސް ވަނީ ނިންމަވާފައެވެ.
ސްކޫލުގައި ކިޔަވާ ދަރިވަރުންނާއި ސްކޫލު ނިންމާ ދަރިވަރުންގެ ތެރެއިން ރީތިކޮށް ގުރުއާން ކިޔަވާ، އިމާމުވެ ނަމާދު ކުރުމަށް އަހުލުވެރި ކުދިންނަށް މިހާރު ވެސް ބައެއް ރަށްރަށުގައި އެ ފުރުސަތު ދެއެވެ. މާލެ ސަރަހައްދުގެ ބައެއް މިސްކިތް ތަކުގައި ވެސް ކުދިންނަށް އެ ފުރުސަތު ދެއެވެ.