އިދިކޮޅު ފަރާތްތަކުން އިންތިޒާމުކޮށްގެން އިއްޔެ މަޖީދީ މަގުގައި ބޭއްވި އިހުތިޖާޖު މިއަދު ވެސް ހަމަ އެ މަގުގައި ބާއްވާނެ ކަމަށް ބުނެފިއެވެ.
އިދިކޮޅު ފަރާތްތަކުން އިންތިޒާމުކޮށްގެން އިއްޔެ ހަވީރު 4:30 ފެށިގެން މަޖީދީ މަގުގައި ބޭއްވި އިހުތިޖާޖުގައި ގިނަ އަދަދެއްގެ ބަޔަކު އެ މަގަށް ނުކުމެ ބައިވެރިވެފައިވެއެވެ. އިއްޔެއާއި ރޭ ކުރި އެ މުޒާހަރާއިން މަޖިލީހުގެ ތިން މެންބަރަކާއި އިދިކޮޅު ބައެއް ޕާޓީތަކަށް ނިސްބަތްވާ ބައެއް އިސްފަރާތްތައް ހައްޔަރުކޮށްފައިވެއެވެ.
އިހުތިޖާޖުން ހައްޔަރުކޮށްފައިވަނީ ހެންވޭރު އުތުރު މެންބަރު އަބްދުﷲ ޝާހިދާއި ކިނބިދޫ ދާއިރާގެ މެންބަރު އަބްދުﷲ ރިޔާޒާއި ދިއްދޫ ދާއިރާގެ މެންބަރު އަބްދުއްލަތީފު މުހައްމަދެވެ. ދެން ހައްޔަރު ކުރި މީހުންގެ ތެރޭގައި އެމްޑީޕީ ޒުވާނުންގެ ގޮފީގެ ރައީސް މީކާއީލް ނަސީމާއި އެޕާޓީގެ ގައުމީ މަޖިލިހުގެ ބައެއް މެންބަރުން ހިމެނެއެވެ.
އެމްޑީޕީގެ ރަސްމީ ޓްވީޓަ އެކައުންޓުންކޮށްފައިވާ ޓްވީޓެއްގައި ބުނެފައިވާ ގޮތުގައި އިހުތިޖާޖު ހުއްޓުމެއް ނެތި މިއަދު ވެސް 4:30 ގައި އޮންނާނެއެވެ. 5 Fandiyaarunge Hukum Thanfeez kurey! Yameen Isthiufaa!#Ihuthijaaj huttumeh nethi 3/3 (Sat) haveeru 4:30 gai Majeedhee Magu gai kuriah dhaane— MDP Secretariat (@MDPSecretariat) March 2, 2018
އިދިކޮޅު ފަރާތްތަކުން އިންތިޒާމުކޮށްގެން މަޖީދީ މަގުގައި މުޒާހަރާ ކުރާއިރު ހޯމް މިނިސްޓްރީން ވަނީ ކުރިން ހުއްދަ ހޯދުމަކާ ނުލާ ކާނިވާ ސަރަހައްދު ފިޔަވައި މާލޭގެ އެހެން ތަންތަނުގައި މުޒާހަރާ ނުކުރެވޭ ގޮތް ހަދާފައެވެ.