ނެޝިނަލް ޑްރަގް އޭޖެންސީ (އެންޑީއޭ) އިން ފަރުވާ ހޯދާ ފަރާތްތަކަށް، އެސްޓީއޯއިން ވަޒީފާގެ ފުރުސަތު ފަހިކޮށްދިނުމަށްޓަކައި މިއަދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި އެސްޓީއޯގެ ފަރާތުން ސޮއި ކުރެއްވީ، އެސްޓީއޯގެ މެނޭޖިންގ ޑިރެކްޓަރ އަޙްމަދު ޝަހީރު އެވެ. އަދި އެންޑިއޭގެ ފަރާތުން ސޮއި ކުރެއްވީ އެންޑީއޭގެ ސީއީއޯ ހަސަން ޝަހީލް އެވެ.
އެސްޓީއޯއިން މައުލޫމާތުދިން ގޮތުގައި، މިއެއްބަސްވުމުގެ ދަށުން 4 ފަރާތަކަށް ވަޒީފާގެ ފުުރުސަތު ދިނުމަށް ވަނީ ހަމަޖެހިފައެވެ.
މި ރަސްމިއްޔާތުގައި ވާހަކަދައްކަމުން،  ޝަހީރު ވިދާޅުވީ އެސްޓީއޯއިން މިއެއްބަސްވުމުގައި ސޮއި ކުރުމުގެ އެންމެ ބޮޑު ބޭނުމަކީ ޑްރަގްގެ ވަބާގައި ޖެހިފައިވާ ފަރާތްތަކަށް އެންޑީއޭގެ ރިހެބްލިޓޭޝަން ޕްރޮގްރާމްގައި ބައިވެރިވެ ފަރުވާ ހޯދުމަށްފަހު މުޖުތަމައުއަށް އެ ފަރާތްތަށް ނިކުތުމަށް މަގު ފަހިކޮށްދިނުން ކަމަށެވެ.
އަދި ތަޖުރިބާއަށް ބެލުމަށްފަހު މުސްތަގުބަލުގައި އިތުރު ފަރާތްތަކަށް މި ފުރުސަތު ދޭނެކަމަށްވެސް، ޝަހީރު ވިދާޅުވިއެވެ.
އެންޑީއޭގެ ސީއީއޯ ޝަހީލް ވަނީ، މިއަދު މި ސޮއި ކުރެވުނު އެއްބަސްވުމުގެ ސަބަބުން އެންޑީއޭއިން ފަރުވާ ހޯދަމުން އަންނަ ފަރާތްތަކަށް މުޖުތަމައުއަށްް އެނބުރި ނުކުތުމަށް އިތުރު ހިތްވަރެއް ލިބިގެންދާނެ ކަމަށް ވިދާޅުވެފައެވެ. އަދި އެންޑީއޭއިން ކުރާ މަސައްކަތްތަކަށް އެސްޓީއޯއިން ދޭ އެއްބާރުލުމަށް ޝުކުރު ޝަހީލް ވަނީ ޝުކުރު އަދާކޮށްފައެވެ.
މީގެ ކުރިންވެސް އެސްޓީއޯއިން ވަނީ އެންޑީއޭއިން ހިންމަފުށީގައި ހިންގާ ޑްރަގް ޓްރީޓްމަންޓް އެންޑް ރީހެބްލިޓޭޝަން ސެންޓަރގެ ވޮކޭޝަނަލް ތަމްރީން ކޯސް ތަކަށް ބޭނުންވާ ތަކެތި ފޯރުކޮށްދީފައެވެ.