ބަންދުގައި ބަހައްޓައިގެން ހޯމް މިނިސްޓަރު އުމަރު ނަސީރު ކޯޓަށް ހާޒިރުކުރުމަށް ކްރިމިނަލް ކޯޓުން ނެރެފައިވާ އަމުރާ އެެއްގޮތަށް މާދަމާ އުމަރު ކޯޓަށް ހާޒިރުކުރާނެ ކަމަށް ކޮމިޝަނާ އޮފް ޕޮލިސް ހުސައިން ވަހީދު ވިދާޅުވެއްޖެ އެވެ.
ވީނިއުސް އަށް މިއަދު ދެއްވި އިންޓަވިއުއެއްގައި ސީޕީ ހުސައިން ވަހީދު ވިދާޅުވީ ފުލުހުންގެ މައްޗަށް ނެރޭ ކޯޓު އަމުރު ތަންފީޒުކުރުމުގައި ވަކި މީހަކަށް ބަލައިގެން ފުލުހުން މަސައްކަތް ނުކުރާނެ ކަމަށެވެ.
"އެގޮތުން އަޅުގަނޑުމެން، އަޅުގަނޑުމެންގެ ވަޒީރު ވެސް މާދަމާ ކޯޓަށް ހާޒިރުކުރާނަން. ފުލުހުންނަށް އަންނަ އަމުރުތައް ތަންފީޒުކުރާނަން އިނގޭތޯ،" ސީޕީ ވިދާޅުވި އެވެ.
ފުލުހުންނަށް އަމުރުތައް ނެރޭ އަދި ފުލުހުން ޖަވާބުދާރީވާންޖެހޭ ވަޒީރަކީ ހޯމް މިނިސްޓަރު ކަމަށްވާތީ ހޯމް މިނިސްޓަރު ބަންދުގައި ބަހައްޓައިގެން ކޯޓަށް ހާޒިރުކުރެވިދާނެތޯ ދެންނެވުމުން ސީޕީ ވިދާޅުވީ މިނިސްޓަރު އުމަރު ހުންނެވީ ކޯޓު އަމުރާ އެއްގޮތަށް ފުލުހުންނަށް އެއްބާރުލުން ދެއްވާ ގޮތަށް ކަމަށެވެ.
"އަޅުގަނޑުމެންގެ ވަޒީރަކީ އެހާ ވިސްނުން ކޮށި ބޭފުޅެއް ނޫން. އަޅުގަނޑުމެންގެ ވަޒީރު އަޅުގަނޑުމެންނަށް އައިސްފައި މިވާ އަމުރަށް ފުރިހަމައަށް ކޯޕަރޭޓް ކުރައްވާނެ،" ސީޕީ ވިދާޅުވި އެވެ.
އުމަރުގެ މައްޗަށް ދައުލަތުން ކުރާ ދައުވާގެ އަޑުއެހުމެއް މާދަމާ ހެނދުނު 11:30 ގައި ކްރިމިނަލް ކޯޓުގައި ވަނީ ތާވަލްކޮށްފަ އެވެ.
އުމަރު ބަންދުކޮށްގެން ކޯޓަށް ހާޒިރުކުރުމަށް އަމުރު ނެރުނީ އޭނާގެ މައްޗަށް ދައުލަތުން ކުރާ ދައުވާއާއި ގުޅިގެން ކޯޓަށް ހާޒިރުވެވަޑައިނުގަންނަވާތީއާއި ކޯޓަށް އެއްބާރުލުން ނުދެއްވާ މައްސަލައިގައި ކަަމަށް އެނގިފައިވެ އެވެ. ނަމަވެސް ހޯމް މިނިސްޓްރީން ބުނީ އުމަރު ކޯޓަށް ވަޑައިނުގަންނަވަނީ ނޫން ކަމަަށާއި، ރަސްމީ ދަތުރުތަކެއްގައި ރާއްޖޭގައި ބޭރުގައި އުޅުއްވާތީ ކޯޓަށް ވަޑައިނުގެންނެވީ ކަަމަށެވެ. އަދި އުމަރު ރާއްޖެއިން ބޭރަށް ވަޑައިގެންނެވީ ކޯޓަށް އެންގުމަށްފަހު ކަމަށް ވެސް ހޯމް މިނިސްޓްރީން ބުނެ އެވެ.
އުމަރު ބަންދުކުރުމުގެ އަމުރެއް ކްރިމިނަލް ކޯޓުން ނެރުނީ އޭނާ ރަސްމީ ދަތުރެއްގައި ނެދަލޭންޑްސް އަށް ފުރާވަޑައިގެންފައިވަނިކޮށެވެ. އަދި މިދަތުރު ނިންމަވާލެއްވުމަށްފަހު އުމަރު މާލެ ވަޑައިގެންނެވީ މިއަދު މެންދުރުފަހު އެވެ.
އުމަރުގެ މައްޗަށް ކުރާ ދައުވާގައި ބުނަނީ ޖެނުއަރީ 23، 2012 ގައި އެމްއެމްއޭ ކައިރީގައި މުޒާހަރާ ކުރި މީހުންނާ މުހާތަބުކޮށް މުޒާހަރާގެ ހަރަކާތްތައް ބަދަލުކޮށްލުމަށާއި އެގޮތަށް ހަރަކާތްތައް ބަދަލުކޮށްލުމުން އެ ހަރަކާތްތައް ރައީސް އޮފީސް ކައިރީގަ އާއި ރައީސް އޮފީހަށް ބޭރުގެ ޑިޕްލޮމޭޓުން ދާ ގަޑީގަ އާއި އދ.ގެ މަންދޫބަކު އެއާޕޯޓަށް ފައިބައި ގަޑީގަ އާއި އދ. އޮފީސް ކައިރީގަ އާއި އެމްއެންބީސީ ކައިރީގައި ކުއްލިކުއްލިއަށް ހިނގާނެ ކަމަށް އުމަރު ވިދާޅުވެފައިވާ ކަމަށެވެ.
އަދި އެގޮތަށް ކަންތައްކޮށް ސިފައިންނަށް ދަތި ކުރުމަށާއި އެ ހަރަކާތަށް ބޭނުން ވަނީ 2000 ވޮލަންޓިއަރުން ކަމަށް ވިދާޅުވި އިރު އެ 2000 މީހުން ވަކި އިންތިޒާމެއްގެ ދަށުން އެ ހަރަކާތް ހިންގައި ދިވެހި ސިފައިން ވަރުބަލި ކުރުމަށްފަހު 12 ފޫޓުގެ 50 ހަރުގަނޑު ބޭނުންކޮށްގެން ދިފާއީ ބާރުގެ މައި މަރުކަޒުގެ ތެރެއަށް އެއްފަހަރާ ވަންނާނީ ކަމަށް ދޭހަވާ ގޮތަށް ވިދާޅުވެ ރާއްޖޭގެ އަމަންއަމާން ކަމަށް ގެއްލުން ލިބިދާނެ ވާހަކަ ދައްކަވާފައިވާ ކަމަށެވެ. ނަމަވެސް އުމަރު ވަނީ އޭނާގެ މައްޗަށް ކުރާ ދައުވާއަށް އިންކާރުކުރައްވާފަ އެވެ.
މި ދައުވާ ސާބިތުވެއްޖެނަމަ ދެވޭ އަދަބަކީ ގިނަވެގެން 150ރ. އިން ޖޫރިމަނާ ކުރުން ނުވަތަ ހަ މަހަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ އަރުވާލުން ނުވަތަ ގޭ ބަންދު ކުރުމެވެ.