މިނިސްޓަރ އޮފް ހޯމް އެފެއާރޒް އުމަރު ނަސީރު ބަންދުގައި ބަހައްޓައިގެން ކޯޓަށް ހާޒިރުކުރަން އަމުރު ނެރެފައި ވަނިކޮށް މިއަދު އުމަރު ރާއްޖެ ވަޑައިގެންފިއެވެ.
ނެދަލޭންޑްސްއަށް ކުރެއްވި ފަތުރުފުޅު ނިންމަވާލެއްވުމަށްފަހު މިއަދު މެންދުރު އުމަރު ރާއްޖެ ވަޑައިގެންފައިވާއިރު ކްރިމިނަލް ކޯޓުންވަނީ މާދަމާ ހެނދުނު 11:00 އަށް އުމަރު ބަންދުކޮށްގެން ކޯޓަށް ހާޒިރުކުރަން ފުލުހުންގެ މައްޗަށް އަމުރު ނެރެފައެވެ. މި އަމުރު ކްރިމިނަލް ކޯޓން ނެރުނީ އުމަރުގެ މައްޗަށް ދައުލަތުން ކުރާ ޖިނާއީ ދައުވާގެ ޝަރީއަތަށް އުމަރު ހާޒިރު ނުވުމުންނެވެ.
މި ކަމާއި ގުޅޭ ގޮތުން ފުލުހުންގެ މީޑިއާ އޮފިޝަލް ވިދާޅުވީ މިއަދު ވިދާޅުވީ ކޯޓަކުން ފުލުހުންގެ މައްޗަށް އަމުރެއް ނެރެފިނަމަ އެ އަމުރެއް ތަންފީޒުކުރަން ފުލުހުން މަސައްކަތް ކުރާނެ ކަމަށެވެ.
" ފުލުހުންނަށް އަމުރެއް އައިސްފިނަމަ އެގޮތަކަށް އަމަލުކުރާނަން. މިއީ އަޅުގަނޑުމެން ދަންނަވަން އޮތް އެއްޗަކީ" އޭނާ ވިދާޅުވިއެވެ.
މީހުން ބަންދުގައި ބަހައްޓައިގެން ކޯޓަށްހާޒިރުކުރުމަށް ފުލުހުންގެ މައްޗަށް އަމުރު ނެރުނު ނަމަވެސް ފުލުހުން އެމީހަކު ހައްޔަރުކުރަނީ ކޯޓަށް ދިއުމަށް ފުލުހުންނަށް އެއްބާރުލުން ނުދޭ ހާލަތްތަކުގައި ކަމަށް މައުލޫމާތު ލިބެއެވެ. ބަންދުގައި ބަހައްޓައިގެން މީހަކު ކޯޓަށްހާޒިރުކުރަންޖެހިއްޖެނަމަ ކޯޓަށް އެ މީހަކު ދާންޖެހޭ ގަޑިއެއްގެ އެއްގަޑި އިރު ކުރިން ފުލުހުންގެ އިދާރާއަށް ހާޒިރުވާން އަންގާ އެ މީހަކު ފުލުސްއޮފީހަށް ހާޒިރުވުމުން ފުލުހުން އެ މީހަކު ކޯޓަށް ގެންދަނީ ފުލުހުންގެބެލުމުގެ ދަށުން ކަމަށް ވެސް މައުލޫމާތު ލިބެއެވެ.
އުމަރު ބަންދުކުރަން އަމުރު ނެރުނީ އެ މައްސަލައިގެ ޝަރީއަތުގެ ދެއަޑުއެހުމަކަށް އުމަރު ހާޒިރުވެ ވަޑައިނުގެން ވަނިކޮށް ތިން ވަނައަޑުއެހުމަށް ހާޒިރު ނުވެއްޖެ ނަމަ އުމަރާ މެދު ފިޔަވަޅު އަޅުއްވާނެ ކަމުގެއިންޒާރު ގާޒީ އަބްދުﷲ ދީދީ ދެއްވުމަށްފަހުއެވެ. މީގެ އިތުރުން ގާޒީ ވިދާޅުވީ ދަތުރަށް ފުރައި ވަޑައިގަންނަވަން ޖެހޭނީ ކޯޓަށް ހާޒިރުވުމުގެ އަމުރާ ހަވާލުވުމަށް ފަހު ކަމަށް ގަބޫލު ނުކުރައްވާ ކަމަށެވެ.
އުމަރުގެ މައްޗަށް ދައުލަތުން ދައުވާ ކުރަނީ ކުރީގެ ރައީސް މުހައްމަދުނަޝީދުގެ ސަރުކާރުގެ ދުވަސްވަރު، އޭރުގެ އިދިކޮޅު ފަރާތްތަކުންކުރިމުޒާހަރާއެއްގައި ދައުލަތުގެ އަމާންކަމަށް ގެއްލުން ލިބިދާނެފަދަވާހަކަދެއްކެވި ކަމަށް ބުނެއެވެ. ނަމަވެސް އެ ދައުވާއަށް އެނާވަނީއިންކާރު ކުރައްވާފައެވެ.