ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އިސްތިއުފާ ދެއްވައިފިއެވެ.
މިކަން ހާމަކުރައްވާ އެކްސްގައި ކުރެއްވި ޕޯސްޓެއްގައި ފަޒުލް ވިދާޅުވީ އެޗްޑީސީގެ އެމްޑީގެ މަގާމުގައި ހޭދަކުރި މުއްދަތުގައި، އެކި އެކި ޕްލެޓްފޯމްތަކުގައި އޭނާއާމެދު ކުރަމުންދާ ތުހުމަތު ތަކަށް އިންކާރު ކުރައްވާ ކަމަށެވެ.
ފަޒުލް ވިދާޅުވީ ކުންފުނީގެ ފަރާތުން މިހާތަނަށް ކޮށްފައިވާ އެންމެހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާ ކުންފުނީގައި ހެދިފައިވާ ޕޮލިސީގެ އިމުގެ ތެރެއިން ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތައް ކަމަށެވެ.
ފަޒުލް އިތުރަށް ވިދާޅުވީ ބިންވެރިޔާ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫންކަމަށާއި، އެދެނީ އެ ތުހުމަތު ތަކުގެ ހަގީގަތް ވީ އެންމެ އަވަހަކަށް ރައްޔިތުންނަށް ހާމަވުމަށް ކަމަށެވެ.
އެއާއެކު ފަޒުލް ވިދާޅުވީ މި ތަހުގީގަށް ފުރުސަތު ދިނުމުގެ ގޮތުންނާއި، ކުންފުންޏާއި ސަރުކާރުގެ ސިޔާސަތު ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން އެޗްޑީސީގެ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވީ ކަމަށެވެ.
ފާހަގަކޮށްލެވޭ ގޮތުގައި ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ސޯޝަލް މީޑިއާގައި އާންމުވެފައި ވަނިކޮށް ފުލުހުން ވަނީ ފަޒުލް ރަޝީދަށް އަދި އެއްވެސް ތުހުމަތެއް މިހާތަނަށް ނުކުރެވޭ ކަމަށް ބުނެފައެވެ.
އެގޮތުން ފުލުހުން ބޭއްވި ނޫސްވެރިންގެ ބައްދަލުވުމުގައި ބުނީ، މިހާރު މި މައްސަލައިގައި ކުރާ ތަހުގީގުގައި 6 މީހަކާ ސުވަލުކޮށްފައިވާ ކަަމަށާއި އެމީހުންގެ ތެރޭގައި އެޗްޑީސީގެ އެއްވެސް މުވައްޒަފެއް ނުހިމެނޭ ކަމަށެވެ. އަދި މި މައްސަލައިގައި ފަޒުލްއަށް އާންމުންގެ ގިނަ ބަޔަކު ތުހުމަތު ކުރަމުން އައި ނަމަވެސް ތަހުގީގަށް އެފަދަ ތުހުމަތެއް ކުރެވޭ ފަދަ ކަމެއް ފާހަގަވެފައި ނުވާ ކަަމަށް ފުލުހުން ބުނެއެވެ.
އަދި މަގާމުގެ ނުފޫޒު ބޭނުން ކޮށްގެން ވެސް ކަމެއް ހިންގާފައި ވޭތޯ ބަލާނެ ކަމަށް ވެސް ފުލުހުން ބުނެފައި ވެއެވެ. އެފަދަ ކަމެއް ތަހުގީގަށް ފާހަގަ ވެއްޖެ ނަމަ އެކަން ބަލާނެ ކަމަށާއި އެ ތުހުމަތު އެފަރާތަކަށް އިއްވާނެ ކަމަށް ވެސް ފުލުހުން ބުނެފައި ވެއެވެ.
މި މައްސަލަ އާ ގުޅިގެން އެފަޒުލް ރަޝީދު ސަސްޕެންޑްކޮށް އަދި ބޯޑުން ވެސް، އޭނާ ވަނީ ވަކިކޮށްފައެވެ. އެންމެ ފަހުން އެޗްޑީސީގެ ޗެއާމަން ކަމަށް އައްޔަންކުރި އަހްމަދު ނާސިފް (ޑީޑީ) ފިޔަވައި ހުރިހާ ބޭފުޅުން މިއަދު ވަނީ ސަސްޕެންޑް ކޮށްފައެވެ.