ދުބާއީ ކުންފުންޏެއް ކަމަށްވާ ސަމާނާ ޑިވެލޮޕާސް އިން ހދ.އަތޮޅުގައި 600 މިލިއަން އެމެރިކާ ޑޮލަރުގެ (ގާތްގަނޑަކަށް 9.3 ބިލިއަން ރުފިޔާގެ) ރިސޯޓެއް ހަދަން ނިންމައި ޕްރޮޖެކްޓް އިއުލާން ކޮށްފިއެވެ.
ސަމާނާ ޑިވެލޮޕާސް އިން މިހަފްތާގައި ދުބާއީގައި އިއުލާން ކުރި ޕްރޮޖެކްޓްގެ ތަފްސީލް ހާމަކުރަމުން އެކުންފުނިން ބުނެފައި ވަނީ މިއީ 190 ވިލާ ހުންނާނެ ރިސޯޓެއް ކަމަށެވެ. އޭގެތެރޭގައި ބީޗް ފްރަންޓް ވިލާތަކާއި އޯވާ ވޯޓާ ބަނގަލޯތަކުގެ އިތުރުން ޕޫލް ސައިޑް އެޕާޓްމަންޓްތައް ވެސް ހިމެނޭނެ ކަމަށް އެކުންފުނިން ބުނެއެވެ.
ބައިނަލްއަޤުވާމީ މީޑިއާ ރިޕޯޓްތައް ބުނާ ގޮތުގައި ސަމާނާ އޯޝަން ވިއުގެ ނަމުގައި ފަށާ ޕްރޮޖެކްޓްގެ ދަށުން ހަދާ ރިސޯޓަށް ހަނިމާދޫ އެއާޕޯޓުން 20 މިނެޓް ލޯންޗް ދަތުރެއް ކޮށްފައި ދެވޭނެއެވެ. ސީޕްލޭންގައި މިރިސޯޓަށް މާލެ އިން ދާން ހޭދަވާނީ 45 މިނެޓް ކަމަށް ވެސް ރިޕޯޓްތައް ބުނެއެވެ. މަޝްހޫރު ކުންފުންޏެއް ކަމަށްވާ އެލީ ސާބް އިން ޑިޒައިން ކުރާ ރިސޯޓްގެ މަސައްކަތް 2029 ވަނަ އަހަރު ނިންމައި ހިދުމަތައް ހުޅުވާލެވޭނެ ކަމަށް އުއްމީދު ކުރެވެއެވެ.
ސަމާނާ ޑިވެލޮޕާސް އަކީ ދުބައީގެ ހަތްވަނަ އަށް އެންމެ ބޮޑު ޑިވެލޮޕަރެވެ. އެކުންފުނިން މިހާރު ވެސް ހާހަކަށްވުރެ އެޕާޓްމަންޓް ނިންމައި ކަސްޓަމަރުންނާއި ހަވާލުކޮށްފައި ވާއިރު މިހާރު ވެސް ދިހަހާސް ޔުނިޓެއްގެ މަސައްކަތް ކުރިއަށް އެބަދެއެވެ.