ފާއިތުވި ހަތަރު ދުވަހުގެ ތެރޭގައި އިންޑިއާގެ އިރުއުތުރުގައި ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން 34 މީހަކު މަރުވެފައިވާ ކަމަށް ކަމާބެހޭ ފަރާތްތަކާއި މީޑިއާތަކުން ބުނެފި އެވެ.
މޫސުމާ ބެހޭ ގައުމީ އިދާރާއިން ވަނީ އިތުރަށް ބޯކޮށް ވާރޭ ވެހޭނެ ކަމަށް ލަފާކޮށްފަ އެވެ.
ހިމާލިއާ ސްޓޭޓްގެ ސިއްކީމްގައި ތާށިވެފައި ތިބި ހާހަކަށް ވުރެ ގިނަ ޓޫރިސްޓުން އިއްޔެ ސަލާމަތްކޮށްފައިވާ ކަމަށް ސަރުކާރުން ނެރުނު ބަޔާނެއްގައި ބުނެފައިވެ އެވެ. ފެންބޮޑުވި ސަރަހައްދުތަކުގައި ތާށިވެފައި ތިބި 500އަށް ވުރެ ގިނަ މީހުން ސަލާމަތް ކުރުމަށް އެހީވުމަށް މެގަލަޔާ ސްޓޭޓްގައި އަސްކަރިއްޔާގެ ރެސްކިއު ޓީމްތައް ވަނީ ހަރަކާތްތެރިވެފަ އެވެ.
އަވަށްޓެރި ބަންގްލަދޭޝްގެ އިރުއުތުރުގެ އަވަށް، ސިލްހެޓްގައި ބިންގަނޑު ކަނޑައިގެން ދިއުމުގެ ސަބަބުން އާއިލާގެ ހަތަރު މީހަކު ވަނީ މަރުވެފަ އެވެ. އޭގެ އިތުރުން، އާދީއްތަ ދުވަހު ވަނީ ފަރުބަދަމަތީ އަވަށްތައް ކަމަށްވާ ރަންގަމަޓީ، ބަންދަރުބާން އަދި ހަގްރަޗަރީގައި އެތައް ސަތޭކަ ބޯހިޔާވަހިކަމަކަށް މަގުފަހިކޮށްދީފަ އެވެ.
އިތުރު ބިންގަނޑުތައް ކަނޑައިގެން ދިއުމާއި ފެންބޮޑުވުމުގެ ހާދިސާތައް ހިނގައިދާނެ ކަމުގެ އިންޒާރުދީ، ނުރައްކާ ބޮޑު ސަރަހައްދުތަކުގައި ދިރިއުޅޭ މީހުން ސަމާލުވުމަށް ކަމާ ބެހޭ ފަރާތްތަކުން ވަނީ އިލްތިމާސްކޮށްފަ އެވެ.
އިންޑިއާގެ އިރު އުތުރު އަދި ބަންގްލަދޭޝްއަށް ކުރަމުންދާ ވިއްސާރައިގައި ބިންގަނޑު ކަނޑައިގެން ދިއުމާއި ފެންބޮޑުވުމުގެ ހާދިސާތައް ހިނގަމުންދާ އިރު، އެކަމުގެ އަސަރު އަހަރަކު އެތައް މިލިއަން ބަޔަކަށް ކުރެ އެވެ.
އާސާމްގެ ސިލްޗަރު ސިޓީގެ މަގުތަކާއި ގެތައް ވަނީ އަޑިއަށް ގޮސްފަ އެވެ. ނިއުސް އެޖެންސީ އޭއެންއައިން އާންމު ކުރި ފޮޓޯތަކުން ފެންނަ ގޮތުގައި މަގުތަކަށް ވަނީ ގަސްތައް ވެއްޓި، މަގުތައް ބަންދުވެފަ އެވެ. 
"އަޅުގަނޑުމެންނަށް ވަރަށް ގިނަ ދަތިތައް ކުރިމަތިވަމުން އެބަދޭ. އަހަރެންގެ ކުއްޖަކު ހުރޭ، އެ ކުއްޖާގެ އެނދު އޮތީ ފެނު އަޑީގައި. މިހާލަތުގައި އަހަރެން ކުރަންވީ ކީއް؟ މުޅި ރޭ ހުރީ ހޭލައި،" ސިލްޗަރުގެ ރަށްވެއްސަކު ބުންޏެވެ.