ނައިބު ރައީސް ހުސެއިން މުހައްމަދު ލަތީފު އެކުވެރި އަރަބި އިމާރާތަށް ކުރައްވާ ރަސްމީ ދަތުރެއްގައި ފުރާވަޑައިގެންފި އެވެ.
ނައިބު ރައީސް ޔޫއޭއީއަށް ފުރާވަޑައިގެންނެވީ މިރޭ އިރާކޮޅު އެމިރޭޓްސްގެ ފުލައިޓަކުންނެވެ. އެމަނިކުފާނު މިހާރު ހުންނެވީ އެ ގައުމުގަ އެވެ.
ރައީސް އޮފީހުން ބުނީ އެމަނިކުފާނު ޔޫއޭއީއަށް ވަޑައިގެންނެވީ އެ ގައުމުގެ ދުބާއީގައި މި މަހުގެ 11، އިން 13، އަށް ކުރިއަށްދާ 'ގްލޯބަލް ގަވަމަންޓްސް ސަމިޓް" ގައި ދިވެހި ސަރުކާރުގެ ފަރާތުން ބައިވެރިވެޑައިގަތުމަށް ކަމަށެވެ.
ދުނިޔޭގެ ގައުމުތަކުން ވެރިންނާއި އިސް އޮފިޝަލުން ބައިވެރިވާ މި ސަމިޓަކީ ސަރަހައްދީ ގައުމުތަކާއި، ބައިނަލްއަގުވާމީ ޖަމާއަތްތަކާއި، ވަކި ވަކި ފަރުދުންގެ މެދުގައި އެއްބާރުލުން އިތުރުކޮށް، ކުރިމަތިވާ ގޮންޖެހުންތަކަށް ހައްލުތައް ހޯދުމަށް ބާއްވާ ސަމިޓެކެވެ.
ސަމިޓުގައި ނައިބު ރައީސްގެ އިތުރުން ދިވެހި ވަފުދެއް ބައިވެރިވާކަން ރައީސް އޮފީހުން ސާފުކޮށްދީފައެއް ނުވެ އެވެ.
އެ އޮފީހުން އިތުރަށް ބުނީ ސަމިޓުގެ ތެރެއިން މޫސުމީ ބަދަލުތަކާ ބެހޭ ފޯރަމެއްގައި ނައިބު ރައީސް ހުސެއިން ވާހަކަދައްކަވަން ހަމަޖެހިފައިވާ ކަމަށެވެ.
ސަމިޓުގެ ހަވާސާގައި އެމަނިކުފާނުގެ އެހެން ގައުމުތަކާއި ބައިނަލްއަގުވާމީ ޖަމާއަތްތަކުގެ ވެރިންނާ ބައްދަލުކުރައްވާ އެމި ދާއިރާތަކާ ގުޅޭގޮތުން މަޝްވަރާކުރައްވާނެ އެވެ.
‎ޔޫއޭއީގައި މިދިޔަ އަހަރު ބޭއްވި މި ސަމިޓުގެ އަދަދުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގެންނެވި އެވެ. އެ ދަތުރުގައި ދިވެހި ސަރުކާރުގެ އިސް ވަފުދެއްވެސް ބައިވެރިވެވަޑައިގެންނެވި އެވެ.