"ތިބާގެ މައިންބަފައިން ދުނިޔޭގައި ތިބިހާ ހިނދަކު އަޅާލާ އެހީތެރިވެދޭށެވެ. ވަގުތުދޭށެވެ. ކޮންމެވެސް ދުވަހަކުން ސޯޝަލް މީޑިއާއިން ވަގުތެއްވެގެން ބަލައިލާއިރު އެމީހުން ފެންނަން ނެތުމުން ހިތާމަކުރަން ޖެހިދާނެއެވެ. އޭރުން އޮންނާނީ ލަސްވެފައެވެ. ވަގުތު ފާއިތުވެފައެވެ." *** ހަމްޒާގެ މަންމަ މަރްވާ ގެންދިޔައީ ދުވަސްކޮޅަކަށް މިރިއަމްގެ ސިކުނޑިއަށް އަރާމު ލިބޭނެކަމުގައި ކިޔާފައެވެ، މިފަހަރު އެއްވެސް ވަރަކަށް މިރިއަމް ދަރިފުޅާއިހެދި މައްސަލަ ޖައްސާނުލިތާ އެކުއްޖާގެ ޚަބަރެއް އޮޅުންފިލުވަންވެސް ސުވާލެއް ނުކުރިއެވެ. ހަމްޒާގެ ހިތަށް އަސަރުކުރިއެވެ. ނަމަވެސް އެ ފުރުސަތުގެ ބޭނުންހިފާ އޭނަ ގަސްތުކުރީ އިތުރު ފިޔަވަޅެއް އެޅުމަށެވެ. ސިކުނޑިއާއި ހިތަށް ކިރިޔާވެސް ހަމަޖެހުމެއް ލިބޭނެ ހަމައެކަނި ގޮތަކީ އެއީއެވެ. އޭނަ މަންމައާއި މަޝްވަރާކުރުމާއެކު އެކަމާއި ނުރުހުނެވެ. "ހަމްޒާ.....ނޮޓް ޕޮސިބަލް...ދަރިފުޅުވެސް މިހާރު މޮޔަވީތަ؟ މިރިއަމްއާއެކު އުޅެ އުޅެ...." "މަންމާ ވަރަށް ބަލިމީހުންވެސް އުމްރާއަށްދޭ..ބަރަކާތްތެރި ބިމަކަށް ދެވިގެން ބަލިން ފަސޭހަވާ މީހުންގެ ވާހަކަ ދެކެވޭ......ލޮލަށް ނުފެންނަ މީހަކަށް ފެނުމުގެ ނިއުމަތް ލިބުނު..ކެންސަރުގެ އެންމެ ފަހު ސްޓޭޖްގައި ހުރި މީހަކު ބަލިން ފަސޭހަވި...އެންމެ ފަހުގެ ފުރުސަތަކަށް އުމްރާގެ އަޅުކަން ފުރިހަމަކުރަން ބޭނުންވީ...އެކި ސަބަބުތަކާހުރެ ލަސްކުރިޔަސް މިރިއަމް ދެވަނަފަހަރަށް ގެންދާނެކަމަށް ބުނެ ވައުދުވެފައި އޮތްކަމެއް...މަރްވާވެސް މަންމަ ގާތުގައި ހުރީމަ ދާންކަމަށް ނިންމީ........" "ތިއީ ރަގަޅު ޚިޔާލެއްނޫން ހަމްޒާ. މާ ބޮޑަށްވެސް ލަސްވެއްޖެ......އެތަނަށްގޮސް މިރިއަމް މީހުންގަނޑުގެ ތެރެއަށް ގެއްލިއްޖެއްޔާ ޒިންމާވާނީ ކާކުތަ؟" "އަޅުގަނޑު އަމިއްލައަށް....ޕްލީޒް މިފަހަރު ނުހުއްޓުވާ. ނޫނީ މުޅި އުމުރަށް ގިލްޓީވާނެ...." ހަމްޒާ ގޮތުގައި ހިފެހެއްޓިއެވެ. ރުމައިސާ އިރުކޮޅެއްވާންދެން ހަމްޒާގެ މޫނަށް ނަޒަރު ހުއްޓާލައިގެން ހުރިއިރު އެ ފިޔަވަޅާއިމެދު ހިތާމަކުރިއެވެ. އޭނަގެ ދަރިފުޅަށް ހަނާންފަދަ ފުރިހަމަ އަންބަކު ލިބިފައިހުއްޓާ މިރިއަމްގެ ފަރާތަށް ލެނބުނީ ކޮންކަމެއް ފެނިގެންހެއްޔެވެ؟އެކުއްޖާ މޮޔަވީމަވެސް ހަމްޒާއަށް ފަހަތުން ނުނެއްޓިގެން އުޅެން ޖެހޭ ސަބަބެއް ނޭގެއެވެ. *** ހަމްޒާއަކީ ޑޮކްޓަރަކަށްވުމުން އޭނަ ސައިންސަށްް އިތުބާރުކުރެއެވެ. ސްކޭންތަކާއި ބަލިދެނެގަތުމަށް ބޭނުންކުރާ އެއްޗެއްސަށްވެސް މެއެވެ. ޑެމިންޝިއާ މަޑުމަޑުން ރަހުމެއްނެތި އޭނަގެ އަންހެނުންގެ ސިކުނޑި ކަމުން ދިޔައިރު ބައެއްފަހަރު އިލްމުގެވެސް ބާރެއްނެތްކަން އޭނައަށްވަނީ ދަސްވެފައެވެ. ބައެއް ދުވަސްދުވަހު އޭނަގެ މޫނަށް ބަލަން ހުރެފައި ސުވާލުކޮށްލާނެއެވެ. "އައިމް ސޮރީ..ކުރިން ދެމީހުން ދިމާވިތަ؟" "އާނ...."އޭނަ ހިތްހަލާކުވިޔަސް ހީލައެވެ."ކިތަންމެ ފަހަރަކު..." އުމްރާއަށް ދާ ވާހަކަ ބުނުމުން މިރިއަމްގެ މޫނުމައްޗަށް އެހާ ބޮޑު ބަދަލެއްނައެވެ."އެހާ ދުރަށް ދަނީ ކީއްވެ؟" "ހަމަޖެހުން ލިބުމަށް އެދި ﷲއަށް ދަންނަވަން...." ހަނދާންތައް ވަކިވަމުން ދިޔަސް ހަމްޒާއަށް އިތުބާރުކުރާފަދަ ގޮތަކަށް އެއްބަސްވުމުގެ ގޮތުން ބޯ ޖަހައިލިއެވެ. ހަރަމްފުޅަށް ވަދެވުމާއެކު މިރިއަމްގެ ފިޔަވަޅުތައް ހުއްޓުނެވެ. އޭނަގެ އަތުގައި ހިފަހައްޓައިލެއް ބާރުކަމުން ބަލައިލެވުނެވެ. "އަހަރެންގެ ހިތް މިހާވަރަށް ފުރުނީ ކީއްވެ؟"މިރިއަމްގެ އަޑު ޖަޒުބާތީވިއެވެ. "ސަބަބަކީ ﷲތައާލާގެ ގެކޮޅަާއި ހަމަޔަށް އާދެވުނީމަ..." މިރިއަމްއަށް ގެފުޅު ފެނުމާއެކު ލޮލުން އޮހިގަތް ކަރުނަތައް ކޯތާފަތް މައްޗަށް ފައިބަން ފެށީ ހިފެހެއްޓުމެއްނެތިއެވެ."ކުރިން މިތަނަށް އައިން..." "އާނ...."ހަމްޒާއަށް މަޑުމަޑުން ބުނެވުނެވެ."މަރްވާއަށް ބަނޑުބޮޑުއިރު..." "ކީއްވެ މަރްވާ ނުގެނައީ؟ ދެރަވާނެއްނު...ދަރިފުޅު ހުރިނަމަ....އަޅެ..." "ދެން ފަހަރަކުން އިންޝާﷲ..." "އާނ.....މިހާރު ހަނދާންވެއްޖެ ނަމާދުކުރާގޮތް..ދުޢާތައްވެސް....بِسْمِ اللَّهِ وَاللَّهُ أَكْبَرُމިހެން ކިޔާފައި ދޯ ތަވާފުކުރަން ފަށަންވީ..ހަމްޒާ.....ބަލާލަބަލަ.....އެހެރީ.......އެހެރީނު ގްރީން ލައިޓް..."މިރިއަމް އަތުން އިޝާރާތްކޮށްލީ ހިނިތުންވެލަމުންނެވެ. އެ އުފާވެރިކަމާއި ޖޯޝުންވެސް އޭނަގެ ހިތަށް ތަސައްލީ ލިބުނެވެ. ތަވާފުގައިވެސް ހުރިހާ ދުޢާތަކެއް ކިޔަމުން ދިޔައިރު އޭނައަށް ގަބޫލުކުރަން ދަތިވިއެވެ. "މިހުރިހާ ދުޢާތަކެއް ހަނދާން އެބަހުރި؟" އޭނައަށް އަހައިލެވުނެވެ. "ހުރިހާ އެއްޗެއް ހަނދާނެއްނެތް..އެކަމަކު ﷲ ތައާލާ ހުރިހާކަމަކަށް ކުޅަދުންވަންތަ..ކިޔަމުންދާއިރު ހަމަ ކިޔެނީ..."މިރިއަމްއަށްވެސް ހައިރާންކަމެއްލިބުނެވެ. އުމްރާގެ އަޅުކަމުގައި މިރިއަމްގެ ސިކުނޑި ކޮންމެވެސް ވަރަކަށް ހަމަޔަށް އެޅި އުފާވެރިކަންވެސް މޫނުން ފެނުނެވެ. ޔަގީނުންވެސް އެ މާހައުލުގެ ރަގަޅު އަސަރު ކުރިއެވެ. މިރިއަމް ތަވާފު އަދި ސައުޔުވެސް ފުރިހަމަކުރިއެވެ. ޒަމްޒަމް ފެން ވީ އޭނައަށް ކަމުދިޔަ ބުއިމަކަށެވެ. މައްކާއާއި މަދީނާގެ މަގުތަކުގައި ހިނގައިލުމުންވެސް މިރިއަމްގެ ތުންފަތުން ހިނިތުންވުން ފެނުނެވެ. ގިނަވަގުތު ގުރުއާން ކިޔަވަން އަދި ނަމާދުކުރުމުގައި ހޭދަކުރިއެވެ. ހަގީގަތުގައި ހަމްޒާ އުއްމީދުކުރިވަރަށްވުރެ މާ ބޮޑުތަންވެސް ރަގަޅެވެ. އޭނަ ﷲއަށް ހަމްދުކުރިއެވެ. މަދީނާއަށް ދިޔަރޭ ދަމުނަމާދަށް ހޭލައްވަން އޭނަގެ އަތުގައި ހިފާ ތަޅުވައިގަތެވެ."އަވަހަށް ތެދުވޭ...އަހަރެމެން ތަހައްޖުދު ދޫކޮށްލައިގެން ނުވާނެ...." "މިރިއަމް ކުރިންވެސް ތިހެން ބުނަމެއްނު..."އޭނައަށް ހެވުނުއިރު ލޮލުން ކަރުނަވެސް އައެވެ. "އަސްލުވެސް؟" "އާނ...އަބަދުވެސް އަހަރެންގެ ހުރިހާ ކަމަކާއި އަޅައިލި..." ރަސޫލުސައްލަﷲ އަލައިވަސައްލަމްގެ މަސްޖިދުލް ނަބަވީގެ ކުޑަތަކުގެ ދަށުގައި ގުރުއާން ކިޔަވަން ތިބެފައި މިރިއަމް އޭނަގެ ކޮނޑުގައި ބޯ އަޅައިލިއެވެ. "އަހަންނަށް މިތަނުން ސަލާމަތްކަމާއި ރައްކާތެރިކަން ލިބެނީ ކީއްވެ؟" "މިއީ ރަހުމަތާއި އަމާންކަން ލިބިގެންވާ ތަނަކަށްވީމަ.." "ޕްރޮމިސް މީ...އަހަރެން ހަމްޒާގެ މަތިން ހަނދާން ނެތުނަސް އަހަރެން ދޫކޮށްލާފައި ނުދާނެކަމަށް...." އޭނަ މިރިއަމްގެ އަތަށް ބާރުކޮށްލިއެވެ."މި އިމްތިހާނުގެ މާކުރިން އަހަރެން އަމިއްލަ ނަފުސަށް ވައުދުވެފައި އޮތީ...ދުވަހަކު މިރިއަމް ދޫކޮށްނުލާނަން އިންޝާﷲ.." އެދުވަސްކޮޅު މިރިއަމް އަބަދުހެން އުފާވެފައި ހުރިކަން އޭނައަށް ފާހަގަވިއެވެ. ކޮންމެ ނަމާދެއްފެ ފަހުގައި ﷲއަށް ހަމްދުކޮށް ދުޢާކުރެއެވެ. އޭނައަށާއި ދަރިފުޅަށް އަދި އާއިލާއާއި އެކުވެރިންނަށެވެ.މިރިއަމްގެ މަންމައަށްވެސް މެއެވެ. އޭނަގެ މޫނުގައި ހިފަހައްޓައިލުމަށްފަހު ބަލަހައްޓައިގެން އިނެވެ." ހަމައެކަނި ރީތީއެއް ނޫން..އެހާ ރަގަޅު ފިރިހެނެއް...." "މިރިއަމް އަހަންނަށް ރަގަޅުވާން ދަސްކޮށްދިނީ.."އޭނަ ހިނިތުންވެލީ އިޚުލާސްތެރިކަމާއެކުގައެވެ. މައްކާއިން ފުރި ދުވަހު މިރިއަމް ބުނި އެއްޗަކުން އޭނަގެ ހިތަށް ފިނިކަމާއެކު ވޭނެއްވެސް ލިބުނެވެ."ﷲތައާލާ މިއަޅާއަށް އަމިއްލަ ނަފުސް އަނބުރާ ދެއްވި....ކުޑަ ދުވަސްކޮޅަކަށް ނަމަވެސް....ﷲތައާލާއަށް ހަމްދުކުރަން...މިހާ ރަަގަޅު ފިރިއެއް ދެއްވިކަމަށްޓަކާ......" އޭނަގެ ލޮލުން ކަރުނަ ހިލުނެވެ. ބަލި އަލުން އެނބިރި އަތުވެދާނެއެވެ. ބައެއްފަހަރު މިފަދަ ވަގުތުތަކަކީ އަބަދަށް ދެމިގެންވާނެ އެއްޗެއް ނޫނެވެ. ދުނިޔޭގެ ހުރިހާ އެއްޗެއްފަދައިންނެވެ. ވަގުތީ ފާލަމަކަށް ވީމަ ކޮންމެ އުފަލެއްވެސް ވާނީ ވަގުތީ އެއްޗަކަށެވެ. އެވަރުން ހަމްޒާއަށް ފުދުނެވެ. އޭނަވެސް ﷲ ތައާލާއަށް ހަމްދުކުރިއެވެ. *** މާލެއަށް އައުމާއެކު މިރިއަމްގެ ހަނދާނަށް އަނދިރި ފަރުދާއެއް ވައްޓައިލެވުނެވެ. މިރިއަމްގެ ނަޒަރުން ފެންނަމުން ދިޔައީ މުޅިން އެހެން މަންޒަރުތަކެވެ. "އެހެން ކޮންމެވެސް ފިރިހެނަކު އަހަރެމެން ގެ ގޭގައި ދިރިއުޅެމުން އެބަދެއެވެ. އެއީ ކާކުހެއްޔެވެ؟ އޭނަ އަހަންނަށް ބަލަމުން ދަނީ އަހަރެންގެ ހުރިހާ ސިއްރެއް އެނގިގެން ބަލަމުންދާހެންނެވެ. އެކަމަކު އަހަންނަށް އެ ސިއްރުތައްވެސް ފެންނަމުން ދަނީ ފުސްކޮށެވެ. އޭނައަށް އަހަރެންގެ މޭގައި ވިންދުޖަހަމުންދާ ހިތުގެ އަޑޔވެސް އިވޭފަދައެވެ. އެހުރިހާ ހަނދާންތައްވަނީ ދޮރެއްގެ ފަހަތުގައި ތަޅުލެވިފައެވެ. އޭނަ އަހަރެންގެ ނަމުން ގޮވައިލަނީ ނިކަން މަޑުމަޑުންނެވެ. ބާރަށް ގޮވައިލިޔަސް ތެޅިދާނެތީ ބިރުން އުޅޭފަދައިންނެވެ. "މިރިއަމް..މިއީ އަހަންނޭ..." އަހަންނަށް އެމީހަކު ނޭގުނެވެ. އެކަމަކު ބޯ ޖަހައިލީ ދެރަކޮށްލަން ބޭނުންނުވާތީއެވެ. އޭނަ ހުންނަނީ ވަރަށް ވަރުބަލިެފައެވެ. އަހަންނަށްވެސް އެކަމުގެ ސަބަބެއް ނޭގެއެވެ. އަހަރެން ކަމެއްކުރީހެއްޔެވެ؟ އަދި ދޫލަމަތީގައި ކުޅެން ކުޑަ އަންހެންކުއްޖަކު އިންތަން ފެނުމުން ހައިރާންވިއެވެ. އެކުއްޖާގެ އިސްތަށިކޮޅުގެ މަޑުކަމުން ހަގީގަތެއްކަން ގަބޫލުކުރަން ދަތިވިއެވެ. "މަންމާ..."އެކުއްޖާ އަހަންނަށް "މަންމާ"އޭ ކިޔާފައި މުޚާތަބުކުރަން ފެށިއެވެ. އެކަަމަކު އަހަރެން މަންމައަކަށް ވާންވީ ކީއްވެހެއްޔެވެ؟ އަހަންނަކީވެސް ސްކޫލަށްދާ އުމުރުގެ އަންހެންކުއްޖެކެވެ. މާދަން އިމްތިހާނެއްވެސް އެބައޮތެވެ. ފިލާވަޅު ދަސްކުރަންޖެހެއެވެ. މިވާނީ އަވަށްޓެރިއެއްގެ ދަރިއަކަށެވެ. "މަންމާ..."އަހަރެން ގޮވައިލީމެވެ."ކުޑަކުއްޖަކު އެބައިން.." ބައެއްފަހަރު އެކުއްޖާގެ ހުނުމުގައި ހުރިގޮތަކުން ދަންނަގޮތެއް ހީވެގެން ބަލަހައްޓައިގެން އިނދެވެއެވެ. އެކުއްޖާގެ ގައިން ދުވާ މަލާއި ލޯޝަން ދެނެފަރިތައެވެ. އެއާއެކު އެކުއްޖާ ކުޅޭ އެއްޗެއް ހިފައިގެން އަހަންނާއި ދިމާލަށް އަންނަން ފެށުމުން ބިރުން ދުރަށް ޖެހިލެވެއެވެ. އަހަރެންގެ ކޮންމެވެސް ކަހަލަ މައްސަލައެއް އެބައުޅެއެވެ. ގޭގައި ދިރިއުޅޭ ބީރައްޓެހި ފިރިހެންމީހާ އަތުގައި ހިފައިލިއެވެ. ހޫނު އަތްތިލައެވެ. ދަންނަ އިހުސާސެއް ކުރެވުނެވެ. ސިކުނޑިއަށް ނޭގުނަސް ހަށިގަނޑު އެމީހަކު ދެނެގަތްފަދައެވެ. "މިރިއަމް...."އޭނަގެ އަޑުގައިވީ ކުލުނާއި އޯގާތެރިކަމެވެ."އަހަންނާއި ވާހަކަދައްކަބަލަ....ކޮންކަމެއް ތިވިސްނަނީ.." އަހަރެން ވާހަކަދައްކަން ބޭނުންވިއެވެ. ނަމަވެސް ލަފުޒުތައް އަތުރައިލަން ފަސޭހައެއްނުވިއެވެ. "އަހަރެން މިހުރިތަނެއް ނޭގޭ...މިގޭގައި ދަންނަ މީހަކު ނެތް.."އަހަރެންގެ އަޑު ތުރުތުރުލައިގަތެވެ. "ކޮޓަރިތައް އަބަދު އެއްގޮތަކަށް ނުހުންނަނީ ކީއްވެ؟ އެއްވެސް އެއްޗެއް އެގޮތަކަށް ނެތް..ބަދަލުއެބަވޭ..." އޭނަ ލޯ މަރައިލީ އަހަރެން އޭނަގެ ހިތަށް ފިޔޮއްސެއް ހަރައިލިހެންނެވެ. އަހަރެން އެއްވެސް އެއްޗެއް ހަނދާނެއް ނެތެވެ. އެކި އެތިކޮޅުތައް އެކި ދިމާލަށް ވިހުރިވިފައެވެ. ބައެއްފަހަރު އިހުސާސްކުރެވެނީ އަހަރެން މަޑުމަޑުން ގެއްލިގެން ދަނީހެންނެވެ. *** ހަމްޒާ ޑައިރީގައި ލިޔަމުން ދިޔައެވެ. މިރިއަމް ނިދަން އެނދުގައި އޮށޯވެ މާގިނައިރުތަކެއްނުވެ ލޯ މަރާލައިފިއެވެ. އަހަރެން ބޭރަށް ނުކުތްއިރު އިނގިލިތައް ރޫރޫއަޅައެވެ. އަހަރެން ދޮރު ރަަގަޅަށް ލެއްޕެންދެން މަޑުކޮށްލީމެވެ. މިރިއަމްގެ ނޭވާގެ މަޑު އަޑު އިވެންދެނެެ. މިރިއަމްއަށް އަހަރެންގެ އަޑު ނީވޭނެކަން ޔަގީންވަންދެނެވެެ.އެއާއެކު އަހަންނަށް ބިމަށް ތިރިވެވުނުގޮތަށް އަޑު ވީއްލާ ރޮވުނެވެ. އަހަރެން ކެތްކުރަން މަސައްކަތްކުރަމެވެ. އެކަމަކު މިރޭ ހަމަ ހިތަށް ކެތްނުވީއެވެ. މިރޭ މިރިއަމް އަހަންނަށް ބަލަން ހުރީ އެއްވެސް ގޮތަކަށް ނުދަންނަ ބީރައްޓެއްސެއްފަދައިންނެެވެ. "ތިއީ ކާކު؟ކޮން ނަމެއް ކިޔަނީ؟" އަހަރެން ގެ ހަޔާތުގެ ބައިވެރިޔާއެވެ. މިކުޑަ އެޕާޓްމެންޓްގައި އެ ހުނުމުގެ އުފާވެރި އަޑު އެއް އިރެއްގައި ގުގުމައިލިފަރާތެވެ. މަރްވާ ދުނިޔެއަށް ނޭވާ ލީ ދުވަހު އުފަލުން ރުއި އަނބިމީހާއެވެ. އަަހަރެން އެހެން އިނދެ އެތައް އިރެއްވާންދެން ކަރުނަ އޮއްސީމެވެ. މިރިއަމްއަށް އިވެން ބޭނުމެއްނުވިއެވެ. ބިރުގެންފާނެތީއެވެ. ފެނިއްޖެއްޔާ ހީކުރާނީ އޭނައަށް ކުށެއް ކުރެވިގެން ކަމުގައެވެ. މެޔަށް ތަދުވާންދެން ރޮވުނެވެ. އަހަރެން ރުއީ މިރިއަމް ގާތުގައި ހުރިއިރުވެސް "ހަނދާން"ވާވަރުންނެވެ. އަދިވެސް މިރިއަމް އަހަރެންގެ ގާތުގައިވާތީއެވެ. އެދެ ކަންތައް އެއްފަހަރާ ކުރާނެގޮތެއް ނުވިސްނޭތީއެވެ. އަހަރެން ފެންފޮދަކުން މޫނު ދޮވެލައިގެން ކޮޓަރިއަށް އަނބުރާ ވަންއިރު މިރިއަމްއޮތީ ހޭލައެވެ. ސީލިންއަށް ނަޒަރު ހުއްޓާލައިގެން އޮވެ ނާނާއެއް އަޅުވާލައިގެންނެވެ. އަހަރުތަކެއްކުރިން އަހަންނަށް ކިޔައިދިން ލަވައެކެވެ. ގާތުގައި އިށީނުމުންވެސް ބަލައެއްނުލައެވެ. އެކަމަކު ސިކުންތުކޮޅެއްފަހުން އަތުގައި ހިފެހެއްޓިއެވެ. ކޮންމެހެން އެނގިގެނެއް ނޫނެވެ. އެ ހަލާކުވެފައިވާ ބިރުވެރި ދުނިޔޭގައިވެސް އަހަރެންގެ ސަބަބުން ސަލާމަތާއި ރައްކާތެރިކަން އިހުސާސްކުރެވޭތީއެވެ. މިރެއަށް އެވަރުވެސް އެންމެ ރަގަޅެވެ. ނުނިމޭ