އަބަދުވެސް ފުލުހުންގެ މުއައްސަސާއިން މަސައްކަތް ކުރަމުންދަނީ ރަށްރަށުގައި އަމާން ވެއްޓެއް ޤާއިމްކޮށް ރައްޔިތުން އެދޭފަދަ ގޮތަކަށް ރަށްރަށުގައި ފުލުހުންގެ ޚިދުމަތް ޤާއިމް ކުރައްވަންކަމަށް ކޮމިޝަނަރ އޮފް ޕޮލިސް ޙުސައިން ވަޙީދު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް ޙުސައިން ވަޙީދު މިހެން ވިދާޅުވީ ގދ.ނަޑެއްލާ ކައުންސިލާ އިއްޔެ ބައްދަލުކުރައްވައި ދެއްކެވި ވާހަކައިގައެވެ
މި ބައްދަލުވުމުގައި ނަޑެއްލާ ކައުންސިލުގަ ފަރާތުންވަނީ ނަޑެއްލާގައި ފުލުހުންގެ މަރުކަޒެއް ނެތުމުގެ ސަބަބުން ކުރިމަތިވަމުންދާ ދަތިތައް ފާހަގަކޮށް ކަންބޮޑުވުން ފާޅުކޮށްފައެވެ. އަދި ނަޑެއްލާގައި މަސްތުވާތަކެތީގެ އަމަލު ހިންގަމުންދާ ކަމަށާއި، މިފަދަ ކަމެއް ކުރިމަތިވެއްޖެ ނަމަ ގދ. ތިނަދޫން ފުލުހުން ނަޑެއްލާ އަށް އައިސްކަމަށް އެ މައްސަލައެއް ކުރިޔަށް ގެންދަން ޖެހޭކަން ކައުންސިލުން ފާހަގަ ކުރެއްވިއެވެ.
އެހެން ރަށަކުން ފުލުހުން އައިސް އެކަން ކުރަން ޖެހުމުން މި ޢަމަލު ހިންގާ ފަރާތްތައް އެންމެ ފުރިހަމަ ގޮތުގައި ފުލުހުންގެ ބެލުމުގެ ދަށަށް ގެންދިޔުމުގަޔާއި އަދި އަދަބު ދިނުމަށް ފުލުހުންނަށްވެސް ގިނަ އުނދަގޫތަކެއް ކުރިމަތިވާކަމަށް ކައުންސިލުން ފާހަގަކުރި އެވެ.  މީގެ އިތުރުން ނަޑެއްލާގައި ޓްރެފިކްގެ ގިނަ މައްސަލަތަކެއް ކުރިމަތިވަމުންދާ ކަމަށާއި، ނަޑެއްލާގައި ފުލުހުން ގާއިމްވެ ނެތުމުގެ ސަބަބުން މިކަމަށްވެސް ހައްލެއް ލިބިފައިނުވާކަން ނަޑެއްލާގެ ކައުންސިލުގެ ފަރާތުން ވަރަށް ކަންބޮޑުވާކަމެއްގެ ގޮތުގައިވަނީ ފާހަގަކުރައްވާފައެވެ.
މި ބައްދަލުވުމުގައި ކޮމިޝަނަރ އޮފް ޕޮލިސް ދެއްކެވި ވާހަކައިގައި ނަޑެއްލާގައި ހިނގަމުންދާ މަސްތުވާތަކެތީގެ މައްސަލަ ހުއްޓުވުމަށް ފުލުހުންގެ ފަރާތުން ޚާއްސަ އޮޕަރޭޝަން ތަކެއް ކުރިޔަށް ގެންދާނެ ކަމަށާއި އަދި އަދި ޓްރެފިކް މައްސަލަތައް ހައްލުކުރުމަށްވެސް އޮޕަރޭޝަންތަކެއް ކުރިޔަށް ގެންދާނެކަމަށް ވިދާޅުވި އެވެ.ެ
ނަޑެއްލާގައި ފުލުހުންގެ މަރުކަޒެއް ނެތުމަކީ ފުލުހުންގެ މެނޭޖްމަންޓުންވެސް ވަރަށް ކަންބޮޑުވާކަމެއް ކަމަށާއި މާ ދުރު ނޫން މުސްތަޤްބަލެއްގައި ނަޑެއްލާގައިވެސް ފުލުހުންގެ މަރުކަޒެއް ގާއިމްކުރެވި ނަޑެއްލާގައި ފުލުހުން ހަރަކާތްތެރިވާން ފެށުމަށް މަސައްކަތް ކުރަމުން އަންނަ ކަމަށް ވެސް ސީޕީ ވަހީދު ވަހީދު ވިދާޅުވި އެވެ.