ސައިކަލް ޓެކްސީގެ ގަވާއިދު މިހާރު އޮތް ގޮތުން އެ ހިދުމަތް ހޯދާ މީހުންގެ ސަލާމަތާއި ރައްކާތެރިކަން ކަށަވަރު ނުކުރެވޭ ކަމަށް، އެ ހިދުމަތް ދިނުމަށް އިކޮނޮމިކް މިނިސްޓްރީން ލައިސަންސް ދޫކޮށްފައިވާ ރައިޑް މޯލްޑިވްސް އިން މިއަދު ބުނެފި އެވެ.
އެ ކުންފުނިން ނެރުނު ބަޔާނެއްގައި ބުނީ އިކޮނޮމިކް މިނިސްޓްރީން ގެޒެޓްކުރި ގަވާއިދުގައި ކަންބޮޑުވާ ގިނަ ކަންތައްތަައް އެބަހުރި ކަމަށާއި އެކަމާ ގުޅޭ ގޮތުން އެ މިނިސްޓްރީއާ ވެސް ބައްދަލު ކޮށްފައިވާ ކަމަށެވެ. އަދި އެ ކަންތަކަށް ހައްލެއް ނުލިބި ސައިކަލް ޓެކްސީގެ ހިދުމަތް ދޭން ފެށުމަކީ އެ ކުންފުނީގެ ހިދުމަތުގެ ފެންވަރާ ހިލާފުވާނެ ކަމެއް ކަމަށް ބުނެފައި ވެ އެވެ.
"މި ކަންބޮޑުވުންތަކަށް ހަރުދަނާ ފިޔަވަޅުތަކެއް ނާޅައި ހިދުމަތް ދޭން ފެށުމަކީ މި ކުންފުނީގެ ވިސްނުމާއި ހިދުމަތުގެ ފެންވަރާއި ހިލާފުވާނެ ކަމެކެވެ. އެހެންކަމުން މިހާރު ގަވާއިދު އޮތްގޮތަށް މިނިސްޓްރީން ހިދުމަތް ފަަށަން ބޭނުންވާ މުއްދަތުގައި އެކަން ފެށުމަކީ މި ކުންފުންޏަށް ކުރެވޭނެ ކަމެއް ނޫނެވެ،" އެ ބަޔާނުގައި ބުންޏެވެ.
ސައިކަލް ޓެކްސީގެ ހިދުމަތް ދިނުމުގެ ގަވާއިދު އިކޮނޮމިކް މިނިސްޓްރީން މިދިޔަ މަހުގެ ފަހުކޮޅު ގެޒެޓު ކޮށްފައިވާ އިރު އެކަން ކުރުމުގެ ހުއްދަ ދީފައިވަނީ ރައިޑް މޯލްޑިވްސް އަދި ވީލް އެމްވީ ކުންފުންޏަށެވެ.
ރައިޑް މޯލްޑިވްސް އިން ބުނީ ސައިކަލް ޓެކްސީ ހިދުމަތް ދިނުމުގައި އެންމެ ސަމާލުކަން ދޭންޖެހޭނީ ރައްކާތެރިކަން ކަށަވަރު ކުރުމަށް ކަމަށާއި ނަމަވެސް އެ އިން އެއްވެސް ކަމެއް އެ ސެންޓަރުތަކަށް ކުރެވެން ނެތް ކަމަށެވެ.
އެ ކުންފުނީގެ ކޯ ފައުންޑާ ނާއިލް އަބްދުލް ރަހުމާން ވިދާޅުވީ ސައިކަލްގެ ފަހަތަށް އަރާ މީހުންނާއި އެ ސައިކަލެއް ހުންނަ ހިސާބެއް ވެސް، ސައިކަލް ޓެކްސީ ސެންޓަރުތަކަށް ބެލެން ނެތް ކަމަށެވެ. އަދި އެ ހިދުމަތް ދޭން ސައިކަލުތައް މަގުމައްޗަށް ނުކުތުމަށް ފަހު، ދެން ކުރެވޭނެ އިތުރު ކަމެއް ނެތް ކަމަށް އޭނާ ވިދާޅުވި އެވެ.
"ސައިކަލްތައް ޓްރެކް ކުރެވޭނެ ގޮތެއް ނެތް. އަދި އެ ޓެކްސީތައް މަގުމައްޗަށް ނުކުތުމަށް ފަހު މޮނިޓާ ކުރެވޭނެ އިތުރު ގޮތެއް ނެތް. ސައިކަލް ފަހަތަށް އަރަނީ ކާކު އަދި ކޮން ހިސާބަކުން ކަމެއް ނެތް އެނގޭކަށް ނެތް. މިހާރު ގަވާއިދު އޮތް ގޮތުން ރައްކާތެރިކަން ކަށަވަރެއް ނުކުރެވޭ،" ނާއިލް ވިދާޅުވި އެވެ.
ގަވާއިދު ބުނާ ގޮތުން މަގުމަތީގައި ސައިކަލް ދުއްވަން ވާނީ ހެލްމެޓާއި އެހެނިހެން ސަލާމަތީ ސާމާނު ހިފައިގެންނެވެ. އަދި ހިދުމަތް ދޭ ވަގުތުތަކުގައި ހުންނަންވާނީ ވެސްޓެއް ލައިގެންނެވެ. މީގެ އިތުރުން ކޮންމެ ސެންޓަރަކަށް ވެސް ޓެކްސީ ކުރުމަށް ބޭނުން ކުރެވޭނީ 20 ސައިކަލް ކަމަށް ގަވާއިދުގައިވެ އެވެ.
ޓެކްސީ ޑްރައިވަރަކާ ބެހޭ ގޮތުން ހުށަހެޅިފައިވާ ޝަކުވާ އެ ޑްރައިވަރެއްގެ މައްޗަށް ސާބިތުވެއްޖެ ނަމަ، އެ ޑްރައިވަރު ކުރި އަމަލުގެ ކުޑަބޮޑުމިނަށް ބަލައި ފިޔަވަޅު އެޅުމުގެ އިހްތިޔާރު މިނިސްޓްރީ އަށް ލިބިގެންވެ އެވެ. އަދި ޑްރައިވަރާއި ޓެކްސީ ސެންޓަރާ މެދު އަޅާނެ ފިޔަވަޅުތައް ގަވާއިދުގައި ވަނީ ހިމަނައިފަ އެވެ.
އެއްވެސް ދަތުރަކާ ހަވާލުވާނީ ޓެކްސީ ސެންޓަރަށް އެންގުމަށް ފަހު ކަމަށް ވެސް ގަވާއިދުގައިވެ އެވެ.