ދުނިޔެ ލިބިގަތުމާއިމެދު އަހުރެމެންގެ ތެރެއިން ގިނަބައަކަށް ވިސްނައި ނުލެވޭ ކަމެއް އޮވެއެވެ. އެއީ ދުނިޔެ ލިބިގަތުމަކީ ކޮބައިކަމެވެ. ދުނިޔެ ލިބިގަތުމަކީ ތަނަވަސްކަމާއި ހިތްހަމަޖެހުން ލިބިގެން ދުނިޔޭގައި އުޅެވުމެއް ނޫނެވެ. ދުނިޔެ ލިބިގަތުމަކީ ﷲ ތަޢާލާ އަންގަވާފައިވާ ގޮތަށް ދުނިޔޭގައި އުޅުމެވެ. ވީމާ އާޚިރަތް ކާމިޔާބުކުރެވޭނީ މިބުނި މަގުން ދުނިޔެ ލިބިގަތް މީހަކަށެވެ.
ދެނަ މިބަޔާންކުރާ ﷲ ތަޢާލާގެ ވަޙީބަސްފުޅަށް ވިސްނައިލާށެވެ! އެއާޔަތުގައި އެއޮތީ އާޚިރަތް ލިބިގަންނަން ކުރަން އޮތް 3 ޢަމަލެވެ.
"އޭ އީމާން ވެއްޖެ މީސްތަކުންނޭވެ! ތިއަބައިމީހުން އެންމެން އިސްލާމް ދީނަށް ކިޔަމަންވުމުގެ ތެރެއަށް ވަންނާށެވެ! އަދި ޝައިޠޯނާގެ ފިޔަވަޅުތަކަށް ތިއަބައިމީހުން ތަބަޢަނުވާށެވެ! އެހެނީ، ހަމަކަށަވަރުން އެ ޝައިޠޯނާ އަކީ ތިއަ ބައިމީހުންނަށް ހުރި ބަޔާންވެގެންވާ ޢަދުއްވެކެވެ." (އަލް ބަޤަރާ: 208)
އިސްލާމްވުމާއި އިސްލާމްކަމުގައި ދެމިހުރުމާއި މިކަންކަން ބައެއް މީހުން ތަފާތު ގޮތްގޮތަށް މާނަކުރެއެވެ. ނަމަވެސް ﷲ ތަޢާލާގެ އަމުރުފުޅު މިއޮތީ ހަމަ އެންމެ އާޔަތަކުން އެނގިހާމަވާށެވެ! ވިސްނުންތެރިކަމާއިއެކު ވިސްނުން ހިންގައިލާށެވެ!
ﷲ ތަޢާލާއަށް އީމާންވުމަށްފަހު ފުރަތަމަ އަމުރުފުޅަކީވެސް "އިސްލާމް ދީނަށް ކިޔަމަންވުމުގެ ތެރެއަށް ވަންނާށެވެ!". މާނައަކީ ފުރިހަމަ ގޮތުގައި ﷲ ތަޢާލާއަށް ކިޔަމަންތެރިވާށެވެ! ﷲ ތަޢާލާ އަންގަވާފައިވާ ގޮތަށް ޢަމަލުކުރާށެވެ! އިސްލާމް ދީނުގައި ހުއްދަކުރައްވަވާފައިވާ ކަމެއް މެނުވީ ނުކުރާށެވެ! ނަހީ ކުރެއްވެވި އެންމެހައި ކަންކަމުން ދުރުހެލިވާށެވެ!
ވިދިގެން ވަހީކުރައްވަވާފައި އެވަނީ " ޝައިޠޯނާ އަކީ މީސްތަކުންގެ މައްޗަށް ހުރި ބަޔާންވެގެންވާ ޢަދުއްވެއް" ކަމަށާއި "ޝައިޠޯނާގެ ފިޔަވަޅުތަކަށް ތަބަޢަނުވުމަށެވެ!
މިއީ އިސްލާމް ދީނުގައި އެންމެ މުހިންމު 3 ކަންތަކެވެ. ނަރަކައިން ސަލާމަތްވެ ސުވަރުގެ ލިބުމަށް ކޮންމެހެން ކުރަންޖެހޭ 3 ކަންތަކެވެ. ﷲ ތަޢާލާއަށް ފުރިހަމަ ގޮތުގައި އީމާންވުމާއި، އިސްލާމް ދީނަށް ފުރިހަމަ ގޮތުގައި ޢަމަލުކުރުމާއި ޝައިޠޯނާގެ ވަސްވާސްތަކަށް އެއްވެސް ވަރަކަށް ޢަމަލު ނުކުރުމެވެ! އެގޮތުގައި ސާބިތުވެވިއްޖެ މީހާއަށް ސުވަރުގެ ދެއްވަވާނެތެވެ! އިން ޝާ ﷲ
--އިސްލާމީ ތިލަފަތުގެ ދަރުސަކުން