އެމެރިކާއާއި އީރާނާ ދެމެދު ސްވިޓްޒަލޭންޑުގައި ބޭއްވުމަށް ހަމަޖެހިފައިވާ މަޝްވަރާތައް މި ވަގުތަށް ފަސްކޮށްފިއެވެ. މެދުވެރިންގެ ދައުރު އަދާކުރާ ޓީމުގެ މަސްދަރުތަކާ ހަވާލާދީ އަލް ޖަޒީރާއިން ރިޕޯޓުކޮށްފައިވާ ގޮތުގައި، މި މަޝްވަރާތައް އެއްކޮށް ކެންސަލްކޮށްފައެއް ނުވެއެވެ. ނަމަވެސް މި ވަގުތަށް ވަނީ ފަސްކޮށްފައެވެ. ސްވިޓްޒަލޭންޑުގެ ޚާރިޖީ ވުޒާރާއިން ބުނެފައިވަނީ، ބާގަންސްޓޮކްގައި މި މަޝްވަރާތައް ފެށުމަށް ވާންޖެހޭ ތައްޔާރީތައް އަދިވެސް ކުރިއަށްދާ ކަމަށެވެ. މަޝްވަރާތަކާ ގުޅިގެން ޕާކިސްތާނުގެ ބޮޑުވަޒީރު މިއަން މުޙައްމަދު ޝަހްބާޒް ޝަރީފް ސްވިޓްޒަލޭންޑަށް ކުރައްވަން ހަމަޖެހިފައި އޮތް ދަތުރުފުޅު ފަސްކުރައްވާފައިވާ ކަމަށް އެމަނިކުފާނު ވަނީ ވިދާޅުވެފައެވެ. https://www.sun.mv/223529 އެހެންނަމަވެސް، އެމެރިކާގެ ނައިބު ރައީސް ޖޭމްސް ޑޭވިޑް ވޭންސް ވިދާޅުވެފައިވަނީ ކުރިއަށް އޮތް ހަފުތާބަންދުގައި ސްވިޓްޒަލޭންޑަށް ވަޑައިގަތުމަށް އަދިވެސް ގަސްދުކުރައްވާ ކަމަށެވެ. މަޝްވަރާތަކަށް އޮތް އެންމެ ބޮޑު އެއް ހުރަހަކީ ލުބުނާނުގެ މައްސަލައެވެ. އިސްރާއީލުގެ އަސްކަރިއްޔާއިން ބުނެފައިވާ ގޮތުގައި، ލުބުނާނުގެ ދެކުނުގައި ރޭގަނޑު ދިން ގޮވާ ޒާތުގެ ޑްރޯން ހަމަލާއެއްގައި އިސްރާއީލުގެ ފަސް ސިފައިންނަށް ވަނީ އަނިޔާވެފައެވެ. މީގެ ތެރެއިން އެކެއްގެ ހާލު ސީރިއަސް ކަމަށް ވެސް ބުނެފައިވެއެވެ. މި ހާދިސާގެ ކުރިން، ލުބުނާނުގެ ދެކުނުގައި ހިނގި ކުރިމަތިލުންތަކެއްގައި އިސްރާއީލުގެ ހަތަރު ސިފައިން މަރުވެފައިވާ ކަމަށް ވެސް އެ ގައުމުގެ އަސްކަރިއްޔާއިން ވަނީ ހާމަކޮށްފައެވެ. އިސްރާއީލުން ލުބުނާނުގެ ދެކުނުގެ ސަރަހައްދުތައް ހިފައިގެން ތިބިއިރު، އެ ސަރަހައްދުގައި ކުރިމަތިލުންތައް ދަނީ ހިނގަމުންނެވެ. އެމެރިކާއާއި އީރާނާ ދެމެދު ވެފައިވާ ފަހުމުނާމާގެ ދަށުން ވެފައިވާ އެއްބަސްވުންތައް ތަންފީޒުކުރާނެ ވަގުތެއް ކަނޑައަޅާނީ ދެ ފަރާތުން ކަމަށް ރިޕޯޓުތައް ބުނެއެވެ. މިހާތަނަށް އެއްބަސްވެފައިވާ ކަންކަމުގެ ތެރޭގައި، ހޮރުމުޒް ކަނޑުއޮޅިން އާގުބޯޓުފަހަރަށް ވަގުތުން ދަތުރުކުރެވޭނެ އިންތިޒާމު ހަމަޖެއްސުން ހިމެނެއެވެ. އަދި އީރާނުގެ ކަނޑުގެ ބަނދަރުތަކަށް އެމެރިކާއިން އަޅާފައިވާ ހުރިހާ ފިޔަވަޅުތަކެއް މިހާރު ވަނީ އުވާލާފައެވެ. މީގެ އިތުރުން، ދެ ގައުމުގެ ދެމެދުގައި ހިނގަމުންދިޔަ ހަމަލާބަދަލުކުރުންތައް ވަނީ ހުއްޓާލާފައެވެ. ނަމަވެސް، ލުބުނާނުގެ މައްސަލައަކީ އީރާނުން ވަރަށް ބޮޑަށް ސަމާލުކަންދޭ ކަމެކެވެ. އީރާނުން ބޭނުންވަނީ ލުބުނާނުގައި ހަމަލާތައް ބަދަލުކުރުން ހުއްޓާލުމަށާއި، އެ ގައުމުގެ ސަރަހައްދީ މިނިވަންކަމަށް އިހުތިރާމުކުރުން ކަށަވަރުކުރުމަށެވެ. މި ކަންކަން މަޝްވަރާތަކުގައި ހިމެނޭނެތޯ ނުވަތަ ނޫންތޯ އަކީ، މަޝްވަރާތައް ފެށުމުގެ ކުރިން ކުރިމަތިވާނެ އެންމެ ބޮޑު އެއް ހުރަހެވެ.