ސަރުކާރުގެ ޓެކްސީ ލައިންގެ ޚިދުމަތް އަންނަ މަހުގެ ދެވަނަ ދުވަހު ފަށަން ނިންމައި، އެ ޚިދުމަތަށް ބޭނުންވާ ކާރުތަކުގެ ފުރަތަމަ ބެޗު މިއަދު ރާއްޖެ ގެނެސްފިއެވެ. ޓްރާންސްޕޯޓް މިނިސްޓްރީން 'އެކްސް'ގައި ހިއްސާކުރި ވީޑިއޯއެއްގައި ވަނީ އެ ކާރުތައް ދައްކާލައިފައެވެ. 'ސަން' އަށް މައުލޫތުމާތުދެއްވައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ މިއަދު ގެނައި ކާރުތަކަކީ ޓެކްސީ ލައިންގެ ފުރަތަމަ ފޭސްގައި ބޭނުންކުރާ ކާރުތަކުގެ ދެބައިކުޅަ އެއްބައި ކަމަށެވެ. އަދި ބާކީ ކާރުތައް ކުރިއަށް އޮތް ހަތަރު ދުވަހުގެ ތެރޭ އަންނާނެ ކަމަށް މިނިސްޓަރު ވިދާޅުވިއެވެ. https://x.com/MoTCAmv/status/2036409576493555983 މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން މިއަދު ބުނީ، އަންނަ މަހުގެ ދެވަނަ ދުވަހު ޓެކްސީ ލައިންގެ ޚިދުމަތް ފަށާނެ ކަމަށެވެ. މި ޓެކްސީ ލައިންގައި ބޭނުންކުރުމަށް މިހާތަނަށް 150 ކާރު ގެނެސްފައިވާއިރު އޭގެ ތެރޭގައި ހިމެނެނީ: ޗަންގަން އޮޓޯމޮބައިލް، އެސް.ސުމެއް.ފަހެއް - 60 ކާރު ޗަންގަން އޮޓޯމޮބައިލް، ލުމިން އަދި އެސް.ސުމެއް.ހަތެއް - 90 ކާރު ސަރުކާރުން ތައާރަފްކުރާ މި ޚިދުމަތުގައި ބޭނުންކުރާނީ ތިމާވެއްޓާއި ރައްޓެހި، ސައްތައިން ސައްތަ އިލެކްޓްރިކް ވެހިކަލް ހިމެނޭ ޓެކްސީތައް ކަމަށެވެ. އެގޮތުން 24 ގަޑިއިރު ޚިދުމަތް ދޭ ގޮތަށް ތައާރަފުކުރެވޭ މި ޓެކްސީ ޚިދުމަތް ދިނުމަށް އެކަމަށް ޚާއްސަ އެޕްލިކޭޝަނެއް އޮންނާނެ ކަމަށާއި އެ އެޕް މެދުވެރިކޮށް ޓެކްސީގެ ޚިދުމަތް ހޯދާ ފަރާތުގެ ލޮކޭޝަނާއި އެންމެ ގާތުގައިވާ ޓެކްސީ އެނގޭނެ ކަމަށް އެމްޓީސީސީން ވަނީ މީގެ ކުރިން ބުނެފައެވެ. ސަރުކާރު ޓެކްސީ ލައިންގައި ބޭނުންކުރާ ކާރުތައް މިނިސްޓަރު އަމީން ބައްލަވައިލައްވަނީ -- ފޮޓޯ/ އެމްޓީސީސީ އެމްޓީސީސީން އިތުރަށް ބުނީ ކަސްޓަމަރުންނަށް ދަތުރުކުރުމުގައާއި، އެޕް ބޭނުންކުރުމުގައި އަދި ދިމާވާ އެހެނިހެން ހާލަތްތަކުގައި އެހީތެރިކަން ފޯރުކޮށްދިނުމަށް ޚާއްސަ ހޮޓްލައިން ނަންބަރު، 1655 ގާއިމުކޮށްފައިވާނެ ކަމަށެވެ. ޓެކްސީ ލައިނަށް ބޭނުންވާ ކާރުތަކުގެ ފުރަތަމަ ބެޗު ގެނައިއިރު އެމްޓީސީސީއިން މިއަދު ވަނީ ޓެކްސީ ލައިނުގެ ޚިދުމަތަށް ބޭނުންވާ ޕާޓް ޓައިމް ޑްރައިވަރުންގެ ޕޫލުގައި ދަފުތަރުވުމަށް ވެސް ހުޅުވާލައިފައެވެ. ފާހަގަކޮށްލެވޭ ގޮތުގައި ސަރުކާރުގެ ޓެކްސީ ލައިންގެ ޚިދުމަތް ފެށޭނެ ކަމަށް ވިދާޅުވެ ޓްރާންސްޕޯޓް މިނިސްޓަރު މުޙައްމަދު އަމީން އެންމެ ފުރަތަމަ ދެއްވި ތާރީޚަކީ ނިމިދިޔަ އަހަރުގެ ޖުލައި މަހުގެ ފުރަތަމަ ހަފުތާއެވެ. އެއަށްފަހު، މިނިސްޓަރު ވަނީ އެ އަހަރުގެ ޖޫން މަހު، ޓެކްސީ ލައިންގެ ޚިދުމަތް ފެށޭނީ އޮގަސްޓު މަހު ކަމަށް ވިދާޅުވެފައެވެ. https://sun.mv/219615 ނަމަވެސް، މިނިސްޓަރު ދެއްވި ދެ މުއްދަތުގައި ވެސް ޓެކްސީ ލައިންގެ ޚިދުމަތް ފެށިފައެއް ނުވެއެވެ. މި މަހުގެ ހަތަރެއްގައި މިނިސްޓަރު ވަނީ އިތުރު ތާރީޚެއް ދެއްވައިފައެވެ. މިގޮތުން، ފިޠުރު ޢީދުގައި ޓެކްސީ ލައިންގެ ޚިދުމަތް ފަށަން މަސައްކަތް ކުރައްވާ ކަމަށް އޭރު މިނިސްޓަރު ވިދާޅުވިއެވެ. އެކަމަކު، ޓްރާންސްޕޯޓް މިނިސްޓްރީން 'ސަން'އަށް ބުނީ، އީދަށް ޓެކްސީ ލައިންގެ ޚިދުމަތް ނުފެށޭނެ ކަމަށެވެ. ނަމަވެސް، މި މަހު ޓެކްސީ ލައިންގެ ޚިދުމަތް ފެށޭނެ ކަމަށް އެ މިނިސްޓްރީން ބުންޏެވެ.