އެމެރިކާގެ ރައީސް ޑޮނަލްޑް ޓްރަމްޕް، އީރާނާ އެކު އަސްކަރީ ކުރިމަތިލުމަކަށް އެމެރިކާ ވަރަށް ބޮޑަށް ކައިރިކުރައްވައިފި އެވެ.
މީގެ ސަބަބުން ސިޔާސީ ގޮތުން ނުރައްކާތަކެއް ކުރިމަތިވަމުންދާއިރު، މިއަހަރު ބާއްވާ މިޑްޓާމް އިންތިހާބުގެ ކުރިން ރައްޔިތުންގެ އިގްތިސާދީ ކަންބޮޑުވުންތަކަށް ސަމާލުކަން ދިނުމަށް ރައީސްގެ އެހީތެރިން ދަނީ ބާރުއަޅަމުންނެވެ.
މެދުއިރުމަތީގައި އެމެރިކާގެ އަސްކަރީ ބާރުތައް ވަރުގަދަކުރުމަށާއި ހަފްތާތަކަކަށް ދެމިގެންދާ ފަދަ ވައިގެ ހަމަލާތަކެއްގެ ކެމްޕޭނަކަށް ތައްޔާރުވުމަށް ޓްރަމްޕް ވަނީ އަމުރުކުރައްވާފަ އެވެ. އަދި އީރާނުގެ ނިއުކްލިއާ މަޝްރޫއާ ގުޅޭ ގޮތުން މަޝްވަރާކުރުމަށް ތެހެރާނަށް ތަކުރާރުކޮށް އިންޒާރު ދެއްވަމުން ގެންދަވަ އެވެ.
ނަމަވެސް، އެމެރިކާގެ ރައްޔިތުން ހާރިޖީ ސިޔާސަތަށް ވުރެ ބޮޑަށް ދިރިއުޅުމުގެ ހަރަދުތަކާ މެދު ކަންބޮޑުވާކަން ހިޔާލު ހޯދުމުގެ ސާވޭތަކުން ދައްކާއިރު، އަސްކަރީ ފިޔަވަޅެއް އެޅުމަށް ބޭނުންވާ ސަބަބުތަކެއް ޓްރަމްޕް އަދި އާންމުކޮށް ހާމަކުރައްވާފައެއް ނުވެ އެވެ.
ވައިޓް ހައުސްގެ އިސް އޮފިޝަލަކު ވިދާޅުވި ގޮތުގައި، އީރާނަށް ހަމަލާދިނުމާ މެދު ސަރުކާރުގެ ތެރޭގައި އަދިވެސް އެއްބަސްވުމަކަށް އާދެވިފައެއް ނުވެ އެވެ. އަދި އިގްތިސާދަށް ސަމާލުކަންދޭ ވޯޓުލާ މީހުންނަށް "މަގުއޮޅޭ ފަދަ މެސެޖެއް" ފޮނުވުމާ މެދު އޭނާ އިންޒާރު ދެއްވި އެވެ.
ނަމަވެސް، އެހެން އޮފިޝަލަކު ޓްރަމްޕްގެ ސިޔާސަތު ދިފާއުކުރައްވަމުން ވިދާޅުވީ، ރައީސްގެ ހާރިޖީ ސިޔާސަތަކީ ސީދާ އެމެރިކާގެ ރައްޔިތުންނަށް ކާމިޔާބީތައް ހޯދައިދޭ އަދި އެމެރިކާ އިސްކުރުމުގެ ސިޔާސަތެއް ކަމަށެވެ.
ރިޕަބްލިކަން ޕާޓީގެ ސްޓްރެޓެޖިސްޓުން އިންޒާރު ދޭ ގޮތުގައި، ދިގުލައިގެންދާ ހަނގުރާމައެއްގެ ސަބަބުން ޓްރަމްޕަށް ތާއީދުކުރާ މީހުން އޭނާއާ ދުރުވެދާނެ އެވެ. ސަބަބަކީ އެ މީހުންނަކީ ބޭރުގެ ހަނގުރާމަތަކުގައި ބައިވެރިވުމާ މެދު ޝައްކު އުފެދިފައިވާ ބަޔަކަށް ވުމެވެ.
މިދިޔަ މަހެއްހާ ދުވަހު ވެނެޒުއޭލާއާ ދެކޮޅަށް އެމެރިކާއިން އެޅި ފިޔަވަޅުތަކަށް ބައެއް ސަޕޯޓަރުން ތާއީދުކުރި ނަމަވެސް، ދިރާސާކުރާ ފަރާތްތަކުން ބުނަނީ އީރާނަކީ މާ ވަރުގަދަ ދުޝްމަނަކަށް ވާނެ ކަމަށެވެ.
އިންފްލޭޝަން ކުޑަކުރުމަށާއި އަގުބޮޑު ހަނގުރާމަތަކުން ދުރުވުމަށް ވައުދުވެވަޑައިގެން 2024ގެ އިންތިހާބު ކާމިޔާބު ކުރެއްވި ޓްރަމްޕަށް، ތަކެތީގެ އަގުތައް ދަށްވަމުންދާކަން ރައްޔިތުންނަށް ޔަގީންކޮށްދިނުމަށް ވަނީ ދަތިތަކަކާ ކުރިމަތިވެފަ އެވެ. އެހެންކަމުން، ކޮންގްރެސްގެ ކޮންޓްރޯލް ދެމެހެއްޓުމަށް ރިޕަބްލިކަން ޕާޓީން މަސައްކަތްކުރަމުންދާ މި ދަނޑިވަޅުގައި، އީރާނާ އެކު މަސްލަހަތު ގޯސްވުމަކީ ނުރައްކާތެރި ފިޔަވަޅަކަށް ވެގެންދާނެ އެވެ.