އެކި މީހުން ޖަޒުބާތީ ވާނީ އެކި ކަންކަމުގަ އެވެ. ކުރީގެ ރައީސް މައުމޫން އަބްދުލްގައްޔޫމް މިފަހަރު ޖަޒުބާތީވީ ލިވަޕޫލް އާއި ގުޅިގެން ރާއްޖޭގެ ޓޫރިޒަމް އިސްތިހާރުކުރަން ފަަށާތީ އެވެ.
ވީ ކިހިނެއް؟ - އިނގިރޭސި ޕްރިމިއަ ލީގުގެ އެއްވަނާގައި ތަފާތު ބޮޑުކޮށް އޮތް ލިވަޕޫލްގެ ޓޫރިޒަމްގެ ރަސްމީ މަންޒިލަކަށް ރާއްޖެ ހަދާފައިވާ ހާއްސަ ޕްރޮމޯޝަނުގެ ހަރަކާތްތައް ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސް މުހައްމަދު މުއިއްޒު މިހާރު ވަނީ އިނގިރޭސި ވިލާތަށް ވަޑައިގެންފަ އެވެ.
ތަފްސީލް - ލިވަޕޫލްއާ އެކު އެމްއެމްޕީއާރުސީން ފަށާ އާ ކެމްޕޭންއާ ބެހޭ ގޮތުން މައުމޫން ވިދާޅުވީ ލިވަޕޫލްއާ ގުޅިގެން 'ވިޒިޓް މޯލްޑިވްސް' ކެމްޕެއިން މިރޭ ލިވަޕޫލްގެ ދަނޑު، އެންފީލްޑްގައި ލޯންޗުކުރާ އިރު ރައީސް މުއިއްޒު ބައިވެރިވެވަޑައިގަތުމަކީ، "އަޅުގަނޑަށް ފުން އަސަރެއްކުރުވާ ކަމެއް' ކަމަށެވެ.
"ޝުކުރިއްޔާ ރައީސް މުއިއްޒު،" އިނގިރޭސި ބަހުން ލިއުއްވި ޕޯސްޓް ނިންމާލައްވަމުން މައުމޫން ވިދާޅުވި އެވެ.
މައުމޫނަކީ 1970ގެ އަހަރުތަކުން ފެށިގެން ވެސް ލިވަޕޫލްގެ ސަޕޯޓަރެއްކަން ޕޯސްޓްގައި ފާހަގަކުރެއްވި އެވެ. 
ރާއްޖެ އިސްތިހާރުކުރަން ލިވަޕޫލްއާ އެކު އެއްބަސްވި ކެމްޕެއިން ރަސްމީކޮށް ފަށާނީ މިރޭ އެންފީލްޑްގައި އޮންނަ މެޗުގެ ކުރިން 11:30ގަ އެވެ. މި ރަސްމިއްޔާތު ޓީވީއެމް އާއި އައިސް ޓިވީން ވަގުތުން ދައްކާނެ އެވެ.
މިރޭ ރާއްޖޭގެ ގަޑިން 12 ޖަހާއިރު އެންފީލްޑްގައި ލިވަޕޫލް ނުކުންނާނީ އެ ސިޓީއަށް ނިސްބަތްވާ އަދި އެހާމެ ވާދަވެރި އެވަޓަންއާ ދެކޮޅަށެވެ. އެހެންކަމުން މިއީ މުޅި ލިވަޕޫލް ވެސް ހުއްޓުމަކަށް ގެނުވާނެ މެޗެކެވެ. ހާއްސަކޮށް ޕްރިމިއަ ލީގުގެ ތާވަލްގެ ކުރީގައި 12 ޕޮއިންޓްގެ ތަފާތެއް ގެންނަން ލިވަޕޫލަށް މިރޭގެ މެޗު އެހާމެ މުހިންމެވެ.
ރައިސް އޮފީހުން ބުނި ގޮތުގައި މިރޭ ފަށަނީ ރާއްޖޭގެ ޓޫރިޒަމް ޕްރޮމޯޓްކުރަން ހިންގާ ތިން އަހަރާއި ބައިގެ ކެމްޕޭންގެ ބައެކެވެ.
ރައީސްގެ މި ދަތުރުފުޅުގައި ހިމެނޭ ކަންކަމުގެ ތެރޭގައި:
ލިވަޕޫލްގެ އަކްސާ ޓްރެއިނިން ސެންޓަރަށް ޒިޔާރަތްކުރައްވައި އެންމެ މަތީ ފެންވަރުގައި ފުޓުބޯޅައިގެ ތަމްރީނާއި ކޯޗިންގެ ކަންކަން ކުރިއަށް ގެންދާ ގޮތް ބައްލަވާލެއްވުން
އެ ޒިޔާރަތުގެ ބޭނުމަކީ ރާއްޖޭގައި ވެސް ހައި ޕާފޯމަންސް ޓްރެއިނިން ނުވަތަ މަތީ ފަންތީގެ ތަމުރީނުތައް ހިންގޭނެ މަގު ތަނަވަސްކޮށްދެއްވުން
އިނގިރޭސިވިލާތުގައި ތިބި ދިވެހި ދަރިވަރުންނާ ބައްދަލުކުރެއްވުން  
ލީޑްސް ޔުނިވާސިޓީ އާއި ލީޑްސް ޓައުން ހޯލަށް ޒިޔާރަތްކުރައްވައި ލީޑްސް ސިޓީގެ ކައުންސިލަރާ ބައްދަލުކުރެއްވުން